પદ્મ પુરાણ · અધ્યાય 5.32

સુમતિરુવાચ।
અસાવપિ નૃપઃ સૌમ્ય સત્યવાન્નામ વિશ્રુતઃ ।
નિજધર્મેણ લોકેશં રઘુનાથમતોષયત્

અસ્મૈ તુષ્ટો રમાનાથો દદૌ ભક્તિમચંચલામ્ ।
નિજાંઘ્રિપદ્મે યજતાં દુર્લભાં પુણ્યકોટિભિઃ

નિત્યં શ્રીરઘુનાથસ્ય કથાનકમનાતુરઃ ।
કુરુતે સર્વલોકાનાં પાવનં કૃપયાયુતઃ

યો ન પૂજયતે દેવં રઘુનાથં રમાપતિમ્ ।
સ તેન તાડ્યતે દંડૈર્યમસ્યાપિ ભયાવહૈઃ

અષ્ટમાદ્વત્સરાદૂર્ધ્વમશીતિવત્સરો ભવેત્ ।
તાવદેકાદશી સર્વૈર્માનુષૈઃ કારિતાઽમુના

તુલસી વલ્લભા યસ્ય કદાચિદ્યચ્છિરોધરામ્ ।
ન મુંચતિ રમાનાથ પાદપદ્મસ્રગુત્તમા

ઋષીણામપિ પૂજ્યોયમિતરેષાં કથં નહિ ।
રઘુનાથસ્મૃતિપ્રીતિર્ધૂતપાપ્મા હતાશુભઃ

જ્ઞાત્વાયં રામચંદ્રસ્ય વાજિનં પરમાદ્ભુતમ્ ।
આગત્ય તુભ્યં સંદાસ્યત્યેતદ્રાજ્યમકંટકમ્

ત્વયા યદ્ગદિતં રાજંસ્તત્તે કથિતમુત્તમમ્ ।
પુનઃ કિં પૃચ્છસે સ્વામિન્નાજ્ઞાપય કરોમિ તત્

શેષ ઉવાચ।
ગતોઽશ્વસ્તત્પુરાંતસ્તુ નાનાશ્ચર્યસમન્વિતઃ ।
તં દૃષ્ટ્વા જનતાઃ સર્વા રાજ્ઞે ગત્વા ન્યવેદયન્

જનતા ઊચુઃ।
કોઽપ્યશ્વઃ સિતવર્ણેન ગંગાજલસમેન વૈ ।
ભાલે સૌવર્ણપત્રેણ રાજમાનઃ સમાગતઃ

તચ્છ્રુત્વા વચનં રમ્યં જનાનાં હૃદ્યમીરિતમ્ ।
તાઃ પ્રત્યાહ હસન્ભૂપો જ્ઞાયતાં કસ્ય વૈ હયઃ

તાશ્ચૈનં કથયામાસુઃ શત્રુઘ્નેન પ્રપાલિતઃ ।
આયાત્યશ્વો મહીભર્તૂ રામસ્ય પુરમધ્યતઃ

રામસ્ય નામ સ શ્રુત્વા દ્વ્યક્ષરં સુમનોરમમ્ ।
જહર્ષ ચિત્તે સુભૃશં ગદ્ગદસ્વરચિન્હિતઃ

મયાયોધ્યાપતિર્નિત્યં યો રામશ્ચિન્ત્યતે હૃદિ ।
તસ્યાશ્વઃ સહશત્રુઘ્નઃ સમાયાતઃ પુરં મમ

હનૂમાંસ્તત્ર રામાંઘ્રિસેવાકર્તા ભવિષ્યતિ ।
કદાચિદપિ યો રામં ન વિસ્મરતિ માનસે

ગચ્છામિ યત્ર શત્રુઘ્નો યત્ર મારુતનંદનઃ ।
અન્યેઽપિ યત્ર પુરુષા રામપાદાબ્જસેવકાઃ

અમાત્યમાદિદેશાથ સર્વં રાજધનં મહત્ ।
ગૃહીત્વા તુ મયા સાર્દ્ધમાગચ્છ ત્વરયા યુતઃ

યાસ્યેઽહં રઘુનાથસ્ય હયં પાલયિતું વરમ્ ।
કર્તું ચ રામપાદાબ્જપરિચર્યાં સુદુર્લભામ્

ઇત્યુક્ત્વા નિર્જગામાથ શત્રુઘ્નં પ્રતિ સૈનિકૈઃ ।
તાવત્પુરીમથ પ્રાપ્તો રામભ્રાતા સસૈનિકઃ

વીરા ગર્જંતિ પ્રબલા રથાઃ સુનિનદંતિ ચ ।
જયશંખસ્વનાસ્તત્ર વેણુનાદાશ્ચ સર્વતઃ

આગત્ય સત્યવાન્રાજા મંત્રિભિઃ સુસમન્વિતઃ ।
ચરણે પ્રણિપત્યાસ્મૈ રાજ્યં પ્રાદાન્મહાધનમ્

શત્રુઘ્નસ્તં તુ રાજાનં જ્ઞાત્વા રામમનુવ્રતમ્ ।
તદ્રાજ્યં તસ્ય પુત્રાય રુક્મનામ્ને દદૌ મહત્

હનૂમંતં પરીરભ્ય સુબાહું રામસેવકમ્ ।
અન્યાન્વૈ રામભક્તાંશ્ચ પરિરભ્ય મહાયશાઃ

કૃતાર્થમિવ ચાત્માનં મેને સત્યસમન્વિતઃ ।
નનંદ ચેતસિ તદા શત્રુઘ્નેન સમન્વિતઃ

હયસ્તાવદ્ગતો દૂરં વીરૈઃ સુપરિરક્ષિતઃ ।
શત્રુઘ્નસ્તેન ભૂપેન યયૌ વીરસમન્વિતઃ

ઇતિ શ્રીપદ્મપુરાણે પાતાલખંડે શેષવાત્સ્યાયનસંવાદે રામાશ્વમેધે સત્યવત્સમાગમોનામ દ્વાત્રિંશોઽધ્યાયઃ