Padma Purana · Chapter 5.76

īśvara uvāca-/
atra śiśupālaṃ nihataṃ śrutvā daṃtavaktraḥ kṛṣṇena yoddhuṃ mathurāmājagāma

kṛṣṇastu tacchrutvā rathamāruhya tena saha mathurāmāyayau

atha taṃ hatvā yamunāmuttīrya naṃdavrajaṃ gatvā pitarāvabhivādyāśvāsya tābhyāmāliṃgitaḥ sakala gopavṛddhānpariṣvajya tānāśvāsya bahuvastrābharaṇādibhistatrasthānsarvānsaṃtarpayāmāsa

kāliṃdyāḥ puline ramye puṇyavṛkṣasamākīrṇe gopastrībhiraharniśaṃ krīḍāsukhena trirātraṃ tatra samuvāsa

tatra sthale naṃdagopādayaḥ sarve janāḥ putradārasahitāḥ paśupakṣimṛgādayo'pi vāsudevaprasādena divyarūpadharā vimānasamārūḍhāḥ paramaṃ lokaṃ vaikuṃṭhamavāpuḥ

śrīkṛṣṇastu naṃdagopavrajaukasāṃ sarveṣāṃ nirāmayaṃ svapadaṃ datvā devagaṇaiḥ stūyamānaḥ/
śrīmatīṃ dvārāvatīṃ viveśa

tatra vasudevograsenasaṃkarṣaṇapradyumnāniruddhākrūrādibhiḥ pratyahaṃ saṃpūjitaḥ ṣoḍaśasahasrāṣṭādhikamahiṣībhiśca viśvarūpadharo divyaratnamaya latāgṛhāṃtare-/
ṣu suratarukusumārcitaślakṣṇataraparyaṃkeṣu ramayāmāsa

evaṃ hitārthāya sarvadevānāṃ samastabhūbhāravināśāya yaduvaṃśe'vatīrya sakalarākṣasavināśaṃ kṛtamahāṃtamurvībhāraṃ nāśayitvā naṃdavrajadvārikāvāsinaḥ sthāvarajaṃgamānbhavabaṃdhanānmocayitvā parame śāśvate yogidhyeye ramye dhāmni saṃsthāpya nityaṃ divyamahiṣyādibhiḥ saṃsevyamāno vāsudevo'khileṣūvāca

asīdavyākṛtaṃ brahmakarakāghṛtayoriva /
prakṛtistho guṇānmukto dravībhūtvā divaṃ gataḥ

iti śrīpadmapurāṇe pātālakhaṃḍe vṛṃdāvanamahātmye pārvatī-śivasaṃvāde ṣaṭsaptatitamo'dhyāyaḥ