પદ્મ પુરાણ · અધ્યાય 6.137

મહાદેવ ઉવાચ।
અથ નંદિપ્રદેશાત્તુ યથા સાભ્રમતી નદી ।
સમાયાતા વિકીર્ણં ચ વનં વિપ્રર્ષિસેવિતમ્

બહુધા જલવેગેન પર્વતાનાં ચ રોધસઃ ।
સપ્તધા પ્રવિભક્તા ચ દક્ષિણોદધિગામિની

આદ્યા સાભ્રમતી પુણ્યા દ્વિતીયા સેટિકા તધા ।
તૃતીયા વલ્કિની પુણ્યા ચતુર્થી ચ હિરણ્મયી

સર્વપાપહરા પ્રોક્તા હસ્તિમત્યથ પંચમી ।
વેત્રવતી સા ચ ષષ્ઠી વૃત્રેણ નિર્મિતા પુરા

ઇયં સા પરમા દેવી વૃત્રકૂપાદ્વિનિઃસૃતા ।
વેત્રવતી તતો જાતા મહાપાપપ્રણાશિની

ભદ્રામુખી શુભપ્રાયા સપ્તમી લોકપાવની ।
એતૈસ્તુ સપ્તભિર્દેવિ તાંસ્તાન્જનપદાંસ્તથા

પવિત્રીકૃત્ય ચૈકેન સપ્તસ્રોતા પ્રતિષ્ઠિતા ।
વિકીર્ણતીર્થે યઃ શ્રાદ્ધં પિતૄનુદ્દિશ્ય દાસ્યતિ

ગયાપિંડપ્રદાનસ્ય ફલં યત્તદ્ભવિષ્યતિ ।
અવકીર્ણા ચ્યુતા યે ચ લુપ્તપિંડોદકક્રિયાઃ

તે વિકીર્ણે પ્રમુચ્યંતે દત્તપિંડોદકક્રિયાઃ ।
તત્ર શ્રાદ્ધં તુ યઃ કુર્યાદ્ગાણપત્યં ભવેદ્ધ્રુવમ્

તસ્માત્ત્રયીવિધાનેન શ્રદ્ધયા શ્રાદ્ધમાચરેત્ ।
અસ્મિંસ્તીર્થે વિશેષેણ સપ્તનદ્યુદયે દ્વિજાઃ

સ્નાનં કુરુત વિપ્રેંદ્રા ઋષિલોકમભીપ્સવઃ ।
ઇત્યુક્તં કશ્યપેનાથ દ્વિજાન્પ્રતિ વિશેષતઃ

યદિ ચેત્ક્રિયતે સ્નાનં સર્વદુઃખાપહં સદા ।
તીર્થાનાં પ્રવરં તીર્થં ક્ષેત્રાણામુત્તમોત્તમમ્

તીર્થમેતદ્વિકીર્ણં ચ શુભદં રોગદોષહૃત્ ।
કુર્વંત્યત્ર વિશેષેણ યે સ્નાનં સર્વદા કલૌ

તે નરાઃ પુણ્યભાજો હિ જાયંતે નાત્ર સંશયઃ ।
ગયાતીર્થસમં તીર્થં વિકીર્ણં પાવનં પરમ્ ।
પિતૄણાં પુણ્યદં નિત્યં લોકાનાં દુઃખનાશનમ્

ઇતિ વિકીર્ણતીર્થમ્ ।
તીર્થાદસ્માત્પરં તીર્થં શ્વેતોદ્ભવમનુત્તમમ્ ।
યત્ર શ્વેતા નદી જાતા મત્પૃષ્ઠોદરભસ્મના

વિશ્રુતા ત્રિષુ લોકેષુ સર્વપાપપ્રણાશિની ।
હરાંગભસ્મસંયોગાત્જાતા દેવૈસ્તુ માનિતા

તસ્યાં સ્નાતઃ શુચિર્દાંતસ્ત્રિરાત્રમુષિતઃ પુમાન્ ।
મહાકાલેશ્વરં દૃષ્ટ્વા રુદ્રલોકે મહીયતે

પિંડં પિતૃભ્યો યો દદ્યાત્તસ્યાસ્તીરે કુશૈસ્તિલૈઃ ।
સુતૃપ્તાઃ પિતરસ્તસ્ય ભવંતીતિ ન સંશયઃ

શ્વેતગંગામહાપુણ્યા દુઃખદારિદ્ર્યમોચની ।
યત્ર સ્નાનેન ભો દેવિ પરં સુખમવાપ્યતે

તસ્યા વૈ સંગમે પુણ્યે નિત્યં તિષ્ઠામિ પાર્વતિ ।
યેઽત્ર દાનં પ્રકુર્વંતિ સ્નાનં ચ તત્ર સુંદરિ

તદનંતફલં તસ્ય ભવેદ્વૈ નાત્ર સંશયઃ ।
તત્ર ભૂતેશ્વરો દેવઃ સંગમે વસતે ધ્રુવમ્

તત્ર ધૂપં ચ દીપં ચ પુષ્પમારાર્તિકં તથા ।
યે કુર્વંતિ નરશ્રેષ્ઠાસ્તે નરાઃ પુણ્યરૂપિણઃ

બિલ્વદલં સમાદાય યો દદાતિ શિવોપરિ ।
વાંચ્છિતં લભતે નિત્યં શ્વેતાયાં શિવસંનિધૌ

ઇતિ શ્રીપાદ્મે મહાપુરાણે પંચપંચાત્સાહસ્ર્યાં સંહિતાયામુત્તરખંડે।
ઉમામહેશ્વરસંવાદે શ્વેતાતીર્થંનામ સપ્તત્રિંશાધિકશતતમોઽધ્યાયઃ