પદ્મ પુરાણ · અધ્યાય 6.156

મહાદેવ ઉવાચ।
દુગ્ધેશ્વરસ્ય પૂર્વે તુ તીર્થં પરમપાવનમ્ ।
ચંદ્રભાગેતિ વૈ નામ્ના નદી યત્ર તુ સંગતા

તત્ર ચંદ્રેશ્વરો દેવો નિત્યં તિષ્ઠતિ પુણ્યદઃ ।
યો હરઃ સર્વદા વ્યાપી લોકાનાં સુખદો મહાન્

અત્ર સ્નાનં પ્રકુર્વંતિ ધ્યાનં કુર્વંતિ નિત્યશઃ ।
તત્ફલં પ્રાપ્નુયુસ્તે વૈ સાભ્રમત્યાં શિવાર્ચનાત્

સોમેનાત્ર તપસ્તપ્તં કાલં બહુતરં કિલ ।
તસ્માચ્ચન્દ્રેશ્વરો નામ સ્થાપિતો વૈ મહેશ્વરઃ

શુક્રેણાપિ તપસ્તપ્તં ચન્દ્રભાગા સમીપતઃ ।
અતસ્તીર્થાધિકં તીર્થં પાવનં સર્વદા ભુવિ

કલૌ ગુપ્તં તુ ઋષિણા કારિતં વૈ સુરેશ્વરિ ।
યત્ર હેમમયં લિગં દૃશ્યતે નાત્ર સંશયઃ

અત્ર સ્નાત્વા ચ પીત્વા ચ કૃત્વા વૈ શિવપૂજનમ્ ।
યે નરાઃ સંગમિષ્યંતિ ધર્માનર્થાંલ્લભંતિ તે

વૃષોત્સર્ગાદિકં કર્મ યે કુર્વંતિ વિશેષતઃ ।
ભુક્ત્વા સ્વર્ગપદં તે વૈ પશ્ચાદ્યાંતિ હરાલયમ્

સ્નાનાર્થે પ્રત્યહં દેવિ ચંદ્રભાગા સમીપતઃ ।
આગમિષ્યંતિ યે લોકાસ્તે જ્ઞેયાઃ પુણ્યભાગિનઃ

ગત્વા પરતટે યે વૈ હ્યર્ચયંતિ ચ તં શિવમ્ ।
ચંદ્રેશ્વરેતિ નામાનં શ્રીહરં પાપકૃંતનમ્

અત્ર ગત્વા વિશેષેણ રુદ્રજાપ્યાદિકં તથા ।
યે કુર્વંતિ નરશ્રેષ્ઠાસ્તે જ્ઞેયાઃ શિવરૂપિણઃ

સર્વદા તુ સુરશ્રેષ્ઠ યત્ર સ્નાનં પ્રકુર્વતે ।
તે નરા વિષ્ણુરૂપાણિ વિજ્ઞેયા નાત્ર સંશયઃ

યેઽત્ર શ્રાદ્ધં પ્રકુર્વંતિ તિલપિંડેન વા પુનઃ ।
તેઽપિ વિષ્ણુપદં યાંતિ પિંડદાનપ્રભાવતઃ

અત્ર દાનં પ્રકર્ત્તવ્યં સ્નાનં વૈ વિધિપૂર્વકમ્ ।
યત્ર સ્નાત્વા તુ મુચ્યંતે બ્રહ્મહત્યાદિકિલ્બિષાત્

તટેસ્મિન્યે વિશેષેણ વટં ચારોપયંતિ તે ।
મૃતાઃ શિવપદં યાંતિ યાવચ્ચંદ્ર દિવાકરૌ

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયાં ઉત્તરખંડે ઉમા૦ચંદ્રેશ્વર ચંદ્રભાગા મહિમાનામ ષટ્પંચાશદધિકશતતમોઽધ્યાયઃ