પદ્મ પુરાણ · અધ્યાય 6.138

મહાદેવ ઉવાચ।
ગણતીર્થં તતો ગચ્છેત્તીર્થયાત્રાપરાયણઃ ।
ત્રિવિષ્ટપમિતિ પ્રોક્તં ગણૈસ્તુ ચંદના તટે

ત્રિવિષ્ટપે નરઃ સ્નાત્વા પૂર્ણમાસ્યાં સમાહિતઃ ।
સંશયો નાત્ર કર્ત્તવ્યો મુચ્યતે બ્રહ્મહત્યયા

ચતુરો વાર્ષિકાન્માસાન્સ્થિતિર્યસ્ય ત્રિવિષ્ટપે ।
સોઽપિ પુણ્યો મહાભાગે રુદ્રલોકે મહીયતે

ગણતીર્થે નરઃ સ્નાત્વા કૃષ્ણાષ્ટમ્યામુપોષિતઃ ।
બકુલાસંગમે સ્નાત્વા સ્વર્ગં ગચ્છતિ માનવઃ

તસ્મિંસ્તીર્થે નરઃ સ્નાત્વા બકુલેશં વિલોક્ય ચ ।
ગણેશ્વરપ્રસાદેન ગાણપત્યમવાપ્નુયાત્

ઇદં પવિત્રં પરમં પુણ્યાયુષ્યવિવર્દ્ધનમ્ ।
શ્રુત્વા તુ લભતે પુણ્યં ગંગાસ્નાનસમં નરઃ

અત્ર સ્થિત્વા નિરાહારો જિતેંદ્રિય સમાહિતઃ ।
જપત્યેવં પરં દેવં ગણેશ્વરં મનોરમમ્

સંપ્રાપ્નોત્યખિલાન્ભોગાન્સત્યં સત્યં વરાનને ।
અત્ર રાજા સોમવંશી વિશ્વદત્તઃ સ વીર્યવાન્

તેન તપો મહત્તપ્તં બહુકાલં સુરેશ્વરિ ।
ગાણપત્યં તદા પ્રાપ્તં શ્રીગણેશપ્રસાદતઃ

વસિષ્ઠો વામદેવશ્ચ હોડઃ કૌશીતકો મુનિઃ ।
ભરદ્વાજોંગિરાશ્ચૈવ વિશ્વામિત્રોઽથ વામનઃ

એતે વૈ મુનયઃ સર્વે પુણ્યરૂપા મહેશ્વરિ ।
નિત્યં સેવાં પ્રકુર્વંતિ શ્રીગણેશપ્રસાદતઃ

અપુત્રો લભતે પુત્રાન્નિર્દ્ધનો લભતે ધનમ્ ।
અવિદ્યો લભતે વિદ્યાં મોક્ષાર્થી મોક્ષમાપ્નુયાત્

કિમન્યદ્બહુનોક્તેન ભૂયોભૂયો વરાનને ।
યોઽત્ર સ્નાનં પ્રકુર્વીત પૂજનં વા કરોતિ ચ

સર્વપાપવિનિર્મુક્તો યાતિ વિષ્ણોઃ પરં પદમ્ ।
શિવાય વિષ્ણુરૂપાય વિષ્ણવે શિવરૂપિણે

નાંતરં દેવિ પશ્યામિ શ્રીવિષ્ણોશ્ચ પ્રસાદતઃ

ઇતિ શ્રીપાદ્મે મહાપુરાણે પંચપંચાત્સાહસ્ર્યાં સંહિતાયામુત્તરખણ્ડે ઉમામહેશ્વરસંવાદે બકુલાસંગમે ગણતીર્થં નામાષ્ટત્રિંશાધિકશતતમોઽધ્યાયઃ