પદ્મ પુરાણ · અધ્યાય 6.157

મહાદેવ ઉવાચ।
દુગ્ધેશ્વરસમીપે તુ તીર્થં ચાતીવપાવનમ્ ।
રમ્યં તત્પિપ્પલાદસ્ય નામ્ના વૈ પ્રથિતં ભુવિ

યત્ર કૃત્વા તપઃ પૂર્વં માતુર્વચનતો મુનિઃ ।
ઉત્પાદયામાસ કૃત્યાં વડવાનલસમ્મિતામ્

પિતુરાનૃણ્યમન્વિચ્છન્દધીચસ્ય મહાત્મનઃ ।
તત્ર સ્નાત્વા ચ પીત્વા ચ બ્રહ્મહત્યાં વ્યપોહતિ

સાભ્રમત્યાસ્તટે ગુપ્તં પિપ્પલાદં સુરેશ્વરમ્ ।
તત્ર સ્નાત્વા તુ ભો દેવિ મુક્તિભાગી ભવેન્નરઃ

આરોપણં પિપ્પલાનાં કર્ત્તવ્યં વિધિપૂર્વકમ્ ।
કૃતે સતિ મહાદેવિ મુચ્યતે કર્મબંધનાત્

પાર્વત્યુઉવાચ।
કિમર્થં સા તુ કૃત્યા વૈ ઉત્પન્ના તાં નિબોધય ।
તયા વૈ કૃત્યયા પૂર્વં કિં કૃતં વદ મે પ્રભો

યેન પુત્રેણ સા નીતા પિતુરાનૃણ્યકારણાત્

મહાદેવ ઉવાચ।
દાધીચો ઋષિવર્યોઽસૌ હ્યાગતસ્તપકારણાત્ ।
અત્ર તેન મહત્તપ્તમૃષિણા પરમાત્મના

તત્ર કોલાસુરો નામ વિઘ્નાર્થં વૈ સમાગતઃ ।
તેન વિઘ્નં બહુતરં કૃતં વૈ નાત્ર સંશયઃ

તદ્દૃષ્ટં તુ સુપુત્રેણ કહોડેન ચ ધીમતા ।
કૃત્યા હ્યુત્પાદિતા તત્ર હનનાર્થં સુરેશ્વરિ

તયા વૈ નિહતો દૈત્યઃ કોલો નામ મહાસુરઃ ।
તસ્માત્તીર્થં મહજ્જાતં કલૌ ગુપ્તં તુ પાર્વતિ

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયાં ઉત્તરખંડે ઉમામહેશ્વરસંવાદે પિપ્પલાદતીર્થં નામ સપ્તપંચાશદધિકશતતમોઽધ્યાયઃ