પદ્મ પુરાણ · અધ્યાય 6.102

નારદ ઉવાચ-
પતિતં વીરભદ્રં તુ દૃંષ્ટ્વા રુદ્રગણા ભયાત્ ।
આગતાસ્તે રણં હિત્વા ક્રોશમાના મહેશ્વરમ્

અથ કોલાહલં શ્રુત્વા ગણાનાં ચંદ્રશેખરઃ

અભ્યયાદ્વૃષમારૂઢઃ સંગ્રામં પ્રહસન્નિવ ।
રુદ્રમાયાં તમાલોક્ય સિંહનાદૈર્ગણાઃ પુનઃ

નિવૃત્તાઃ સંગરે દૈત્યાન્નિજઘ્નુઃ શરવૃષ્ટિભિઃ ।
દૈત્યાશ્ચ ભીષણં રુદ્રં દૃષ્ટ્વા સર્વે વિદુદ્રુવુઃ

કાર્ત્તિકવ્રતિનં દૃષ્ટ્વા પાતકાનીવ તદ્ભયાત્ ।
અથ જાલંધરો દૈત્યાન્વિદ્રુતાન્પ્રેક્ષ્ય સંગરે

રોષાદધાવચ્ચંડીશં મુંચન્બાણાન્સહસ્રશઃ ।
શુંભો નિશુંભોઽશ્વમુખઃ કાલનેમિર્બલાહકઃ

ખડ્ગરોમા પ્રચંડશ્ચ ઘસ્મરશ્ચ શિવં યયુઃ ।
બાણાંધકારસંચ્છન્નં દૃષ્ટ્વા ગણબલં શિવઃ

તદ્બાણજાલં વિચ્છિદ્ય સ્વબાણૈરાવૃણોન્નભઃ ।
દૈત્યાંશ્ચ બાણવાત્યાભિઃ પીડિતાનકરોત્તદા

પ્રચંડજાલબાણૌઘૈરપાતયત ભૂતલે ।
ખડ્ગરોમ્ણઃ શિરઃ કોપાત્તથા પરશુનાચ્છિનત્

બલાહકસ્ય ચ શિરઃ ખંટ્વાગેનાકરોદ્દ્વિધા ।
બદ્ધ્વા ચ ઘસ્મરં દૈત્યં પાશેનાભ્યહનાદ્ભુવિ

વૃષભેણ હતાઃ કેચિત્કેચિદ્બાણૈર્નિરાકૃતાઃ ।
ન શેકુરસુરાઃ સ્થાતું ગજાઃ સિંહાર્દિતા યથા

તતઃ કોપપરીતાત્મા વેગાદ્રુદ્રં જલંધરઃ ।
આહ્વયામાસ સમરે તીવ્રાશનિસમસ્વનઃ

જલંધર ઉવાચ-
યુધ્યસ્વાદ્ય મયા સાર્દ્ધં કિમેભિર્નિહિતૈસ્તવ ।
યચ્ચ કિંચિદ્બલં તેઽસ્તિ તદ્દર્શય જટાધર

નારદ ઉવાચ।
ઇત્યુક્ત્વા બાણસપ્તત્યા જઘાન વૃષભધ્વજમ્ ।
તાનપ્રાપ્તાન્શિતૈર્બાણૈશ્ચિચ્છેદ પ્રહસન્નિવ

તતો હયાન્ધ્વજં છત્રં ધનુશ્ચિચ્છેદ સપ્તભિઃ ।
સચ્છિન્નધન્વા વિરથો ગદામાદાય વીર્યવાન્

અભ્યધાવચ્છિવસ્તાવદ્ગદાબાણૈર્દ્વિધાકરોત્ ।
તથાપિ મુષ્ટિમુદ્યમ્ય યયૌ રુદ્રજિઘાંસયા

તાવચ્છિવેન બાણૌઘૈઃ ક્રોશમાત્રમપાકૃતઃ ।
તતો જાલંધરો દૈત્યો મત્વા રુદ્રં બલાધિકમ્

સસર્જ માયાં ગાંધર્વીમદ્ભુતાં રુદ્રમોહિનીમ્ ।
તતો જગુશ્ચ નનૃતુર્ગંધર્વાપ્સરસાંગણાઃ

તાલવેણુમૃદંગાંશ્ચ વાદયંતઃ પરસ્પરમ્ ।
તં દૃષ્ટ્વા મહદાશ્ચર્યં રુદ્રો નાદવિમોહિતઃ

પતિતાન્યપિ શસ્ત્રાણિ કરેભ્યો ન વિવેદ સઃ ।
એકાગ્રભૂતમાલોક્યરુદ્રં દૈત્યો જલંધરઃ

કામાર્ત્તઃ સઞ્જગામાશુ યત્ર ગૌરી સ્થિતાભવત્ ।
યુદ્ધે શુંભનિશુંભાખ્યૌ સ્થાપયિત્વા મહાબલૌ

દશદોર્દંડપંચાસ્યસ્ત્રિનેત્રશ્ચ જટાધરઃ ।
મહાવૃષભમારૂઢઃ સ બભૂવ જલંધરઃ

અથ રુદ્રં સમાયાંતમાલોક્ય ભવવલ્લભા ।
અભ્યાયયૌ સખીમધ્યાત્તદ્દર્શનપથેઽભવત્

યાવદ્દદર્શ ચાર્વગીં પાર્વતીં દનુજેશ્વરઃ ।
તાવત્સ વીર્યં મુમુચે જડાંગશ્ચાભવત્તદા

અથ જ્ઞાત્વા તદા ગૌરી દાનવં ભયવિહ્વલા ।
જગામાંતર્હિતા તાવત્સા તદોત્તરમાનસમ્

તામદૃષ્ટ્વા તદા દૈત્યઃ ક્ષણાદ્વિદ્યુલ્લતામિવ ।
જવેનાયાત્પુનર્યુદ્ધં યત્ર દેવો વૃષધ્વજઃ

પાર્વત્યપિ મહાવિષ્ણું સસ્માર મનસા તદા ।
તાવદ્દદર્શ તં દેવી સોપવિષ્ટં સમીપગમ્

પાર્વત્યુવાચ।
વિષ્ણો જલંધરો દૈત્યઃ કૃતવાન્પરમાદ્ભુતમ્ ।
તત્કિં ન વિદિતં તેઽસ્તિ ચેષ્ટિતં તસ્ય દુર્મતેઃ

શ્રીભગવાનુવાચ-
તેનૈવ દર્શિતઃ પંથા વયમપ્યન્વયામહે ।
નાન્યથા સ ભવેદ્વધ્યઃ પાતિવ્રત્યાત્સુરક્ષિતઃ

નારદ ઉવાચ-
જગામ વિષ્ણુરિત્યુક્ત્વા પુનર્જાલંધરં પુરમ્ ।
અથ રુદ્રશ્ચ ગંધર્વાનુગતઃ સંગરે સ્થિતઃ

અંતર્દ્ધાનગતાં માયાં દૃષ્ટ્વા તુ બુબુધે તદા ।
તતઃ શિવો વિસ્મિતમાનસઃ પુનર્જગામ યુદ્ધાય જલંધરં રુષા

સ ચાપિ દૈત્યઃ પુનરાગતં શિવં દૃષ્ટ્વા શરૌઘૈઃ સમવાકિરદ્રણે

ઇતિ શ્રીપાદ્મે મહાપુરાણે પંચપંચાશત્સહસ્રસંહિતાયામુત્તરખંડે કાર્ત્તિકમાહાત્મ્યે શ્રીકૃષ્ણસત્યભામાસંવાદે દૈત્યકપટવર્ણનોનામ દ્વ્યધિકશતતમોઽધ્યાયઃ