પદ્મ પુરાણ · અધ્યાય 6.107

ધર્મદત્ત ઉવાચ।
વિલયં યાંતિ પાપાનિ તીર્થદાનવ્રતાદિભિઃ ।
પ્રેતદેહસ્થિતાયાસ્તે તેષુ નૈવાધિકારિતા

ત્વદ્ગ્લાનિદર્શનાદસ્માત્ખિન્નં ચ મમ માનસમ્ ।
નૈવ નિર્વૃતિમાયાતિ ત્વામનુદ્ધૃત્ય દુઃખિતામ્

પાતકં ચ તવાત્યુગ્રં યોનિત્રયવિપાકદમ્ ।
નૈવાન્યૈઃ ક્ષીયતે પુણ્યૈઃ પ્રેતત્વં ચાતિગર્હિતમ્

તસ્માદાજન્મજનિતં યન્મયા કાર્તિકવ્રતમ્ ।
તત્પુણ્યસ્યાર્દ્ધભાગેન સદ્ગતિં ત્વમવાપ્નુહિ

કાર્તિકવ્રતપુણ્યેન ન સામ્યં યાંતિ સર્વથા ।
યજ્ઞદાનાનિ તીર્થાનિ વ્રતાન્યપિ યતો ધ્રુવમ્

નારદ ઉવાચ।
ઇત્યુક્ત્વા ધર્મદત્તોઽસૌ યાવત્તામભ્યષેચયત્ ।
તુલસીમિશ્રતોયેન શ્રાવયન્દ્વાદશાક્ષરમ્

તાવત્પ્રેતત્વનિર્મુક્તા જ્વલદગ્નિશિખોપમા ।
દિવ્યવપુર્ધરા જાતા લાવણ્યાદ્ભાસિતા દિશઃ

તતઃ સા દંડવદ્ભૂમૌ પ્રણનામાથ તં દ્વિજમ્ ।
ઉવાચ ચ તદા વાક્યં હર્ષગદ્ગદભાષિણી

કલહોવાચ।
ત્વત્પ્રસાદાદ્દિવજશ્રેષ્ઠ વિમુક્તા નિરયાદહમ્ ।
પાપાબ્ધૌ મઞ્જમાનાયાસ્ત્વં નો ભૂતોઽસિ મે ધ્રુવમ્

નારદ ઉવાચ।
ઇત્થં સા વદતી વિપ્રં દદર્શાયાતમંબરાત્ ।
વિમાનં ભાસ્વરં યુક્તં વિષ્ણુરૂપધરૈર્ગણૈઃ

અથ સા તદ્વિમાનાગ્ર્યદ્વાસ્થાભ્યામધિરોહિતા ।
પુણ્યશીલસુશીલાભ્યામપ્સરોગણસેવિતમ્

તદ્વિમાનં તદાપશ્યદ્ધર્મદત્તઃ સવિસ્મયઃ ।
પપાત દંડવદ્ભૂમૌ દૃષ્ટ્વા તૌ પુણ્યરૂપિણૌ

પુણ્યશીલસુશીલૌ તમુત્થાપ્ય પ્રણતં દ્વિજમ્ ।
અભ્યનંદયતાં વાક્યમૂચતુર્દ્ધર્મશાલિનૌ

ગણા ઊચતુઃ ।
સાધુસાધુ દ્વિજશ્રેષ્ઠ યસ્ત્વં વિષ્ણુરતઃ સદા ।
દીનાનુકંપી ધર્મજ્ઞો વિષ્ણુવ્રતપરાયણઃ

આજન્મસચ્છુભં હ્યેતદ્યત્ત્વયા કાર્ત્તિકવ્રતમ્ ।
કૃતં તસ્યાર્દ્ધદાનેન યદસ્યાઃ પૂર્વસંચિતમ્

જન્માંતરશતોદ્ભૂતં પાપં તદ્વિલયં ગતમ્ ।
હરિજાગરણાદ્યૈશ્ચ વિમાનમિદમાગમત્

વૈકુણ્ઠભવનં વિષ્ણોઃ સાન્નિધ્યં ચ સ્વરૂપતા ।
તે ધન્યાઃ કૃતકૃત્યાસ્તે તેષાં ચ સફલો ભવઃ

યૈર્ભક્ત્યારાધિતો વિષ્ણુર્ધર્મદત્તત્વયા યથા ।
સમ્યગારાધિતો વિષ્ણુઃ કિં ન યચ્છતિ દેહિનામ્

ઔત્તાનચરણિર્યેન ધ્રુવત્વે સ્થાપિતઃ પુરા ।
યન્નામસ્મરણાદેવ દેહિનો યાંતિ સદ્ગતિમ્

ગ્રાહગૃહીતો નાગેંદ્રો યન્નામસ્મરણાત્પુરા ।
વિમુક્તઃ સન્નિધિં પ્રાપ્તો જાતો યો જયસંજ્ઞકઃ

અતસ્ત્વયાર્ચિતો વિષ્ણુઃ સ્વસાન્નિધ્યં પ્રદાસ્યતિ ।
બહૂન્યબ્દસહસ્રાણિ ભાર્યાદ્વયયુતસ્ય તે

તતઃ પુણ્યક્ષયે જાતે યદા યાસ્યસિ ભૂતલે ।
સૂર્યવંશોદ્ભવો રાજા વિખ્યાતસ્ત્વં ભવિષ્યસિ

નામ્ના દશરથસ્તત્ર ભાર્યાદ્વયયુતઃ પુનઃ ।
તૃતીયં યાનયા ચાપિ યાતે પુણ્યાર્દ્ધભાગિની

તત્રાપિ તવ સાન્નિધ્યં વિષ્ણુર્યાસ્યતિ ભૂતલે ।
આત્માનં તવ પુત્રત્વે પ્રકલ્પ્યામરકાર્યકૃત્

તવાજન્મવ્રતાદસ્માદ્વિષ્ણુસંતુષ્ટિકારકાત્ ।
ન યજ્ઞા ન ચ દાનાનિ ન તીર્થાન્યધિકાનિ તે

ધન્યોઽસિ વિપ્રપ્રયતસ્ત્વયૈતદ્વ્રતં કૃતં તુષ્ટિકરં જગદ્ગુરોઃ ।
યદર્ધભાગાચ્ચ ફલાન્મુરારેઃ પ્રણીયતેસ્માભિરિયં સલોકતામ્

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે કાર્તિકમાહાત્મ્યે શ્રીકૃષ્ણસત્યભામાસંવાદે કલહોપાખ્યાનોનામ સપ્તાધિકશતતમોઽધ્યાયઃ