Padma Purana · Chapter 6.140

śrīmahādeva uvāca/
bho devyanyatpravakṣyāmi hiraṇyāsaṃgamaṃ mahat /
yadā sābhramatī gaṃgā saptasrotā purābhavat

tadā sā brahmatanayā saptasroteti viśrutā /
saptamaṃ taddhiraṇyākhyaṃ srota ityabhidhīyate

tasmiṃstīrthe naraḥ snātvā pāpī gatimavāpnuyāt /
ṛkṣumaṃjumayormadhye satyavānnāma parvataḥ

tasya prāksumahattīrthaṃ hiraṇyāsaṃgamaṃ śubham /
tatra snātvā ca pītvā ca śubhāṃ gatimavāpnuyāt

vanasthalyāṃ tato gaccheddṛṣṭvā nārāyaṇaṃ harim /
tīrthamapsarasāṃ puṇyaṃ hiraṇyāsaṃgameśvaram

yatrorvaśī purā jātā samastāpsarasāṃ śubhā /
naranārāyaṇau tatra tapastepaturuttamam

hiraṇyāsaṃgame ramye mahāpāpahare śubhe /
yatra vai ṛṣayaḥ sarve majjaṃti vītakalmaṣāḥ

vasiṣṭhādyāśca ye viprā vālakhilyādayaśca ye /
yatra majjaṃti deveśi hiraṇyā saha saṃgame

yatra hiraṇmayaṃ rūpaṃ snānādvai bhavati dhruvam /
kapilāgosahasrasya dānenaiva tu yatphalam

tatphalaṃ samavāpnoti hiraṇyāsaṃgame sadā /
daśāśvamedhe yatpuṇyaṃ grahaṇe caṃdrasūryayoḥ

tadanaṃtaguṇaṃ proktaṃ hiraṇyāsaṃgame punaḥ /
tulāpuruṣadāne ca yatphalaṃ samavāpnuyāt

tatphalaṃ samavāpnoti hiraṇyāsaṃgame sadā /
hiraṇyākṣo mahādaityastena taptaṃ mahattapaḥ

hiraṇyasadṛśaṃ tatra śarīramabhavatpurā /
janamejaye tathā rājñi yatra snānaṃ prakurvati

brahmahatyā gatā devi hiraṇyāsaṃgame tadā /
viśvāmitro'tha rājarṣiḥ snānārthaṃ vai samāgataḥ

snānaṃ kṛtvā viśeṣeṇa gato'sau māmakīṃ purīm

brāhmaṇāḥ kṣatriyā vaiśyāḥ śūdrāścātha sureśvari /
snānaṃ ye'tra prakurvaṃti te gacchaṃti śivālayam

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde hiraṇyāsaṃgamaṃ tīrthaṃ nāma catvāriṃśadadhikaśatatamo'dhyāyaḥ