Padma Purana · Chapter 5.32

sumatiruvāca/
asāvapi nṛpaḥ saumya satyavānnāma viśrutaḥ /
nijadharmeṇa lokeśaṃ raghunāthamatoṣayat

asmai tuṣṭo ramānātho dadau bhaktimacaṃcalām /
nijāṃghripadme yajatāṃ durlabhāṃ puṇyakoṭibhiḥ

nityaṃ śrīraghunāthasya kathānakamanāturaḥ /
kurute sarvalokānāṃ pāvanaṃ kṛpayāyutaḥ

yo na pūjayate devaṃ raghunāthaṃ ramāpatim /
sa tena tāḍyate daṃḍairyamasyāpi bhayāvahaiḥ

aṣṭamādvatsarādūrdhvamaśītivatsaro bhavet /
tāvadekādaśī sarvairmānuṣaiḥ kāritā'munā

tulasī vallabhā yasya kadācidyacchirodharām /
na muṃcati ramānātha pādapadmasraguttamā

ṛṣīṇāmapi pūjyoyamitareṣāṃ kathaṃ nahi /
raghunāthasmṛtiprītirdhūtapāpmā hatāśubhaḥ

jñātvāyaṃ rāmacaṃdrasya vājinaṃ paramādbhutam /
āgatya tubhyaṃ saṃdāsyatyetadrājyamakaṃṭakam

tvayā yadgaditaṃ rājaṃstatte kathitamuttamam /
punaḥ kiṃ pṛcchase svāminnājñāpaya karomi tat

śeṣa uvāca/
gato'śvastatpurāṃtastu nānāścaryasamanvitaḥ /
taṃ dṛṣṭvā janatāḥ sarvā rājñe gatvā nyavedayan

janatā ūcuḥ/
ko'pyaśvaḥ sitavarṇena gaṃgājalasamena vai /
bhāle sauvarṇapatreṇa rājamānaḥ samāgataḥ

tacchrutvā vacanaṃ ramyaṃ janānāṃ hṛdyamīritam /
tāḥ pratyāha hasanbhūpo jñāyatāṃ kasya vai hayaḥ

tāścainaṃ kathayāmāsuḥ śatrughnena prapālitaḥ /
āyātyaśvo mahībhartū rāmasya puramadhyataḥ

rāmasya nāma sa śrutvā dvyakṣaraṃ sumanoramam /
jaharṣa citte subhṛśaṃ gadgadasvaracinhitaḥ

mayāyodhyāpatirnityaṃ yo rāmaścintyate hṛdi /
tasyāśvaḥ sahaśatrughnaḥ samāyātaḥ puraṃ mama

hanūmāṃstatra rāmāṃghrisevākartā bhaviṣyati /
kadācidapi yo rāmaṃ na vismarati mānase

gacchāmi yatra śatrughno yatra mārutanaṃdanaḥ /
anye'pi yatra puruṣā rāmapādābjasevakāḥ

amātyamādideśātha sarvaṃ rājadhanaṃ mahat /
gṛhītvā tu mayā sārddhamāgaccha tvarayā yutaḥ

yāsye'haṃ raghunāthasya hayaṃ pālayituṃ varam /
kartuṃ ca rāmapādābjaparicaryāṃ sudurlabhām

ityuktvā nirjagāmātha śatrughnaṃ prati sainikaiḥ /
tāvatpurīmatha prāpto rāmabhrātā sasainikaḥ

vīrā garjaṃti prabalā rathāḥ suninadaṃti ca /
jayaśaṃkhasvanāstatra veṇunādāśca sarvataḥ

āgatya satyavānrājā maṃtribhiḥ susamanvitaḥ /
caraṇe praṇipatyāsmai rājyaṃ prādānmahādhanam

śatrughnastaṃ tu rājānaṃ jñātvā rāmamanuvratam /
tadrājyaṃ tasya putrāya rukmanāmne dadau mahat

hanūmaṃtaṃ parīrabhya subāhuṃ rāmasevakam /
anyānvai rāmabhaktāṃśca parirabhya mahāyaśāḥ

kṛtārthamiva cātmānaṃ mene satyasamanvitaḥ /
nanaṃda cetasi tadā śatrughnena samanvitaḥ

hayastāvadgato dūraṃ vīraiḥ suparirakṣitaḥ /
śatrughnastena bhūpena yayau vīrasamanvitaḥ

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe satyavatsamāgamonāma dvātriṃśo'dhyāyaḥ