પદ્મ પુરાણ · અધ્યાય 6.101

નારદ ઉવાચ-
તે ગણાધિપતીન્દૃષ્ટ્વા નંદીભમુખષણ્મુખાન્ ।
અમર્ષાદભ્યધાવંત દ્વંદ્વયુદ્ધાય દાનવાઃ

નંદિનં કાલનેમિશ્ચ શુંભો લંબોદરં તથા ।
નિશુંભઃ ષણ્મુખં વેગાદભ્યધાવત દંશિતઃ

નિશુંભઃ કાર્તિકેયસ્ય મયૂરં પંચભિઃ શરૈઃ ।
હૃદિ વિવ્યાધ વેગેન મૂર્છિતઃ સ પપાત ચ

તતઃ શક્તિધરઃ શક્તિં યાવજ્જગ્રાહ રોષિતઃ ।
તાવન્નિશુંભો વેગેન સ્વશક્ત્યા તમપાતયત્

તતો નંદીશ્વરો બાણૈઃ કાલનેમિમવિધ્યત ।
સપ્તભિશ્ચ હયાન્કેતૂંસ્ત્રિભિઃ સારથિમચ્છિનત્

કાલનેમિસ્તુ સંક્રુદ્ધો ધનુશ્ચિચ્છેદ નંદિનઃ ।
તદપાસ્ય સશૂલેન તં વક્ષસ્ય હનદ્દૃઢમ્

સશૂલભિન્નહૃદયો હતાશ્વો હતસારથિઃ ।
અદ્રેઃ શિખરમામુચ્ય શૈલાદ્રિં સોઽપ્યપાતયત્

અથ શુંભો ગણેશશ્ચ રથમૂષકવાહનૌ ।
યુધ્યમાનૌ શરવ્રાતૈઃ પરસ્પરમવિધ્યતામ્

અથ શુંભં ગણાધ્યક્ષો હૃદિ વિવ્યાધ પત્રિણા ।
સારથિં પંચભિર્બાણૈઃ પાતયામાસ ભૂતલે

તતઃ શુંભોઽતિક્રુદ્ધોઽપિ બાણષષ્ટ્યા ગણાધિપમ્ ।
મૂષકં ચ ત્રિભિર્વિદ્ધ્વા નનાદ જલદસ્વનઃ

મૂષકઃ શરભિન્નાંગશ્ચચાલ કૃતવેદનઃ ।
લંબોદરઃ સમુત્તીર્ય પદાતિરભવન્નૃપ

તતો લંબોદરઃ શુંભં હત્વા પરશુના હૃદિ ।
અપાતયત્તદા ભૂમૌ મૂષકં ચારુહત્પુનઃ

કાલનેમિર્નિશુંભશ્ચ ઉભૌ લંબોદરં શરૈઃ ।
યુગપજ્જઘ્નતુઃ કોપાત્તોત્રેણેવ મહાદ્વિપમ્

તં પીડ્યમાનમાલોક્ય વીરભદ્રો મહાબલઃ ।
અભ્યધાવત વેગેન ભૂતકોટિયુતસ્તદા

કૂષ્માંડા ભૈરવાશ્ચાપિ વેતાલા યોગિનીગણાઃ ।
પિશાચા યોગિનીસંઘા ગણાશ્ચાપિ તમન્વયુઃ

તતઃ કિલકિલાશબ્દૈઃ સિંહનાદૈઃ સઘુર્ઘુરૈઃ ।
વિનાદિતા ડમરુકૈઃ પૃથિવી સમકંપત

તતો ભૂતાનિ ધાવંતિ ભક્ષયંતિ સ્મ દાનવાન્ ।
ઉત્પતંતિ પતંતિ સ્મ નનૃતુશ્ચરણાંગણે

નંદી ચ કાર્તિકેયશ્ચ સમાયાતૌ ત્વરાન્વિતૌ ।
નિજઘ્નતૂ રણે દૈત્યાન્નિરંતર શરવ્રજૈઃ

છિન્નભિન્નાહ તૈર્દૈત્યૈઃ પાતિતૈર્ભર્ત્સિતૈસ્તથા ।
વ્યાકુલા સા ભવત્સેના વિષણ્ણવદના તદા

પ્રવિધ્વસ્તાં તતઃ સેનાં દૃષ્ટ્વા સાગરનંદનઃ ।
રથેનાતિપતાકેન ગણાનભિયયૌ બલી

હસ્ત્યશ્વરથસંહ્રાદઃ શંખભેરીરવસ્તદા ।
અભવત્સિંહનાદશ્ચ સેનયોરુભયોસ્તદા

જાલંધરશરવ્રાતૈર્નીહારપટલૈરિવ ।
દ્યાવાપૃથિવ્યોરાચ્છન્નમંતરં સમપદ્યત

ગણેશં પંચભિર્વિધ્વા શૈલાદ્રિમપિ પંચભિઃ ।
વીરભદ્રં ચ વિંશત્યા નનાદ જલદસ્વનઃ

કાર્તિકેયસ્તતો દૈત્યં શક્ત્યા વિવ્યાધ સત્વરઃ ।
વ્યાઘૂર્ણઃ શક્તિનિર્ભિન્નઃ કિંચિદ્વ્યાકુલમાનસઃ

તતઃ ક્રોધપરીતાક્ષઃ કાર્તિકેયં જલંધરઃ ।
ગદયા તાડયામાસ સ ચ ભૂમિતલેઽપતત્

તથૈવ નંદિનં વેગાદપાતયત ભૂતલે ।
તતો ગણેશ્વરઃ ક્રુદ્ધો ગદાં પરશુનાચ્છિનત્

વીરભદ્રસ્ત્રિભિર્બાણૈર્હૃદિ વિવ્યાધ દાનવમ્ ।
સપ્તભિશ્ચ હયાન્કેતૂન્ધનુશ્છન્નં ચ ચિચ્છિદે

તતોઽતિક્રુદ્ધો દૈત્યેંદ્રઃ શક્તિમુદ્યમ્ય દારુણામ્ ।
ગણેશં પાતયામાસ રથમન્યં સમારુહત્

અભ્યયાદથ વેગેન વીરભદ્રં રુષાન્વિતઃ ।
તતસ્તૌ સૂર્યસંકાશૌ યુયુધાતે પરસ્પરમ્

વીરભદ્રસ્તસ્ય હયાંસ્તથા બાણૈરપાતયત્ ।
ધનુશ્ચિચ્છેદ દૈત્યેંદ્રો યુયુધે પરિઘાયુધઃ

સ વીરભદ્રં ત્વરયાભિગમ્ય જઘાન દૈત્યઃ પરિઘેન મૂર્ધ્નિ ।
સ ચાપિ દૈત્યઃ પ્રવિભિન્નમૂર્દ્ધા પપાત ભૂમૌ રુધિરં સમુદ્ગિરન્

ઇતિ શ્રીપાદ્મે મહાપુરાણે પંચપંચાશત્સહસ્રસંહિતાયામુત્તરખંડે કાર્ત્તિકમાહાત્મ્યે શ્રીકૃષ્ણસત્યભામાસંવાદે દૈત્યસેનાપરાભવોનામ એકાધિકશતતમોઽધ્યાયઃ