પદ્મ પુરાણ · અધ્યાય 5.76

ઈશ્વર ઉવાચ-।
અત્ર શિશુપાલં નિહતં શ્રુત્વા દંતવક્ત્રઃ કૃષ્ણેન યોદ્ધું મથુરામાજગામ

કૃષ્ણસ્તુ તચ્છ્રુત્વા રથમારુહ્ય તેન સહ મથુરામાયયૌ

અથ તં હત્વા યમુનામુત્તીર્ય નંદવ્રજં ગત્વા પિતરાવભિવાદ્યાશ્વાસ્ય તાભ્યામાલિંગિતઃ સકલ ગોપવૃદ્ધાન્પરિષ્વજ્ય તાનાશ્વાસ્ય બહુવસ્ત્રાભરણાદિભિસ્તત્રસ્થાન્સર્વાન્સંતર્પયામાસ

કાલિંદ્યાઃ પુલિને રમ્યે પુણ્યવૃક્ષસમાકીર્ણે ગોપસ્ત્રીભિરહર્નિશં ક્રીડાસુખેન ત્રિરાત્રં તત્ર સમુવાસ

તત્ર સ્થલે નંદગોપાદયઃ સર્વે જનાઃ પુત્રદારસહિતાઃ પશુપક્ષિમૃગાદયોઽપિ વાસુદેવપ્રસાદેન દિવ્યરૂપધરા વિમાનસમારૂઢાઃ પરમં લોકં વૈકુંઠમવાપુઃ

શ્રીકૃષ્ણસ્તુ નંદગોપવ્રજૌકસાં સર્વેષાં નિરામયં સ્વપદં દત્વા દેવગણૈઃ સ્તૂયમાનઃ।
શ્રીમતીં દ્વારાવતીં વિવેશ

તત્ર વસુદેવોગ્રસેનસંકર્ષણપ્રદ્યુમ્નાનિરુદ્ધાક્રૂરાદિભિઃ પ્રત્યહં સંપૂજિતઃ ષોડશસહસ્રાષ્ટાધિકમહિષીભિશ્ચ વિશ્વરૂપધરો દિવ્યરત્નમય લતાગૃહાંતરે-।
ષુ સુરતરુકુસુમાર્ચિતશ્લક્ષ્ણતરપર્યંકેષુ રમયામાસ

એવં હિતાર્થાય સર્વદેવાનાં સમસ્તભૂભારવિનાશાય યદુવંશેઽવતીર્ય સકલરાક્ષસવિનાશં કૃતમહાંતમુર્વીભારં નાશયિત્વા નંદવ્રજદ્વારિકાવાસિનઃ સ્થાવરજંગમાન્ભવબંધનાન્મોચયિત્વા પરમે શાશ્વતે યોગિધ્યેયે રમ્યે ધામ્નિ સંસ્થાપ્ય નિત્યં દિવ્યમહિષ્યાદિભિઃ સંસેવ્યમાનો વાસુદેવોઽખિલેષૂવાચ

અસીદવ્યાકૃતં બ્રહ્મકરકાઘૃતયોરિવ ।
પ્રકૃતિસ્થો ગુણાન્મુક્તો દ્રવીભૂત્વા દિવં ગતઃ

ઇતિ શ્રીપદ્મપુરાણે પાતાલખંડે વૃંદાવનમહાત્મ્યે પાર્વતી-શિવસંવાદે ષટ્સપ્તતિતમોઽધ્યાયઃ