પદ્મ પુરાણ · અધ્યાય 6.100

નારદ ઉવાચ-
જાલંધરસ્તુ તચ્છ્રુત્વા કોપાકુલિતવિગ્રહઃ ।
નિર્જગામાશુ દૈત્યાનાં કોટિભિઃ પરિવારિતઃ

ગતસ્તસ્યાગ્રતઃ શુક્રો રાહુર્દૃષ્ટિસ્થિતોઽભવત્ ।
મુકુટશ્ચાપતદ્ભૂમૌ વેગાત્પ્રસ્ખલિતસ્તદા

દૈત્યસૈન્યવૃતૈસ્તત્ર વિમાનાનાં શતૈસ્તદા ।
વ્યરાજત નભઃ પૂર્ણં પ્રાવૃષીવ બલાહકૈઃ

તસ્યોદ્યોગં તદા દૃષ્ટ્વા દેવાઃ શક્રપુરોગમાઃ ।
અલક્ષિતત્વરાજગ્મુઃ શૂલિનં તે વ્યજિજ્ઞપન્

દેવા ઊચુઃ ।
ન જાનાસિ કથં સ્વામિન્દેવા વિજ્ઞાપયંતિ ભો ।
તદસ્મદ્રક્ષણાર્થાય જહિ સાગરનંદનમ્

નારદ ઉવાચ-
ઇતિ દેવવચઃ શ્રુત્વા પ્રહસ્ય વૃષભધ્વજઃ ।
મહાવિષ્ણું સમાહૂય વચનં ચેદમબ્રવીત્

ઈશ્વર ઉવાચ-
જાલંધરઃ કથં વિષ્ણો ન હતઃ સંગરે ત્વયા ।
તદ્ભયાચ્ચાપયાતોઽસિ ત્યક્ત્વા વૈકુંઠમાત્મનઃ

ભગવાનુવાચ-
તવાંશસંભવત્વાચ્ચ ભ્રાતૃત્વાચ્ચ તથા શ્રિયઃ ।
ન મયા નિહતઃ સંખ્યે ત્વમેનં જહિ દાનવમ્

ઈશ્વર ઉવાચ-
નાયમેભિર્મહાતેજાઃ શસ્ત્રાસ્ત્રૈર્વધ્યતે મયા ।
દેવૈઃ સર્વૈઃ સ્વતેજોંશઃ શસ્ત્રાર્થે દીયતાં મમ

નારદ ઉવાચ-
અથ વિષ્ણુમુખા દેવાઃ સ્વતેજાંસિ દદુસ્તદા ।
તાન્યેકત્વં ગતાનીશો દૃષ્ટ્વા તેજો મહાંસ્તદા

તેનાકરોન્મહાદેવઃ સહસા શસ્ત્રમુત્તમમ્ ।
ચક્રં સુદર્શનં નામ જ્વાલામાલાતિભીષણમ્

તેજઃશેષેણ ચ તદા વજ્રં ચ કૃતવાન્હરઃ ।
તાવજ્જલંધરો દૃષ્ટઃ કૈલાસતલભૂમિષુ

હસ્ત્યશ્વરથપત્તીનાં કોટીભિઃ પરિવારિતઃ ।
તં દૃષ્ટ્વા હર્ષિતાઃ સર્વે દેવા જગ્મુર્યથાગતમ્

ગણાશ્ચ સમનહ્યંત યુદ્ધાયાતિત્વરાન્વિતાઃ ।
નંદીભવક્ત્રસેનાનીમુખાઃ સર્વે શિવાજ્ઞયા

અવતેરુર્ગણાઃ સર્વે કૈલાસાદ્યુદ્ધદુર્મદાઃ ।
તતઃ સમભવદ્યુદ્ધં કૈલાસોપત્યકા ભુવિ

પ્રમથાધિપદૈત્યાનાં ઘોરં શસ્ત્રાસ્ત્રસંકુલમ્ ।
ભેરીમૃદંગશંખૌઘનિસ્વનૈર્વીરહર્ષણૈઃ

ગજાશ્વરથશબ્દૈશ્ચ નાદિતા ભૂર્વ્યકંપત ।
શક્તિતોમરબાણૌઘૈર્મુશલપ્રાસપટ્ટિશૈઃ

વ્યરાજત નભઃ પૂર્ણમુલ્કાભિરિવ સંવૃતમ્ ।
નિહતૈરથ નાગાશ્વૈઃ સર્વા ભૂમિર્વ્યરાજત

વજ્રાહતાશ્ચલશિરઃ શકલૈરિવ સંવૃતા ।
પ્રમથાહતદૈત્યૌઘૈર્દૈત્યાહતગણૈસ્તથા

વસાસૃઙ્માંસ પંકાદ્યૈર્ભૂરગમ્યાભવત્તદા ।
પ્રમથાહતદૈત્યૌઘાન્ભાર્ગવઃ સમજીવયત્

યુદ્ધે પુનઃ પુનશ્ચૈવ મૃતસંજીવની બલાત્ ।
તં દૃષ્ટ્વા વ્યાકુલીભૂત્વા ગણાઃ સર્વે ભયાર્દિતાઃ

શશંસુર્દેવદેવેશં તત્સર્વં શુક્રચેષ્ટિતમ્ ।
અથ રુદ્રમુખાત્કૃત્યા બભૂવાતીવ ભીષણા

તાલજંઘોદરી વક્રા સ્તનાપીડિતભૂરુહા ।
સા યુદ્ધભૂમિમાસાદ્ય ભક્ષયંતી મહાસુરાન્

ભાર્ગવં સ્વકરે ધૃત્વા જગામાંતર્હિતાભવત્ ।
વિધૃતં ભાર્ગવં દૃષ્ટ્વા દૈત્યસૈન્યગણાસ્તદા

પ્રમ્લાનવદના દર્પાન્નિજઘ્નુર્યુદ્ધદુર્મદાઃ ।
અથાભજ્યત દૈત્યાનાં સેના ગણભયાર્દિતા

વાયુવેગહતા યદ્વત્પ્રકીર્ણતૃણસંહતિઃ ।
ભગ્નાં ગતભયાત્સેનાં દૃષ્ટ્વા હર્ષં ગણા યયુઃ

નિશુંભશુંભસેનાન્યૌ કાલનેમિશ્ચ વીર્યવાન્ ।
ત્રયસ્તે વારયામાસુર્ગણસેનાં મહાબલાઃ

મુંચતઃ શરવર્ષાણિ પ્રાવૃષીવ બલાહકાઃ ।
તતો દૈત્યશરૌઘાસ્તે શલભાનામિવ વ્રજાઃ

રુરુધુઃ ખં દિશઃ સર્વા ગણસેનામકંપયન્ ।
ગણાઃ શરશતૈર્ભિન્ના રુધિરાસારવર્ષિણઃ

વસંતે કિંશુકાભાસા ન પ્રાજ્ઞાયત કિંચન ।
પતિતાઃ પાત્યમાનાશ્ચ છિન્નાભિન્નાસ્તદા ગણાઃ

ત્યક્ત્વા સંગ્રામભૂમિં તે સર્વેઽપિ વિમુખાભવન્

તતઃ પ્રભગ્નં સ્વબલં વિલોક્ય ગજાસ્યનંદીશ્વરકાર્તિકેયાઃ ।
ચિરાન્વિતા દૈત્યવરાન્પ્રસહ્ય નિવારયામાસુરમર્ષણાસ્તે

ઇતિ શ્રીપાદ્મે મહાપુરાણે પંચપંચાશત્સહસ્રસંહિતાયામુત્તરખંડે કાર્તિકમાહાત્મ્યે શ્રીકૃષ્ણસત્યભામાસંવાદે દૈત્યસેનાવધોનામ શતતમોઽધ્યાયઃ