પદ્મ પુરાણ · અધ્યાય 6.140

શ્રીમહાદેવ ઉવાચ।
ભો દેવ્યન્યત્પ્રવક્ષ્યામિ હિરણ્યાસંગમં મહત્ ।
યદા સાભ્રમતી ગંગા સપ્તસ્રોતા પુરાભવત્

તદા સા બ્રહ્મતનયા સપ્તસ્રોતેતિ વિશ્રુતા ।
સપ્તમં તદ્ધિરણ્યાખ્યં સ્રોત ઇત્યભિધીયતે

તસ્મિંસ્તીર્થે નરઃ સ્નાત્વા પાપી ગતિમવાપ્નુયાત્ ।
ઋક્ષુમંજુમયોર્મધ્યે સત્યવાન્નામ પર્વતઃ

તસ્ય પ્રાક્સુમહત્તીર્થં હિરણ્યાસંગમં શુભમ્ ।
તત્ર સ્નાત્વા ચ પીત્વા ચ શુભાં ગતિમવાપ્નુયાત્

વનસ્થલ્યાં તતો ગચ્છેદ્દૃષ્ટ્વા નારાયણં હરિમ્ ।
તીર્થમપ્સરસાં પુણ્યં હિરણ્યાસંગમેશ્વરમ્

યત્રોર્વશી પુરા જાતા સમસ્તાપ્સરસાં શુભા ।
નરનારાયણૌ તત્ર તપસ્તેપતુરુત્તમમ્

હિરણ્યાસંગમે રમ્યે મહાપાપહરે શુભે ।
યત્ર વૈ ઋષયઃ સર્વે મજ્જંતિ વીતકલ્મષાઃ

વસિષ્ઠાદ્યાશ્ચ યે વિપ્રા વાલખિલ્યાદયશ્ચ યે ।
યત્ર મજ્જંતિ દેવેશિ હિરણ્યા સહ સંગમે

યત્ર હિરણ્મયં રૂપં સ્નાનાદ્વૈ ભવતિ ધ્રુવમ્ ।
કપિલાગોસહસ્રસ્ય દાનેનૈવ તુ યત્ફલમ્

તત્ફલં સમવાપ્નોતિ હિરણ્યાસંગમે સદા ।
દશાશ્વમેધે યત્પુણ્યં ગ્રહણે ચંદ્રસૂર્યયોઃ

તદનંતગુણં પ્રોક્તં હિરણ્યાસંગમે પુનઃ ।
તુલાપુરુષદાને ચ યત્ફલં સમવાપ્નુયાત્

તત્ફલં સમવાપ્નોતિ હિરણ્યાસંગમે સદા ।
હિરણ્યાક્ષો મહાદૈત્યસ્તેન તપ્તં મહત્તપઃ

હિરણ્યસદૃશં તત્ર શરીરમભવત્પુરા ।
જનમેજયે તથા રાજ્ઞિ યત્ર સ્નાનં પ્રકુર્વતિ

બ્રહ્મહત્યા ગતા દેવિ હિરણ્યાસંગમે તદા ।
વિશ્વામિત્રોઽથ રાજર્ષિઃ સ્નાનાર્થં વૈ સમાગતઃ

સ્નાનં કૃત્વા વિશેષેણ ગતોઽસૌ મામકીં પુરીમ્

બ્રાહ્મણાઃ ક્ષત્રિયા વૈશ્યાઃ શૂદ્રાશ્ચાથ સુરેશ્વરિ ।
સ્નાનં યેઽત્ર પ્રકુર્વંતિ તે ગચ્છંતિ શિવાલયમ્

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમામહેશ્વરસંવાદે હિરણ્યાસંગમં તીર્થં નામ ચત્વારિંશદધિકશતતમોઽધ્યાયઃ