પદ્મ પુરાણ · અધ્યાય 6.136

પાર્વત્યુવાચ।
સાભ્રમત્યપિ યાન્દેશાન્નંદિકુંડાદ્વિનિઃસૃતા ।
ગચ્છંતી પાવયામાસ કાન્કાન્દેશાન્વદસ્વ મે ।
ચકાર કાનિ તીર્થાનિ વિલંઘ્યાર્બુદપર્વતમ્

સૂત ઉવાચ।
ઇતિ તત્રોદિતે દેવ્યા મહાદેવઃ સ વિશ્વરાટ્ ।
ઉવાચ વચનં તાં વૈ પાર્વતીં વિશ્વમોહિનીમ્

મહાદેવ ઉવાચ।
નંદિકુંડાત્પ્રથમતઃ તીર્થાત્પરમપાવનાત્ ।
કપાલમોચનં તીર્થં મુનિભિઃ સંપ્રકારિતમ્

સર્વતેજોધિકં તીર્થં પાવનાત્પાવનં પરમ્ ।
અત્ર મયા પરિત્યક્તં કપાલં બ્રહ્મસંજ્ઞકમ્

કપાલમોચનં તીર્થમતો જાતં હિ પાર્વતિ ।
પાવનં સર્વભૂતાનાં પ્રકટં લોકવિશ્રુતમ્

કપાલકુંડમાખ્યાતં તત્તીર્થં તીર્થરાજકમ્ ।
યત્ર દેવાસ્તથા નાગા ગંધર્વાઃ કિંનરાદયઃ

નિવસંતિ મહાત્માનસ્તીર્થે વૈ નિર્મલે શુભે ।
ત્રૈલોક્યે વિશ્રુતં તીર્થં દાનદં મુક્તિદાયકમ્

તત્ર સ્નાત્વા શુચિર્ભૂત્વા કપાલેશં પ્રપૂજયેત્ ।
ઉપોષ્ય રજનીમેકાં કૃત્વા બ્રાહ્મણભોજનમ્

તત્રાપિ વસ્ત્રદાનેન અગ્નિહોત્રફલં લભેત્ ।
તસ્મિંસ્તીર્થે તુ યઃ કશ્ચિદ્દર્શનવ્રતમાસ્થિતઃ

સંત્યજ્ય દેહમાત્માનં શિવલોકં વ્રજેદ્ધ્રુવમ્ ।
અસ્મિંસ્તીર્થે પુરા સ્નાનાત્સૌદાસો બ્રહ્મહત્યયા

મોચિતો વિમલં જ્ઞાનં પ્રાપ્તવાન્વૈ સુરેશ્વરિ ।
ભાગીરથ્યાન્વયે જાતઃ સુદાસાખ્યો મહાબલી

તસ્ય પુત્રો મિત્રસહઃ સૌદાસેતિ ચ વિશ્રુતઃ ।
વસિષ્ઠશાપતઃ પ્રાપ્તઃ સૌદાસો રાક્ષસીં તનુમ્

સાભ્રમત્યાં કૃતસ્નાનો વિમુક્તઃ શાપજાદઘાત્ ।
અત્ર ગંગા ચ યમુના ગોદાવરી સરસ્વતી

નંદિતીર્થે વસંત્યેતાઃ પવિત્રાઃ પુણ્યદાઃ સદા ।
ગોદાનં ભૂમિદાનં ચ શય્યાદાનં તથૈવ ચ

કન્યાદાનં વિશેષેણ કર્તવ્યં જ્ઞાનિભિર્નરૈઃ ।
એતદ્દાનસમં પ્રોક્તં સાભ્રમત્યાવગાહનમ્

યત્ર વૈ સકલાન્યેવ પતિતાનીહ ભૂતલે ।
વારિણા સ્પર્શમાત્રેણ શુદ્ધત્વં યાંતિ તાન્યપિ

અત્ર શ્રાદ્ધં પ્રકુર્વાણો નરો વૈ ભક્તિતત્પરઃ ।
પિતરસ્તસ્ય સંતુષ્ટા ગચ્છંતિ પરમં પદમ્

એતદાખ્યાનકં દિવ્યં યે શૃણ્વંતિ નરાઃ સદા ।
સર્વપાપવિનિર્મુક્તા વિષ્ણોઃ સાયુજ્યમાપ્નુયુઃ

કર્મણા મનસા વાચા યે સ્તુવંતિ મહેશ્વરમ્ ।
ન તેષાં વિદ્યતે દુઃખં યાવદાભૂતસંપ્લવમ્

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમા।
મહેશ્વરસંવાદે નંદિતીર્થમહિમાનામ ષટ્ત્રિંશાધિકશતતમોઽધ્યાયઃ