પદ્મ પુરાણ · અધ્યાય 5.116

સૂત ઉવાચ-
સંધ્યાવંદનકર્મક્રિયતામિતિ રામો મુનિમાચષ્ટાયમ્ ।
ઉષ્ણદ્યુતિરપ્યસ્તમુપૈતિ દ્વિજકુલમેતન્નીડમુપૈતિ

સ્વયમપિ સંધ્યાવંદનકામોઽવ્રજદુત્તરદિશમુજ્ઝિતયાનઃ ।
હાહાહૂહૂકૃતસંગીતિર્બંદીપ્રમુખપ્રસ્તુતકીર્તિઃ

ગૌતમીતટમુપેત્ય રાઘવો વાયુનંદનસુધૌતપદ્યુગઃ ।
જાંબવત્કૃતકરાવલંબનઃ પ્રાપદુત્તમનદીં તુ ગૌતમીમ્

કરદ્વયે ધૃતકુશઃ સ રાઘવઃ પ્રાગમદ્વરુણદિશામથોત્તમામ્ ।
દત્વા તતોઽર્ઘત્રિતયં યથાવિધિ પ્રહૃષ્ટરોમાથ જજાપ સોંઽતરે

સંપ્રાર્થયિત્વા વરુણં યથાક્રમં શંભું વસિષ્ઠં પ્રણનામ રાઘવઃ ।
તાભ્યાં કૃતાશીરગમન્મનઃપદં હનૂમતા ક્ષાલિત પાદપંકજઃ ।
જુહાવ વહ્નીનથ બંદિમાગધૈઃ સંસ્તૂયમાનોઽથ વિનિર્યયૌ બહિઃ

પ્રહસચ્ચંદ્ર કિરણૈઃ સુધાલિપ્તમિવાંબરમ્ ।
પ્રસન્નતારાકુસુમં વિતાનમિવ સર્વતઃ

અથાગચ્છત્સૌધતલં વૃદ્ધામાત્યેન કલ્પિતમ્ ।
નાનાસનસમોપેતં સભાસ્થાનં યયૌ નૃપઃ

અથ મુનિં હ્યુપવેશ્ય સ રાઘવઃ સ્વયમપિ પ્રથમાસનમાભજત્ ।
કપિગણાઃ પરિતઃ પૃથુવિગ્રહા રચનયાસ્થિતિમાપ્રતિપેદિરે

સુખસ્થિતં નૃપમભિવીક્ષ્ય સ દ્વિજો વચસ્તદા સમુચિતમાહ શંભુઃ ।
ઇહસ્થિતો ભવતિ સમસ્તપૂજિતઃ કથં કથા નૃપવર વર્તતે ગુહાયામ્

આકર્ણ્યાથ રઘૂદ્વહો દ્વિજવચઃ શુશ્રૂષુરાસીત્કથાં ।
તત્રસ્થો નિપુણં નિવાર્યવચનં સર્વૈઃ શ્રુતં તત્ક્ષણાત્ ।
શુશ્રૂષામિ કથં મહાદ્ભુતતયા સ્વાત્માશ્રયામન્યથા ।
રક્ષોબાધનવાદિનીમથનૃપઃ કિંત્વેતદિત્યાહ ચ

કુંભશ્રોત્રવધઃ પુરા સમજનિ પ્રાપ્તો દશાસ્યો વધં ।
પશ્ચાદિત્યયમન્યથા વિરચિતં રામાયણં ભાષતે ।
કોઽયં વિપ્રવરઃ સમસ્તજનતા નાસ્તિક્ય સંપાદકો ।
રાજ્ઞાંસ્થાનમુપેત્ય વક્તિ સમયા દંડ્યોઽથ પૂજ્યોઽથવા

અથાહ જાંબવાનમું રઘૂત્તમં કથાં પ્રતિ ।
રામાયણં ન તાવકં ત્વિદં હિ કલ્પિતં મતમ્ ।
સમસ્તમત્ર વિસ્તરાદ્વદામિ દેવ તચ્છૃણુ ।
પંકેરુહસ્યસૂનુતો મયા શ્રુતં પુરાહ્યભૂત્

જાંબવંતં વિજ્ઞાપ્ય રામચંદ્રો વચનમાહ

શ્રીરામ ઉવાચ-
કીર્તય પુરાણં મે શુશ્રૂષુઃ કુતૂહલાદહં પ્રણીતં તત્કેન ચ વિજ્ઞાતમ્

જાંબવાનથ બભાષે હિ વિધાત્રે નમો નમસ્તથૈવ વિધુભૂષણકેશવાભ્યામ્

અથ પુરાતનં રામાયણં કથયામિ

યસ્ય શ્રવણેનાખિલજન્મસંપાદિત પાપક્ષયો જાયતે

અથ તથાપિ દશરથો દશરથસમાનરથી મહીયસા બલેન સુમાનસનામનગરજિગીષયા પંકેરુહસુતસુતં વસિષ્ઠમાહૂય નમસ્કૃત્વા મુનિદત્તાનુજ્ઞઃ શતાક્ષૌહિણીસેનયા સહારુહ્ય તુરંગમં ચંદ્ર સમાનશરીરમતિરોષસમાવિષ્ટો વિષ્ટરશ્રવસમારાધ્ય દંડયાત્રાં ચકાર

સાધ્યો નામ સ્વીયયા સેનયાવૃતો દશરથાભિમુખમાયયૌ યોદ્ધું યુદ્ધં ચાન્યોન્યમભૂત્

માસમેકં યુદ્ધં કૃત્વા દશરથસ્તં સાધ્યં જગ્રાહ

અથ સાધ્યસૂનુર્ભૂષણોનામાલ્પપરિવારો યુયુધે દશરથેન

દશરથોઽપિ સાધ્યસૂનું ભુવોભૂષણમવલોક્ય યોદ્ધુમેવ નૈચ્છત્

કથમેતાદૃશં હન્મિ ચાસ્મિન્હતેઽસ્ય કથં પિતા ભવિષ્યતિ કથં તન્માતા કથમપ્રૌઢયૌવનાપ્રિયાર્યા

અમુષ્ય હિ દેહે સમાલિંગનચુંબનપરિવર્તન નવીનતરદલારવિંદપદાનિ કુસુમાનીવ દૃશ્યંતે

એતત્સમાનવર્ણવયા એતાદૃશઃ સુભગઃ પરમપ્રીતિવર્દ્ધનોનામ પુત્રો ભલ્લૂકભક્ષિતોમૃતઃસ્મૃતિપથં પ્રાપ્યાપિ માં રક્ષયિતુમિચ્છતીવ મમ હૃદયમન્યથા કરોતિ ઇતિ મનસા વિતર્ક્યાતિબાલકં ગ્રહીતુમારભત્

સ ચ સાધ્યોપિ પરાધીનો બભૂવ

સ ચ કુમારેણ સહ પરાજય ખેદમપિ મત્વા સુખમધ્યુવાસ ચ

દશરથોઽપિ તત્ર માસં સ્થિત્વા તત્પુત્રસંદર્શનસુખમવલોક્યાચિંતયત્

અહો સર્વદુઃખાપનોદનક્ષમમેતન્મુખાવલોકનં પુત્રસંવર્દ્ધનંનામ સર્વરાષ્ટ્રિકો મમ જયઃ પુત્રવિયોગમનુસ્મરતો દુઃખાય કેવલં ભવતિ

તદસ્ય પૃચ્છાં કરોમિ કથમીદૃશો જાયતે પુત્ર ઇતિ વિતર્ક્ય તમપૃચ્છત્

સાધ્યોઽપિ સકલમોક્ષમાર્ગં ક્ષિતીશાયાદિશત્

હરીશાનૌ સહારાધ્ય સર્વૈકાદશીરુપોષ્ય દ્વાદશીષુ બ્રાહ્મણાનારાધ્ય તત્તત્કાલભવં ફલપૂર્વમન્નાદ્યં વ્યંજનં પુષ્પં ચ ન્યાયેન સંપાદ્ય કપિલાઘૃતેન કેશવં સ્નાપયિત્વા મુદ્ગચૂર્ણેન સંલિપ્ય સ્વાદૂદકેન સ્નાપયિત્વા સુરભિપાટીરં સ્વયમુદ્ઘૃષ્ટં મૃગનાભ્યાગુરુસારેણ વાસમેતં દેવાંગં સર્વમુપલિપ્ય તુલસીદલૈર્યૂથિકાકરવીરનીલોત્પલકમલ કોકનદદ્રો ણકુસુમ મરુવદમનક ગિરિકર્ણિકાકેતકીદલપૂર્વૈર્યથાસંભવમભ્યર્ચ્ય દ્વાદશાક્ષરેણ પુરુષસૂક્તેન વા નામ્ના ષોડશોપચારેણ વારાધ્ય પ્રણમ્ય નૃત્યં કૃત્વા દેવં ક્ષમાપયેત્

તથા વ્રતાનિ વિચિત્રાણિ નારાયણપ્રીણનાય કુર્ય્યાત્

પ્રસન્નો ભગવાન્મુનિરીપ્સિતં પુત્રં યચ્છતિ તદમુમારાધયસ્વેતિ દશરથમુક્તવાન્

સ ચાપિ સાધ્યં તત્ર સ્થાપ્ય ગત્વાયોધ્યાં તથા સર્વં કૃતવાન્

અથ પુત્રકામેષ્ટૌ સમાપ્તાયામાહવનીયાદ્યજ્ઞમૂર્તિઃ શંખચક્રગદાપાણિરુદતિષ્ઠત્ ।
રાજાનં ચ વરં વૃણીષ્વેત્યુક્તવાન્

સ ચ રાજા વવ્રે પુત્રાનતિધાર્મ્મિકાન્દીર્ઘાયુષશ્ચતુરોલોકોપકારકાન્દેહીતિ

અથ રાજમહિષ્યશ્ચતસ્રઃ કૌશલ્યા સુમિત્રા સુરૂપા સુવેષા ચેતિ

રાજાનમબ્રુવન્દેવ પ્રતિયોષમેકેન પુત્રેણ ભવિતવ્યમ્

અથ કૌશલ્યોવાચ એષ યદિ પ્રસન્નો દેવસ્તદાયમુત્પદ્યતાં મમ

રાજોવાચ-
મમ યદિષ્ટં તદયં પ્રાર્થ્યતે હરિઃ ।
વિષ્ણોપ્રસીદદેવેશ કમલાપતે શંખચક્રગદાધરવિભીષણસૃષ્ટિસમસ્તલોકપાલાદિપૂજિત પાદયુગલશાશ્વતહરે નમસ્તે નમસ્તે એવં સ્તુતો ભગવાનથ રાજાનમાહ

માધવ ઉવાચ-
તવ પુત્રો ભવિષ્યામિ કૌશલ્યાયામ્ ।
અથ ચરું પ્રાવિશદ્ધરિઃ ।
તં ચરું હિ ચતુર્ધા વિભજ્ય ભાર્ય્યાભ્યો દત્તવાન્

અથ કૌશલ્યાયાં રામો લક્ષ્મણઃ સુમિત્રાયાં સુરૂપાયાં ભરતઃ સુવેષાયાં શત્રુઘ્નો જજ્ઞે ખાત્પુષ્પવૃષ્ટિશ્ચ પપાત

અથ ચતુરાનનઃ સ્વયમુપેત્ય જાતકર્માદિકાઃ ક્રિયાશ્ચક્રે

ત્રિભુવનાભિરામતયા રામ ઇતિ નામ ચક્રે રૂપશૌર્ય્યાદિલક્ષ્મીયોગ્યતયા લક્ષ્મણ ઇત્યપરસ્ય ભુવં ભારાત્તારયતીતિ ભરતઃ શત્રૂન્હંતીતિ શત્રુઘ્ન ઇતિ નામાનિ કૃત્વા બ્રહ્મા સ્વભવનં જગામ શિશવશ્ચ વૃદ્ધિમીયુઃ

અથ પાદસંચારિણં બાલચંદ્ર સંકાશદર્શનં બિંબાધરમુન્નતતિલપ્રસૂનનાસં પુરશ્ચૂલિકાલંબમાન-રત્નપત્રકં શ્રવણલોલલંબમાનકુંડલં વક્ષઃસ્થલવિચલિત સ્થૂલમુક્તાહારં વિલસત્કાર્તસ્વરો બ-હ્વલયં સિંજન્મણિકંકણરત્નાંગુલીયકં હેમમણિરચિતશ્રોણિસૂત્રં સિંજન્નનૂપુરોપશોભિતપાદમંગુલીયોપશોભિતપાદમધ્યાંગુલીયકં વજ્રાંકુશસરોજલાંછનશોભિતોરુપાદતલં તૂણીરસદૃશ જંઘં કરિકરસદૃશોરું વિસ્તૃતજઘનં સૂક્ષ્મમધ્યંવર્તુલાવર્તકં ગંભીરનાભિમિંદ્રનીલશિલાવિશા-લ વક્ષઃસ્થલં કંબુગ્રીવંચંદ્રબિંબસદૃશવદનમર્દ્ધચંદ્ર સદૃશલલાટં નીલકુટિલકુંતલં ક્રોડાસક્તંધૂલિભિરાપાંડુરં ફુલ્લપદ્મદલારક્તવિલોલલોચનં મહેશ્વરમિવોદ્ધૂલિતભૂતિં મહેશ્વરમિવ દિગંબરં રામં કુમારં રાજા દશરથો દૃષ્ટ્વા હર્ષપરિપૂર્ણહૃદયઃ પુત્રમાલિંગ્ય ચુંબિત્વા વક્ષસ્યાલિલિંગ દૃઢમ્

અથ કુમારોપિ પાર્શ્વેનાસ્યાંકમારોપ્ય કલકલિતલોચનો યત્કિંચિદુવાચ

યાચમાનમિતસ્તતો વીક્ષમાણઃ તાત ગચ્છેશયે તાત ક્રીડામિ તાતેત્યાદિપુત્રસુખમનુભૂયાનુભૂય નિર્વૃતિં યયૌ

અથ કદાચિદ્ભોક્તુમાગતે રાજનિ રામચંદ્રો બાલક્રીડાસક્તહૃદયો બહુક્રીડનકરકમલ ઉત્પ્લુત્ય ધાવમાનો નરપતિપુરઃસ્થિતમણિખચિતસુવર્ણભાજનસ્થમન્નં વામકરેણ ગૃહીત્વા રાજનિ ચિક્ષેપ ઇદમપિ રાજા સુખાય મેને ।
એતાદૃશાન્યન્યાનિ ચકાર રામચંદ્રઃ

અથ કદાચિત્ક્રીડમાને રામે વાત્યા રામમપાતયદ્રામશ્ચ રુદન્નપતત્

એતસ્મિન્નંતરે બ્રહ્મરાક્ષસો રામમગૃહ્ણાદ્રામશ્ચ મૂર્ચ્છામાપ

અથ સહચરો બાલ ઇતસ્તતો રોરૂયમાણો રામં તથાવિધં રાજ્ઞે વ્યજ્ઞાપયત્

અથ રાજા રામમાદાય વસિષ્ઠમાહ કિમિદં રામસ્યેતિ પપ્રચ્છ

અથ વસિષ્ઠો ભસ્માદાયાભિમંત્ર્ય બ્રહ્મરાક્ષસં મોચયામાસ

પપ્રચ્છ કો ભવાનિતિ સ ચાહાહં વેદગર્વિતો બ્રાહ્મણો બહુશઃ પરધનમપહૃત્ય બ્રહ્મરાક્ષસો જાતો મે નિષ્કૃતિં વિચારય

વસિષ્ઠ ઉવાચ-
ઇદાનીમિતઃ પરમેકવર્ષશતોપભોગ્યં રાક્ષસત્વં નરકં ભાગીરથીસ્નાનમેકં શિવાય બિલ્વપત્રશતં સમર્પ્ય તતઃ સ્નાત્વા પાપાદ્વિમુક્તો ભવસીતિ

કદાચિત્તાદૃશં કૃતપુણ્યં તવ પદં પ્રયચ્છામિ તદુપરિશિષ્ટાં ગતિં ભજેતિ વસિષ્ઠવાક્યમાકર્ણ્ય બ્રહ્મરાક્ષસો વસિષ્ઠોપદિષ્ટપુણ્યવશાદ્દિવ્યશરીરો ભૂત્વા નમસ્કૃત્વા સ્વર્ગં જગામ

અથ રામં પ્રાપ્તેકાલે ઉપનીય વસિષ્ઠો વેદાનધ્યાપયામાસ ષડંગાનિ મીમાંસાદ્વયં નીતિશાસ્ત્રં ચાધ્યાપયામાસ

અથ ધનુર્વેદમાયુર્વેદં ભરત ગાંધર્વ વાસ્તુ શાકુન વિવિધયુદ્ધશાસ્ત્રાણિ ચ

અથ વિવાહં કર્તુકામેન રાજ્ઞા દશરથે નાનાનાદેશજનપતીન્પ્રતિ દૂતાઃ પ્રેરિતાઃ

અથ કશ્ચિચ્છીઘ્રમાગત્ય રાજાનમિદમબ્રવીત્

રાજન્વિદર્ભદેશાધિપતિર્વિદેહોનામ રાજા તસ્ય પુત્રી વૈદેહી હોમલબ્ધારૂપેણ લક્ષ્મીસમા સર્વલક્ષણસંપન્ના રામયોગ્યા વિદ્યતે સ ચ તાં દાતું રાજા રામાયોદ્યતઃ તદ્ગમ્યતાં શીઘ્રમિતિ

અથ વસિષ્ઠાદીન્પ્રેષયામાસ તે ચ તત્ર ગત્વા તાં ચ નિરીક્ષ્ય લગ્નં નિશ્ચિત્યાયોધ્યામેત્ય રાજાનમુક્ત્વા રામસહિતાઃ પૃથિવીપતિસમેતાઃ શીઘ્રં વિવિધ કરિ તુરગ શકટ શિબિકાંદોલિકાભિરતિસુભગરૂપભોગવિલાસક્રિયાનિપુણા વિદિતવિવિધચેષ્ટાગંધર્વાઃ કામશાસ્ત્રસુકુશલાઃ મૃદુકઠિનપૃથુપયોધરાસન્ન કંઠાઃ સ્થૂલસૂક્ષ્મલલાટબિંબદશનચ્છદમુખપંકજાઃ કુટિલકુંતલદીર્ઘકેશધમ્મિલ્લાઃ કનકપત્રકર્ણાઃ સ્નાનચેષ્ટયોત્થિતરોમશોભિત જપાકુસુમરક્તદશના વિશદવિસ્ફુરચ્છફરીલોચનાઃ શુક્તિકાસદૃશશ્રવણાઃ નક્ષત્રસદૃશસ્થૂલમુક્તાફલોપશોભિતનાસાપુટા મુકુરસદૃશકપોલાસ્તિલપ્રસૂનનાસિકા આનમ્રમધ્યપ્રદેશચૂચુકા ઇંદ્રગોપપ્રતીકાશાધરપુટદશનક્ષતાઃ સમદીર્ઘકાંગપ્રદર્શનાસ્થિતસર્વપ્રદેશવર્તુલા નાતિમાંસલાઃ પિંડકાગ્રંથિનીવ્યોવલિતબાહુમૂલા અનતિચિરકાલોત્થિતરોમતયા હરિદ્રા વર્ણતયા ચ કર્ણિકારદલસદૃશબાહુમૂલા મૃદુસ્નિગ્ધવર્તુલસૂક્ષ્મમધ્યપ્રદેશાઃ કઠિનસ્થૂલવર્તુલામગ્નચૂચુકપરસ્પરસ્થાનાક્રમણસ્પર્દ્ધિ પયોધરમધ્યલબ્ધપદકપયોધરોપરિચંચલવિવિધમણિમય હારોપશોભિત વક્ષઃસ્થલાઃ પયોધરપરિતો લબ્ધપદતયા તરુણદૃષ્ટિપરમ્પરતયા અસમાનયાનાભિકૂપોપરિતન રોમરાજ્યોપશોભિતોદરપ્રદેશા ભજ્યમાન મધ્યસ્થલીકરણએવ વલીત્રયોપશોભિત મુષ્ટિગ્રાહ્યમધ્યાઃ કરિકરોપમજઘનપ્રદેશા અરોમસદૃશમૃદુસ્નિગ્ધામલા સમજાન્વ્યઃ કદલીસ્તંભસંનિભોરુયુગલા આમગ્નજાનુકૃશકુશવર્તુલપિંડિકારહિતજંઘા આમગ્નગુલ્ફા આસૂક્ષ્મસ્નિગ્ધા દીર્ઘદીર્ઘાંગુલી પાદાનૂપુરરવાહ્વયમાનમદના હંસમતંગજગમના દક્ષિણાંગુષ્ઠસ્પર્શિકચ્છાગ્રા ઉપરિકચ્છં નીવીં કૃત્વા કરદ્વયયુતા વસ્ત્રપ્રદેશકંઠમપ્રાવૃત્યા પરવસનપરિભાગા વૃતસ્તનવસના પરભાગે વામાંસ એવ દક્ષિણપાર્શ્વગતેન દશાભાગેન નાભિપ્રાંતેન પ્રવેશિતોપશોભિતગાત્રયષ્ટયો યોષિતો વિવાહમંગલકર્મકરણાયાનેકશ આગચ્છન્

બાલિકાશ્ચ વિદ્યુલ્લતાંશુશોધિતગાત્રયષ્ટય ઉદ્ભિન્નકુચકમલકુડ્મલવિવિધહારોપશોભિવક્ષસો યત્કિંચિદ્ભાષિણ્યોઽતિચપલમૃદુગતયો વૃદ્ધવનિતાશ્ચાગચ્છન્

અથ વિદેહે પુરતઃ ક્રોશમાત્રે ચૂતવનિકાયાં વિવિધવિટપવિસ્તરપ્રદેશવિવિધવિહંગકૂજિતા-કર્ણનદત્તકર્ણવનહરિણશાવવત્યાં મહારજતનિર્મિતોચ્ચનીચપ્રાસાદોપશોભિતપ્રદેશવિવિધવિહંગાયાં હેમવલ્કલસંવીતભસિતો-દ્ધૂલિતશરીરજટિલમુનિગણધ્યાનોપાસનોપશોભિતવૃક્ષમાલાયાં વિવિધવિદ્યધરવધૂપયોધરભારાભિભૂતવિચરિતતરંગસરસીયુતાયાં સરસ્તીરમિલિતસૈરંધ્રીયુવતિભિરાહૂયમાન તરુણજનાયાં નાનાવર્ણકુસુમસૌરભવાસિતાશેષપ્રદેશાયામિતસ્તતો રિરંસયા પ્રદર્શિતસ્ફારશફરીવિલોચનતરલચક્ષુષા પ્રભાવિલસિતશરીરવેશ્યાજનાયાં વિવિધાશ્ચર્યયુતાયાં દશરથઃ સામાત્યપુરોહિતાભિરામરામાદિપુત્રસહિતઃ સુખમુવાસ

અથ વૈદેહોઽપિ મિથિલાં નાનાપતાકોપશોભિતાં વિવિધપ્રાસાદગોપુરોદ્યાનદેવતાયતનોપશોભિતામન્યોન્યકેલિચતુરયુવતિજનાનુકીર્ણામુશીરવિરચિતમહાપ્રપાં સુકેલીજનોપશોભિતવિશિખાં ।
વિવિધપણ્યોપશોભિતરથ્યાં તત્રતત્ર બ્રહ્મઘોષશોભિતમઠાં પ્રતિમંદિરં મીમાંસાદિવ્યાખ્યાનસંપાદિ સામાધ્યયનાં સુપુણ્યહવિર્ગંધસામાદિસ્વરપદક્રમશ્રુતિબ્રાહ્મણવાટિકામનેકપરિવૃઢમંદિરપ્રવેશનિષ્ક્રીતાગુરુકુંકુમાધ્વર્ય્યુવેષાં મૃદુલવસન તાંબૂલ રક્તદંતચ્છદકામિનીમૃદુવચનકઠિનવચનકરસંજ્ઞાનિર્દ્ધારિત પ્રતિવચનવિવિધોપાયના હરણકરજનોપશોભિતાં મૃદુધવલજઘનપરિવીતવસ્ત્રોપરિભાગેન સ્નિગ્ધવર્તુલપરસ્પરસંઘર્ષપયોધરમધ્યપ્રદેશોપશોભિત વામાંસકંદોપશોભિતવનિતાં વિવિધમુક્તાહારજપાસંકાશદશનચ્છદ મંદહાસમાલાકારસહસ્રોપશોભિતાં પુણ્યાસવસાધનમંદિરાં તત્રતત્ર વિચિત્રતોરણાં વિશુદ્ધવીથિકાં તત્રતત્ર સ્થાપિતકલ્પપાદપાં રંભાવિભૂષિતદ્વારાં પુરીં શોભિતાં શોભયામાસ

અથાભિકલનાર્થં વિલાસિન્યો નિશાદૂર્વાક્ષતામંત્રમંગલકજ્જલિતકૈશિકધમિલ્લલતાગ્રંથિ-ત જટોપશોભિત સીમંતશીર્ષશોભિતનાસામુખવિચિત્રાભરણાર્હણહેમપાત્રાવસ્થિતાજ્યગુગ્ગલુ ફલાદિસૌભાગ્યદ્રવ્યમુદ્વહંતીભિઃ સ્ત્રીભિરન્યૈરપિશોભિતજનૈઃ સ રાજા નિર્જગામ

તદાનીં મંગલતુર્યઘોષાદેવ દુંદુભિભેરીનિઃસાણમર્દલશંખાદિનાદાઃ પ્રાદુર્બભૂવુઃ

ગાયકાશ્ચ મંગલાનિ જગુઃ

મંગલવેદવાક્યાનુપાઠેન વૈદિકાઃ બ્રાહ્મણાઃ ।
કુલપાઠકા ભેરીઘોષેણ કૃત્સ્નમાકાશમાપૂરયન્

અથાન્યોન્યાક્ષતપૂર્વમંગીકુર્વંતઃ સૂતબંદિજનાદિભિઃ સ્તૂયમાનાઃ પુરં પ્રવિવિશુઃ

વિદેહનગરાત્પશ્ચિમભાગે નિર્મિતં મંદિરં દશરથઃ પ્રવિવેશ

અવશિષ્ટાશ્ચ યથાયોગ્યં ભવનં વિવિશુઃ

અથ નારદો મિથિલાં તદાનીમેવાગચ્છત્

વિદેહોઽપિ દેવર્ષિમભિપૂજ્ય સ્વાગતં દૃષ્ટ્વા ભોજનં કારયિત્વા।
સુખાસીનાય મુનયે સઘનસારં તાંબૂલં દત્વા વ્યજ્ઞાપયત્

શ્વો વિવાહે ભવાન્સ્થાતુમર્હતિ કારયિતું વિવાહમ્

નારદ ઉવાચ

શ્વો હિ નક્ષત્રં સૂર્યનક્ષત્રદર્શનં તત્ર વિવાહો ન કર્તવ્ય ઇતિ

અથ મૌહૂર્તિકં વૃદ્ધગાર્ગ્યમાહૂય રાજા પપ્રચ્છ ક્વ વિવાહમુહૂર્તઃ

શ્વ ઇતિ ગાર્ગ્ય ઉવાચ

રાજા ચ નારદં ગાર્ગ્યં ચોદીક્ષ્ય ભો ઇદમિત્થમિતિ પપ્રચ્છ

અથ નારદો ગાર્ગ્યમુવાચ

કથમુક્તં લગ્નં દાસ્યસિ

અથ ગાર્ગ્યો વિષઘટિકાશ્ચ વિહાય લગ્નં દાસ્યામિ ઇત્યુવાચ

નારદોપિ બ્રહ્મવચનાનિ કિં ન જાનાસીત્યુક્તવાન્ગાર્ગ્યમ્

ગાર્ગ્યસ્તુષ્ટસ્તાન્દોષાનપઠત્

ઉલ્કા ચ બ્રહ્મદંડશ્ચ મોઘઃ કંપસ્તથૈવ ચ ।
સર્વકાર્યવિનાશાય દૃષ્ટા વૈ બ્રહ્મણા પુરા

પ્રતિષ્ઠાસુ વિવાહેષુ મૌંજીબંધાભિષેકતઃ ।
અન્યેષુ સર્વકાર્યેષુ વિષનાડીર્વિવર્જયેત્

અતઃ પરં તુ કાર્ય્યાણાં કરણેન ચ દોષભાક્ ।
વિવાહાદિષુ કાર્યેષુ દોષમેવ વદામ્યતઃ

ઉલ્કા દહેત્કુલં સર્વં બ્રહ્મદંડો વિનાશયેત્ ।
મોઘસ્તુ મરણા યસ્યાત્કંપઃ કંપાય કર્મ્મણઃ

ઇતિ નારદોક્તમાકર્ણ્ય ગાર્ગ્યો મુનિર્મૌનપરોઽભવત્

દધ્યૌ રવિં ગ્રહપતિં વિહાય વિષનાડીર્વિવાહઃ ક્રિયતમિતિ

નારદ ઉવાચ-
કથં બ્રહ્મવચનમ્

સૂર્ય ઉવાચ-
દેશભેદેન વ્યવસ્થોદિતા તદસ્મિન્દેશે વિવાહો વિષઘટિકાં વિહાય કર્તવ્ય એવ

નારદોપ્યનુમેને

ઉવાચ શ્વઃ પરાહ્ણે ચ ક્ષત્ત્રવિવાહશ્ચ ભવેદતઃ સ્વયં વરાર્થં નૃપા આગચ્છંતુ તન્નૃપદૂતાન્પ્રેષય

અથ રાજા દશરથાનુમતેન સર્વાનેવ નૃપાનાગમય્યાચિંતયત્ કથં સર્વાનેવ તિરસ્કૃત્ય વૈદેહી રામાય દેયેતિ

અથ રાત્રૌ મુહુર્મુહુર્નિઃશ્વસ્ય નિદ્રાલુરપિ ન નિદ્રામાપ

અથ મધ્યે નિશં રાજા શુચિર્ભૂત્વા ત્ર્યંબકં સાંબિકં મંગલદુકૂલધારિણં કમલભવપુરુષોત્તમશક્ર-પ્રમુખનિખિલદેવૈર્ભૃગુપ્રમુખમુનિવરૈર્હાહાપ્રમુખગંધર્વૈસ્તુંબુરુપ્રમુખૈશ્ચ શ્રુતિસ્મૃતીતિહાસપુરાણૈર્મૂર્તિમદ્ભિશ્ચ સિદ્ધવિદ્યાધરાદિમાતૃકાગણૈશ્ચ નંદીપ્રમુખગણૈશ્ચ સેવ્યમાન પાદકમલં સર્વામંગલપરિમોચકમતિપુણ્યસલિલયા ગંગયા નિષ્કલં કેન ચંદ્રમસા સેવ્યમાન શિરોભાગં વામાંકારૂઢયા ગિરિજયા પ્રદીયમાનવીટિં સહાસં સકામં સહાવેક્ષણમાદદાનં ગોક્ષીરસદૃશં પ્રતિકૂલકસ્તૂરિકાસદૃશકંઠં મૃદુસૂક્ષ્મસ્નિગ્ધજટાભિર્વિરચિતકપર્દં વિશુદ્ધકાર્તસ્વરકુંડલોપશોભિતગંડભાગં દ્વિરષ્ટવર્ષવયસં ગોક્ષીરસદૃશ સ્થૂલમુક્તાફલકૌસુંભવર્ણાંચલેનાવેષ્ટિતશિરોભાગં વિવિધરત્નવિરચિતકાર્તસ્વરભૂષિતવક્ષઃસ્થલમતિધવલોપવીતેનોપશોભિતશરીરમંબિકાનુલગ્નકુંકુમારુણસુગંધિશરીરમીક્ષમાણં તર્જમાનકામમાર્ગણં કોટિકંદર્પસદૃશં મનસાચિંતયત્

જજાપ શતરુદ્રિયં જુહાવ ચ તેનૈવ કામાહુતીઃ પ્રાસ્તુવચ્ચ પુરુષસૂક્તેન

અથ તાદૃશ એવ મહેશ્વરસ્તત્ર પ્રાદુરભૂત્

અથ રાજા નમસ્કૃત્યાસ્તુવીત

રાજોવાચ-
ક્ષિતિસલિલગગનપવનદહનરવિશશિયજમાનમૂર્તિભિરષ્ટમૂર્તે વિશ્વમૂર્તે લોકમૂર્ત્તે ત્રિભુવનમૂર્તે વેદપુરાણમૂર્ત્તે યજ્ઞમૂર્તે સ્તોત્રમૂર્ત્તે શાસ્ત્રમૂર્ત્તેસ્વધામૂર્ત્તે નારાયણમૂર્ત્તે સર્વદેવતામૂર્ત્તે ત્રયીમયત્રયીપ્રમાણત્રયીનેત્રસા-મપ્રિયવસુધારાપ્રિયભક્તિપ્રિયભક્તસુલભાભક્તવિદૂરસ્તુતિપ્રિય ધૂપપ્રિય દીપપ્રિય ઘૃતક્ષીરપ્રિય દ્રો ણકરવીરપ્રિય શ્રીપત્રપ્રિય કમલકહ્લારપ્રિય નંદ્યાવર્તપ્રિય બકુલપ્રિય યૂથિકાપ્રિય કોકનદપ્રિય ગ્રીષ્મજલાવાસપ્રિય યમનિયમપ્રિય નિયતેંદ્રિયપ્રિય જપપ્રિય શ્રાદ્ધપ્રિય ગાયનપ્રિય ગાયત્રીપ્રિય પંચબ્રહ્મપ્રિય સદાચારપ્રિય ગોત્રોત્સાદિકમલભવહરિહરનયનસમર્ચિત પાદકમલજયપ્રદ હરિપ્રાર્થિતજલોત્પાદિતચક્રપ્રદર્શકૃત્સ્મૃતિયુક્તિપ્રદ સ્મૃતમંગલપ્રદ મૃત્યુઞ્જય નમસ્તે નમસ્તે

ઇતિ સ્તોત્રમાકર્ણ્ય ભગવાન્ભવો રાજાનમુવાચ વરદોઽહં વરં વૃણુ

રાજોવાચ શ્રીમન્મમ કન્યા વૈદેહી રામાય દિત્સિતા સ્વયંવરે કુલરૂપબલોત્સાહ સંપન્નાનેકભૂપરાક્ષસવિપ્રાદિસર્વપ્રાણિસમાગમે રામાધિકબલો યદિ તામગ્રહીષ્યત્ તદા વચનમનૃતં મમ પાપં ચ ભવિષ્યતિ

પ્રત્યુત દશરથોઽપિ સર્વાનેવાગતાન્વિજેતુમલં ક્ષત્રકદનશ્ચ રામો યદ્યાયાસ્યતિ તર્હિ મમ સુતાં કિં કરિષ્યતિ વા કિંકિં વા પ્રેષયિષ્યતિ કીદૃશં કારયિષ્યતિ મમ કિંવા કરિષ્યતિ સર્વથા હિ પ્રભૂતબલવાહનો નરપતિરશેષમપિ ત્રિભુવનં હન્યાત્ કિમુત મામલ્પસત્વં કિમુત બહુના ભવાનેવ શરણં મમોપાયં વદ યથા વિવાહે શ્રેયો ભવિષ્યતિ રામશ્ચ જામાતા ભવિષ્યતિ

શંભુરપિ તથા કરોમીત્યુવાચ

રામ એવ નાથઃ સીતાયા ભવિષ્યતિ રામં ચ કૃત્વા સ્વસ્ત્યદ્યૈવ કરિષ્યામિ ગૃહાણાજગવં ધનુરિદમ્

રાજોવાચ-
કિમેતેનાજગવેન ધનુષા સ્વયંવરે સીતાં રામં પ્રાપય

શંકર ઉવાચ-
ઇદં ધનુરસજ્યં મે યસ્તુ સજ્યં કરિષ્યતિ તસ્મૈ દેયા મયા સીતા પ્રતિજ્ઞામેવમાચર

ઇત્યેવમુક્ત્વા ભગવાન્ગણૈરંતર્દધે હરઃ ।
અથાદાતું ધનૂ રાજા ન શશાકાતિયત્નતઃ

અથોજ્જ્વલં શતસહસ્રગજબલં સમાહૂય ગૃહાણેત્યુવાચ

સ ચાપિ માતુલં નત્વાટ્ટહાસં કૃત્વોત્પ્લુત્ય ધનુર્દ્વાભ્યાં કરાભ્યામુદ્દધાર જાનુપર્યંતં માતુલો મારીચઃ શ્રુત્વા એકાકી વિપ્રવેષં કૃત્વા વિદેહમયાચત વૈશ્વદેવાંતે પ્રાપ્તમતિથિં મામવૈહિ

રાજોવાચ-
સ્વાગતં ભો ઇદં બ્રહ્મન્નાસનં તત્ર નિષીદેતિ

સ ચાતિથિસ્તથેત્યુક્ત્વા નિષસાદ

અથ રાજા જલમાદાય પાદૌ પ્રક્ષાલ્ય ગંધપુષ્પાક્ષતૈરભ્યર્ચ્ય મહાજં તસ્મૈ નિવેદ્ય ભોજનાય પ્રાર્થયામાસ

સ ચાપિ તદન્નં ષડ્રસોપેતં સૌવર્ણભાજનગતમીક્ષમાણૈવેતસ્તતો વિલોકયામાસ

તસ્મિન્નેવાવસરે સીતા પદ્મકિંજલ્કપ્રભેષદરુણવસનં બિભ્રતી નીલકુટિલકુંતલૈશ્ચલદ્ભિર્યૂનાં મનાંસ્યાકર્ષયદ્ભિઃ પ્રેક્ષમાણદૃષ્ટિભગ્નકલૈરિવ સ્ત્રીણાં ચિત્તમીદૃશમિતિ દર્શયદ્ભિરિવોપશોભિત-લલાટાનંગચાપસુભ્રૂપદ્મપત્રારુણવિલોચના તિલપ્રસૂનનાસામૃદુસ્નિગ્ધરો મશકપોલાનંતરા રક્તોષ્ઠરાક્તાસનમાણિક્યનિભદાડિમીદશના જપાકુસુમારુણાધરાતિશોભિતચિબુકાશુક્તિ-કર્ણાસમદીર્ઘકંઠાતિમાંસલવક્ષાઃ પીનોદ્ભિન્નકુચકુડ્મલાનેકહારોપશોભિતા સુભગાકા-।
રાનતિમાંસલબાહુલતા મુગ્ધાયતસમાનાંગુલિશિખાપદ્મારુણપલ્લવાવિવિધબહુરત્નાંગુલિભૂષણામુષ્ટિગ્રાહ્યમધ્યાસુ રોમરાજિગંભીરનાભિઃ પૃથુજઘનાકરિકરોરુસ્તૂણીરજંઘાસુપાદકમલા-નૂપુરાદિ પાદવિભૂષણા પાદાંગુલીભૂષિતા વિકસિતસૌગંધિકં વિદધતી ભુંજાનમારીચસ્ય પુરતશ્ચાગતા

વીક્ષ્યાસાવચિંતયદેનાં કથમપહરામિ કથમાલિંગામિ કથમન્યત્કિંચિત્કરોમીત્યેવમવસરમલભમાનસ્તૂષ્ણીમેવ વિનિર્ગતઃ

અથ દેવા ધનુઃસજ્જીકરણાય યતમાના અહંપૂર્વિકયા વિદ્યમાના અન્યોન્યતિરસ્કારેણ મહેંદ્રઃ પ્રાપ ધનુરુત્તમં પ્રાંતદ્વયાત્પરં નાવનમયિતું શશાક

અથ સૂર્યો ધનુરાદાય નમયન્નેવ નિપપાત

વાયુર્બલવતાં શ્રેષ્ઠો જગ્રાહાજગવમથ સ્વેનૈવ કરેણોત્કર્ષયન્નધઃ પપાત ધનુશ્ચ વાયોરુપરિ પપાત અહસંસ્તદા સર્વે

એતસ્મિન્નંતરે તુરગવરમારુહ્ય બાણાસુરઃ સહસ્રબાહુરનેકાનેકશિરોભિર્દૈત્યૈઃ પરિવૃતઃ પ્રહ્લાદસમેતો વિદેહપુરીમાજગામ

અથ સ્વવિભૂષણોદ્ભાસિતાં દિશં કુર્વન્સ્વતેજસાપયશસો દેવતાઃ કુર્વન્નાનાવિધગીતં શૃણ્વન્દ્વ્યંગુલમાત્રેણ શક્તો વિરરામ

પ્રહ્લાદોબલિશ્ચૈવધાવાતેઽથવિરેમતુઃ

અથ રાક્ષસેષુ તૂષ્ણીંભૂતેષુ રાજાનોઽતિબલિનઃ સમાગતા જ્યાબંધાશક્તા અપસૃત્ય તસ્થુઃ

અથ બ્રાહ્મણાઃ સમાગતાઃ

અથ વિશ્વામિત્રો ધનુરાદાય એકાંગુલપર્યંતં સજ્યં કૃત્વા વિરરામ નિવૃત્તાશ્ચાપરે

અથ દિનમાત્રે ધનુષિ તૂષ્ણીંભૂતેષુ રાઘવઃ સહાનુજૈરાગત્ય ધનુર્નિરીક્ષ્યાસ્પૃશત્

અથ રાજકુમારાઃ શતશઃ સમાગતાઃ સર્વાભરણભૂષિતા ધનુર્દૃષ્ટ્વાપસ્પૃશુર્ન ચાલનક્ષમાઃ

અથ દાશરથિપ્રમુખાઃકુમારાઃ સમાગતાઃ

અથ વેત્રઝર્ઝરપાણયઃ સમાગમન્સર્વાનેવાપસારયામાસુઃ

અથ રામો લક્ષ્મરણહસ્તં ગૃહીત્વા સર્વાભરણભૂષિતો ધનુરાસાદ્ય સ્પૃષ્ટ્વા નત્વા પ્રદક્ષિણીકૃત્ય ધનુરાદાયોદ્દધાર

તદાદાનસમયે સર્વ એવૈત્ય સહાસમૂચુઃ અત્ર ભગ્ના મહારથા ઇતિ

અથ સ રામો ધનુર્જ્યાસ્થાનમવનમય્ય ધનુષિ જાનું કૃત્વા સજ્યમેકકરેણોત્પાદયન્કોટ્યામનામયત્

અથસજ્જીકૃતં દૃષ્ટ્વા સર્વ એવ નાસાગ્રન્યસ્તાંગુલયોઽભવન્

રામોઽપિ જ્યામન્વનાદયત્ ।
તેન નાદેન સર્વેષાં મનાંસિ ક્ષુભિતાન્યાસન્

રામેણસજ્યિતં ધનુરિતિ સર્વત્ર વાદઃ સંજાતઃ

જનકોઽપિ સીતાં રામાય દદૌ રાજભિશ્ચ યુદ્ધં કૃત્વા તાન્નિર્જ્જિત્ય સ્વપુરીમાગાત્

અથૈકદા દશરથો રામં યૌવરાજ્યેભિષિચ્ય સુખી બભૂવ સર્વપ્રજારંજનાચ્ચ રામો રાજાનુમત ઇતિ સર્વપ્રજાવાદોઽભૂત્

અથ કૈકયદેશાધિપતિતનયા સુવેષા રામં રાજાનમસહમાના રાજાનમુવાચ મમ વરદાનાવસર ઇતિ રાજાચિંતયત્કિં દેયમિતિ

દેવ્યુવાચ-।
ચતુર્દશવર્ષાણિ રામો વનં વિશતુ પાલયતુ રાજ્યં ભરતઃ

રાજાનૃતવચનદોષભયાત્કથંકથમપિ સ્વીચકાર

અથ વસિષ્ઠં ભાવિતયાવોચત રામો વનાય નિર્ગચ્છતિ અસ્ય કિંવા ભવેદિતિ વિચાર્ય શુભાશુભં બ્રૂહિ

વસિષ્ઠો વિચાર્ય સહર્ષં રાજાનમુવાચ

ગત્વા વનં નિખિલદાનવવીરહંતા શંભોરનેકવિધપૂજનમાતનોતિ ।
સીતાવિયોગરુષિતઃ કપિસેનયા ચ તીર્ત્વોદધિં દશમુખં ચ નિહંતિ રામઃ

આગમ્ય રાજ્યં રઘુનંદનોઽપિ બહૂનિ વર્ષાણિ સમાતનોતિ ।
પ્રશસ્તકીર્તિર્નિખિલેપિ લોકે શર્વેણ દેવેન ચિરં ન્યવાત્સીત્

સુપુત્રયુક્તો બહુયજ્ઞયાજી પરિવૃઢઃ સર્વગુણાધિકશ્ચ

ઇતિ વસિષ્ઠવચનં શ્રુત્વા દશરથો રામગુણાનનુસ્મરન્નિત્યુવાચ શ્રેયો મે મરણં રામસ્ય નિર્ગમને ઇતિ

અથ રામો માતરં પિતરં ગુરું ચ વસિષ્ઠં પિતૃપત્નીર્નમસ્કૃત્ય વનાય જગામ

અથોપવને દિનમેકં સ્થિત્વા જટાઃ કારયિત્વા વલ્કલં વાસો ધૃત્વૈકોપવીતી કૃતદંતશુદ્ધિરેકેનોપવીતેન જટાં બદ્ધ્વા ભસ્મોદ્ધૂલિતસર્વાંગો ભસિત નિષ્ઠુરકાયો મુક્તાફલદામમણિવ્યત્યસ્ત રુદ્રાક્ષમાલામુરસિ દધાનોઽલ્પભૂષણાધિભૂષિત સીતાસહાયો લક્ષ્મણાનુચરો વિવેશ વનાંતરમ્

અથાનેક રાક્ષસાંસ્તસ્મિન્નિજઘાન ભવાનિવ નિખિલં ચકાર સીતાપહરણાદિનિખિલમપિ ભવતા યથાતથા સ્યાથ સુગ્રીવાશ્રમમૃષ્યમૂકપર્વતં રામો જગામ નિબિડચ્છાયાચૂતવૃક્ષમાસાદ્ય લક્ષ્મણસહાયઃ પરિશ્રયમકલ્પયત્ ।
વૃક્ષે તુ ધનુષી આરોપ્યાસીનલક્ષ્મણાંકે શિરઃ કૃત્વા હરિચર્મશય્યાશયનોલક્ષિતાંગીતિં શૃણ્વન્વૃક્ષફલં નિરીક્ષમાણો વાનરમેકં મણિકુંડલં હેમપિંગલં સદૃઢબદ્ધમૌંજીકૌપીનમચ્છોપવીતિનમતિચંચલં ફલમાદાયાત્મનિવિક્ષિપંતં પુષ્પમંજરીશ્ચ કિરંતં ગાનમનુકુર્વંતં વ્યજનેન રામં વીજયંતમારુહ્ય શાખામપિ તથા વીજયંતમાબદ્ધચૂતફલમાત્રં રામો વીક્ષ્ય લક્ષ્મણમભાષત

લક્ષ્મણ કોઽયં કપિરિતિ

લક્ષ્મણોઽપિ ન જાન ઇત્યુવાચ અથ રામઃ સમાહૂય કસ્ય ત્વં કિં નામત્યેપૃચ્છત્

સ ચ સુગ્રીવસ્ય હનૂમાનિત્યુવાચ

રામં નત્વા સુગ્રીવમેત્ય નત્વા દેવનારાયણૈવાપરઃ પુરુષો યુવા મેઘશ્યામો જટી આજાનુબાહુરતિયશસ્વી સૂર્યસંકાશેન સહાપરેણ નરેણ ઇહાસ્તે

અથ તરુચ્છાયાધઃ સંસ્થિતૌ સર્વલક્ષણસંપન્નૌ રાજપુત્રૌ દૃષ્ટ્વા ઉક્તશ્ચ તાભ્યાં સુગ્રીવાય નિવેદયેતિ તત્ત્વયિ નિવેદિતમ્

અથ સુગ્રીવઃ સત્વરમુત્થાય પુષ્પસલિલાદિદ્રવ્યમાદાય પાદપ્રક્ષાલનાદિકં કૃત્વા ફલાનિ સમર્પ્ય વ્યજ્ઞાપયત્

કૌ યુવાં કિમર્થમાગતૌ રાજપુત્રૌ તપસ્વિનાવિતિ સુગ્રીવવચનમાકર્ણ્ય લક્ષ્મણેનાભાષત રામઃ

દશરથતનયાવાવાં રામલક્ષ્મણૌ દુષ્ટનિગ્રહ શિષ્ટપરિપાલનાય વનં ગતાવિતિ

અથ સુગ્રીવ આહ યુવયોરુપકારમપકારં કાર્યમસ્તીતિ લક્ષ્યતે

અન્યથા સેનાસમેતાવાગમિષ્યતઃ લક્ષ્મણ આહ અસ્તિ કાર્યાંતરમ્ અમુષ્ય ભાર્યા કેનાપહૃતા ન જ્ઞાયતે તામન્વેષ્ટુમાગતૌ તદેવાવયોઃ કાર્ય્યમન્યદાનુષંગિકમ્ તદર્થમપિ જલધિં તરાવ અપિ પાતાલં પ્રવિશાવ અપિ નાકં સાધયાવઃ અપિ મહેંદ્રં પાતયાવઃ અપિ બલિનં હનાવઃ કિમપિ કુર્વહે

સુગ્રીવ ઉવાચ-
રાવણેનાપહૃતયા કયાચિદ્ધ્રિયમાણાગતયા વિભૂષણાનિ કાનિચિત્પરિત્યક્તા નિગતાનિ મયા સંગૃહીતાનિ તાનિ દર્શયામીત્યાભાષ્ય રામં મંદિરમાગમય્ય દર્શયામાસ

રામોઽપિ નિરીક્ષ્ય નિશ્ચિત્ય પ્રરુદ્ય ક્વ ગતોઽસૌ રાવણ ઇતિ પપ્રચ્છ સ ચ દક્ષિણામાશાં ગત ઇતિ બભાષે

અથ રામસ્તેન સખ્યમકરોત્ અપૃચ્છચ્ચ કિમર્થમિહ ભાર્ય્યાહીનઃ સ્થિત ઇતિ

સુગ્રીવ ઉવાચ-।
મમ ભ્રાતા વાલી મહાબલો મમભાર્ય્યાં રાજ્યં ચાપહૃત્ય કિષ્કિન્ધાયામાસ્તે યુદ્ધેન ચાહં પરાજિતઃ તદ્વધાય સર્વથા મમ ચિંતા યથાસૌ ત્વયા નિહન્યતે તથાહમપિ સાગરં બદ્ધ્વા પરતીરે લંકાયાં સ્થિતાં સીતાં રાવણેનાપહૃતાં તવ સમર્પયામીત્યાભાષ્ય શપથં કૃત્વા સુગ્રીવો વાલિનાતિબલિના યુદ્ધાયાહૂતેન યુયુધે

રામોપ્યનંતરમનિશ્ચયાદ્વાલિનં નાહનત્

અથ સુગ્રીવઃ પલાયિતો રામમિદમભાષત

તવ ચિત્તમવિજ્ઞાય પ્રવૃત્તોઽહમરણાય

રામોપિ યુવયોર્વિશેષાજ્ઞાનાન્મયા તૂષ્ણીં ભૂતં ચિહ્નિતં ત્વા નિરીક્ષ્યતં હન્મિ

અથ સુગ્રીવશ્ચિહ્નં કૃત્વા વાલિનં યુદ્ધાયાહૂય સમતિષ્ઠત

તારા બભાષે વાલિનમ્

સહાયવાનિવ લક્ષ્યતે સુગ્રીવો નોચેદેવં નાહ્વયતિ જ્ઞાતં મયા રામલક્ષ્મણૌ દશરથતનયૌ નારાયણાંશૌ ભૂભારાવતરણાય સમાગતૌ તાવસ્ય સહાયભૂતૌ

વાલ્યુવાચ-
નીતિમાન્રામ ઇતિ મયા શ્રુતઃ ।
નહિ બલવંતં વિહાય દુર્બલં ભજતે તાદૃશઃ સમાયાતુ વા રામઃ પ્રતિપન્નમધિકં કૃત્વા બિભેતિ વીરો યદિ રામઃ સ્વયં યુદ્ધાય યાતસ્તદા યુદ્ધં કર્તવ્યમિત્યાભાષ્ય તારાં સંભાવ્ય સુગ્રીવયુદ્ધાય નિર્ય્યાતઃ

અથ મુષ્ટિયુદ્ધમન્યોન્યમભૂત્

રામોઽપિ વાલિનં જઘાન

પપાત ચ વાલ્યાહ ચાશસ્ત્રયુદ્ધે વા બાણઘાતોઽથ શોણિતસર્વાંગો બભૂવ

અથ તારા ચાંગદશ્ચ સમાગત્ય વ્યથિતૌ બભૂવતુઃ

અથ રાઘવં વાનરાઃ સમાયાતા વાલ્યુપાંતે નિપેતૂરુરુદુશ્ચ

અથ તારા રામં બભાષે શાસ્ત્રકુશલાઃ શૂરા ધાર્મિકા રાઘવાઃ પુરા ચાપિ રામ કથં પાપમકાર્ષીઃ

ન ક્ષત્રધર્મ્મં જાનીષે રાજગણસેવિતમ્

અન્યોન્યં યુદ્ધ્યતોર્યુદ્ધે જયો વા મરણં ભવેત્ ।
અન્યો યદિતયોર્હન્યાદ્બ્રહ્મહા સ નિગદ્યતે

કિં વૈરેણ વાલિનમાહનઃ કિં વાનરમાંસાશયા

અભોજ્યં વાનરં માંસં યદ્યાત્મનોઽપ્રિયાત્સુખાભાવાદપરેષામપિ તથાભાવં મન્યસે અહો વિમોહાદ્યદિમામાદાતુમિદં કૃતમેકપત્નીવ્રતં તવ

યદિ રાવણહૃતાં સીતામાનેતું સુગ્રીવસહાયાય કૃતમેવમેવ હા મહદંતરં બલવૃદ્ધેન મહાબલેન વાલિના સદ્ભાવેન દિનકરાવર્તિતાંતરે સીતામાનેતું સમર્થેન સ્મરણાગતરાવણદાનમર્થેન વાનરરાજેન પંચાશત્પરાર્દ્ધવાનરભલ્લૂકસેનાવતા આત્મકાર્યેણ સિદ્ધ્યત ઇતિ કિં સુગ્રીવેણાલ્પવી-ર્યેણ સપ્તપરાર્દ્ધસેનાપતિના કપિના કિં સિદ્ધ્યતિ કાર્યં વચનવતઃ

અહો જ્ઞાતં સર્વદેવ ભદ્રં યદુક્તોસિ

વક્તિ ચ રામઃ પૃથિવીપતિના મયા દુષ્ટનિગ્રહણં કાર્યં શિષ્ટપરિપાલનં ચ વાલિના સુગ્રીવમહિષી રુમાપહૃતા રાજ્યં ચ અતશ્ચ ન તાદૃગ્વધે દોષઃ

તારોવાચ-
સુગ્રીવોઽપિ તર્હિ વધ્યો દુંદુભિના યુદ્ધ્યતા વાલિના બિલેપ્રવિષ્ટેન વત્સરં તત્રોષિતં તદંતરે ચ મામપહૃત્ય રાજ્યં ચ કૃતં સુગ્રીવેણ તં પૂર્વમપિ પશ્ચાત્તં હંતુ

રામ ઉવાચ-।
કિયત્કાલાત્પૂર્વમિદં ચ વદ

તારોવાચ-
ષષ્ટિવર્ષસહસ્રાદર્વાકશીતિતમે વર્ષે રક્ષોયુદ્ધે સુગ્રીવેણ રાજ્યમપહૃતમ્

પુનશ્ચ વર્ષાંતરે પ્રાપ્તેન વાલિના સુગ્રીવઃ પલાયિતઃ

અપહૃતા તસ્ય ભાર્યા રાજ્યં ચાપહૃતમ્

તસ્મિન્નેવ દિને ભવતઃ પિતુર્દશરથસ્યાભિષેકઃ

રાઘવ ઉવાચ-
મયા પિતુરનુશાસનાદ્રાજ્યગતદુષ્ટનિગ્રહણં કૃતમ્ ।
ગુરુવચનસ્યાનુલ્લંઘનીયત્વાત્તદપહરણવેલાયાં યો રાજાસનાચરત્

અથવા સ્વતંત્રૌ મૃગૌ મૃગયોર્હતશ્ચ વાલી મૃગાણામન્યોન્યં દારણાદ્ય જગુપ્સા ચ

યતો મમ મૃગયાવદાથવા મૃગાણામ્ ।
ચલિતસ્થિતબદ્ધાનાં ચલદ્ભ્રાંતપલાયિનામ્ ।
અથાવસૃજતાસંગમુજ્ઝિતા મૃગયા તથા

મૃગયાશાસ્ત્રવિધિતો મૃગયેયં મયા કૃતા ।
દર્શનાદર્શનાભ્યાં ચ ધાવતાધાવતા તથા

અવરોહાત્પરં સ્થાનં સાત્વિકાનાં પ્રભિદ્યતે ।
રાજ્ઞશ્ચ મૃગયાધર્મો વિના આમિષભોજનમ્

અથ રામવચનમાકર્ણ્ય સર્વ એવ પ્રાકંપયઞ્છિરાંસિ

વાલી બભાષે રામમંજલિમસ્તકે નિધાય નમસ્તે રામ શૃણુ વચનં મમ

શંખચક્રગદાપાણિઃ પીતવાસા જગદ્ગુરુઃ ।
નારાયણઃ સ્વયં સાક્ષાદ્ભવાનિતિ મયા શ્રુતમ્

ત્વાં યોગિનશ્ચિંતયંતિ ત્વાં યજંતિ ચ યજ્વિનઃ ।
હવ્યકવ્યભુગે કસ્ત્વં પિતૃદેવસ્વરૂપધૃક્

મરણે ચિંતયાનસ્ય ત્વાં વિમુક્તિરદૂરતઃ ।
સત્વં મે દર્શનં પ્રાપ્તો રામ મે પાપસંક્ષયઃ

ગૃહાણ બાણં કાકુત્સ્થ વ્યથિતો ભૃશમસ્મ્યહમ્

અથ રામસ્તથેતિ બાણમાદાય વાલિનમુવાચ કિમિષ્ટં દીયતાં વદ

કપિરુવાચ-
યદિ પ્રસન્નો ભગવાન્મમ સદ્ગતિં દેહિ

અયં સુગ્રીવસ્તથા રક્ષણીયોંઽગદોઽથ તારા ચ મયા પાપિનાપરાધઃ કૃતસ્તત્ફલમનુભૂતમ્

અથ રામં પશ્યન્નેવ વાલી મમાર સ્વર્ગં ચ ગતઃ

અથ સુગ્રીવં રાજ્યેઽભિષિચ્ય સ્વયં વનં વિવેશ

અથ તેન સહાયેન જલધિસમીપં ગત્વા ક્વ લંકા ક્વ સીતા ક્વ ચારાતિરિતિ સુગ્રીવમાહ રામઃ

અથ હનુમાનાહ પ્રવિશ્ય લંકાં વિચિત્ય સીતાં સર્વતત્ત્વમવગત્ય યુદ્ધં સંધિર્વા કર્તવ્યઃ તદુદધિલંઘનાય કિંચિત્સમાદિશતુ ભગવાન્

અથ સુગ્રીવમાહ રામઃ ।
કથમેતદ્ઘટત ઇતિ

કપિરુવાચ-
મમ વાનરા ભલ્લૂપ્રમુખાઃ કોટિશઃ સંતિ

એકં નિયુજ્ય સર્વમાકલય્ય યથાયુક્તં તથા કરણીયમ્

અથ જાંબવાનાહ ।
હનૂમાનેકો ગચ્છતુ બુધ્યતુ લંકામ્

અથ હનૂમાનગમલ્લંકાપુરં વિચિત્ય સીતામશોકવનિકાયામાસીનાં તથા ચ સંભાષ્ય વિશ્વાસં કૃત્વા વનં બભંજ વનરક્ષકાંશ્ચ

બદ્ધો રક્ષસા લંકાં દગ્ધ્વા ઉત્તરકૂલં ગત્વા રામં દૃષ્ટ્વા વૃત્તાંતં કથયિત્વા તૂષ્ણીમતિષ્ઠત્

અથ રામઃ સર્વૈર્વિચારયામાસ જાંબવાનુવાચ રામેણ લંકા કપિભિર્વિનશ્યતીતિ નારદેન મમોક્તમ્

અથ સાગરોત્તરણે યત્નતયા સ્થેયમ્

અથ રામઃ શંકરમારાધ્ય સર્વં નિવેદયિત્વા ત્વદુક્તં કરોમીતિ વચનમુક્ત્વા શિવમભ્યર્ચ્ય પ્રણતો ભૂત્વા વ્યજિજ્ઞપત્

હે મહાદેવ મહાભૂતગ્રાસ મહાપ્રલયકારણ મહાહિભૂષણ મહારુદ્ર શંકર પરમેશ્વર વિરૂપાક્ષ નાગયજ્ઞોપવીતકરિ કૃત્તિવસન બ્રહ્મશિરઃ કપાલમાલાભરભૂષણ –નરકાસ્થિભૂષણભસિત પરનારાયણપ્રિય શુભચરિત પંચબ્રહ્માદિદેવ પંચાનન ચતુર્વદન વેદવેદ્ય ભક્તસુલભા ભક્તદુર્લભ પરમાનંદવિજ્ઞાન પર પૂષદંતપાતન દક્ષશિરશ્છેદન બ્રહ્મપંચમશિરોહરણ પાર્વતીવલ્લભ નારદોપગીયમાન શુભચરિત શર્વ ત્રિનેત્ર ત્રિશૂલધર પિનાકપાણે કપર્દિન્નનેકરૂપધર વૃષભવાહન શુદ્ધસ્ફટિકસંકાશ ચતુર્ભુજ નાનાયુધ દક્ષિણામૂર્તે ઈશ્વર દેવપતે ગંગાધર ત્રિપુરહર શ્રીશૈલનિવાસ કાશીનાથ કેદારેશ્વર ભૂષણસિદ્ધેશ્વર ગોકર્ણેશ્વર કનખલેશ્વર પર્વતેશ્વર ચક્રપ્રદ બાણચિંતાપાદક મુરહર પૂજિતચરણકમલ સોમસોમભૂષણ સર્વજ્ઞ જ્યોતિર્મય જગન્મય નમસ્તે નમસ્તે

એવં સ્તુવતો રામસ્ય પુરતો લિંગમધ્યકોપેતસ્તેજોમયમૂર્તિરાવિર્બભૂવ

અભયવાનથ પુનઃ પદ્માસનાસીનમુમાધિષ્ઠિતાંકમીશમામુક્તસર્વાભરણં સુકાંતિકિરીટિનં હૈમવતીકટિસ્પર્શં કરદ્વયેનાભયવરપ્રદં તરંગિતાનેકદિશાભિઃ ।
પૂર્ણતેજસ્વિનં હાસમુખં પ્રસન્નવદનં દદર્શ રામઃ

પરમેશિતારં નનામ બદ્ધાંજલિપુનશ્ચ દંડવત્પપાત

અથ રામં પરમેશ્વરોઽપિ વરં વૃણુ ત્વં વરદોઽહમિત્યુક્તવાન્

રામ ઉવાચ-
લંકાં ગમિષ્યામિ સમુદ્રતરણે ઉપાયમેકં મમ દેહિ શંભો

શંભુરુવાચ-
મમાજગવં ધનુરસ્તિ તત્કાલરૂપમવિકલ્પં વા ભવતિ ।
તદારુહ્ય સમુદ્રં તીર્ત્વા લંકામાપ્નુહિ

રામસ્તથેતિ નિશ્ચિત્ય સસ્મારાજગવમ્

આગતં ધનુસ્તતશ્ચ રામોઽપૂજયત્

અથ હરો ધનુરાદાય રામાય દત્તવાન્

રામોઽપિ જલધાવપાતયત્

આરુરુહુઃ સર્વે વાનરા રામલક્ષ્મણૌ ચ ષષ્ટિપરાર્દ્ધં તેષામસંખ્યેષુ વાનરેષુ ધનુરારૂઢેષુ નિકામં યયૌ

ધનુસ્તટં વાનરાશ્ચ તતસ્તતો ગત્વા નિરીક્ષયામાસુઃ

અથાતિકાયો નામ રક્ષઃ કપિબલમાલોક્ય રાવણાયોક્તવાન્

રાવણોઽપિ કિં કપિભિઃ શાખામૃગૈઃ કિં વા માનુષાભ્યાં રામલક્ષ્મણાભ્યાં કિમાયાતં।
દૈવાગતમસકં ભોજનમિત્યુવાચ

અથ સુગ્રીવઃ પશ્ચિમાવલંબિનિ ભાસ્વતિ હનૂમજ્જાંબવદાદિમહાબલૈશ્ચાતિકાયૈરસંખ્યાતૈર્લંકાપાર્શ્વં ગત્વા ઉપવનં પ્રવશ્યિ નાનાફલાનિ ખાદિત્વા પયઃ પીત્વોપવનરક્ષિરાક્ષસાન્વિદ્રાવ્ય સર્વવિપિનમેકૈકશો ગૃહીત્વા પ્રાદ્રવન્લંકાં ગોપુરં ચ ગત્વા સમારુહ્ય પ્રાસાદં ચ વિશીર્યૈકૈકશઃ કેચિત્સ્તંભમાદાય રક્ષોભિર્યુયુધુઃ

એકે ચ શાલાં બભંજુર્ગૃહાણિ ચૂર્ણયામાસુર્બાલવૃદ્ધસ્ત્રીજનાદિકં સર્વમેવ નિજઘ્નુઃ

અથૈકં પ્રાકારં નિર્જિતમાજ્ઞાય રાવણ ઇંદ્રજિતં સંદિદેશ

ઇંદ્રજિતા ચ યુદ્ધં વાનરાઃ કૃત્વા ભીતાઃ પલાયિતાશ્ચ

અથ હનૂમાનખિલં નિર્ગતમાજ્ઞાય રાવણં જ્ઞાત્વા વાનરાનાહૂય નિર્ભર્ત્સ્ય સેનાં મહતીં કારયિત્વા દશમુખં કલ્પયિત્વા મોદયામાસ

અથ ખસ્થ એવેંદ્રજિદ્યુયુધે ન ચ વાનરાસ્તં દૃષ્ટવંતઃ

અથ હનૂમજ્જાંબવંતૌ ખમુત્પત્ય પર્વતશિખરાભ્યામિન્દ્રજિતં નિજઘ્નતુઃ

અથ ભુવિપપાત તં લક્ષ્મણશ્ચ યમલોકગામિનં ચકાર

અથાતિકાયમહાકાયૌ વાનરસૈન્યં બહુશો હત્વા લક્ષ્મણં પીડયિત્વા રામેણ સંયુધ્ય સુગ્રીવં કૃત્વા હનૂમજ્જાંબવદ્ભ્યાં યુયુધાતે પરાજિતૌ ગૃહીત્વા તૌ ચ યોદ્ધારાવાદાય રામસમીપં ગત્વા રામાય ન્યવેદયતામ્

અતિકાયમભાષત રામઃ

રાવણસ્ય મમ યુદ્ધં બ્રૂહિ સચિવાનામન્યેષાં મહાભયાનાં ચ

અતિકાય ઉવાચ-
નિશ્ચિતમિદં પુરાસ્માભિઃ કાર્યં સેનાં વિભાગશઃ કૃત્વા વિદ્યુન્માલીનામ રાક્ષસો મહાબલો વિચિત્રયોધી દર્શનાદર્શનયોધી વાનરૈઃ સર્વૈરેક એવ યુધ્યતે

અપરે ચ બલિનો મહાંતઃ શિક્ષિતાસ્ત્રાશ્ચાગતા આવાં ચ યુવાભ્યાં યુધ્યાવો રાવણઃ પુષ્પકમારુહ્યાપરભાગેન ત્વામેવ નિહનિષ્યતિ

અન્યે ચ રાક્ષસાઃ કુંભકર્ણમુખાશ્ચાત્મરૂપં કૃત્વા ત્વાં પરિવાર્ય ગૃહીત્વા સીતાયૈ દર્શયિત્વા તત્સંનિધાવેવ હનિષ્યતિ

રામઃ પ્રાહ અહો બલવતાં કિમસાધ્યમેવં ભવતિ દૈવગતિઃ કુટિલા સુગ્રીવોઽતિકોપનઃ સક્રોધં દૃષ્ટ્વા રામમુવાચ

વધ્યાવેતૌ ન મોચનીયૌ

રામઃ પ્રાહાવધ્યૌ મોચનીયાવેતૌ વસનાનિ ભૂષણાન્યાનયેત્યુક્તમાત્રે હનૂમતા તાન્યાનીતાનિ રામસ્તાભ્યાં દત્તવાન્

નત્વા યદેતલ્લંકાદ્વારે દૃશ્યતે દારુપંચવક્ત્રં શુક્રેણોક્તમેતેન ચ્છિન્નેન રાવણો હન્યતે

અથ ચ દારુચ્છેદનસમનંતરં પાતાલં ગંતવ્યમિતિ ભાર્ગવભાષિતં શાસનં લિખિતમ્

તસ્માત્ત્વમિદં દાર્વેકપ્રયત્નૈકબાણનિપાતેન પંચધાચ્છિંધિ તતસ્તવ શક્તિં જ્ઞાત્વા યુદ્ધમતિદૃઢં કુર્વીમહિ

અથ ભાર્ગવવચોવિજ્ઞાય રામઃ પૂર્વકોટ્યાં સ્પર્શમાત્રેણ સજ્યં કૃત્વા ધનુષિ બાણં સંયોજ્ય રક્ષોભ્યાં હનૂમતાશ્રાવયન્નેવ બાણં મુમોચ

બાણં ધનુષશ્ચલિતં તૌ રાક્ષસૌ બાણમાર્ગં નિરીક્ષમાણૌ દારુ બાણેન પંચધા ચ્છિન્નં નિરીક્ષ્ય રામં વ્યજ્ઞાપયતામાવયોઃ શિશવો રક્ષણીયાસ્ત્વયેતિ તથેત્યાહ રામઃ રાક્ષસૌ લંકાં પ્રવિષ્ટૌ

અથ પ્રાકારયુદ્ધં કર્તું વાનરા ગત્વા સર્વતો વરણમાત્રં હિ પાર્ષ્ણિભિઃ પાદૈર્જાનુભિઃ કરૈઃ પૃષ્ઠૈશ્ચ તલસમં કૃત્વા દ્વિતીયપ્રાકારં ગતાસ્તદા ચ રાવણઃ સમાગત્ય સર્વાનેવેષુભિર્દ્રાવયિત્વા તદનુગચ્છન્રામમગાત્

અથ રામમપિ પંચભિર્બાણૈર્વિવ્યાધ

અથ રામો દશભિર્બાણૈ રાવણં સવ્રણં ચકાર

અનયોરતિદારુણમન્યોન્યં યુદ્ધં બભૂવ

રાવણો દશભિર્બાણૈર્વિવ્યાધ

અથ રામબાણૈશ્ચ ક્ષતશરીરો રાક્ષસઃ પલાયનપરોઽભવત્

વાનરા લક્ષ્મણશ્ચ કોટિકોટિરાક્ષસાનઘ્નન્

અથપરસ્મિન્નહનિ વિભીષણો રાવણં વિચાર્યેદમુવાચ

તૃતીયોપાયકાલોઽયં ચતુર્થં ન વિચારય ।
ચતુર્થો વિપરીતો ન શસ્તઃ શસ્તાર્થકારિણઃ

પરસ્ય ચાઽત્મનઃ શક્તિં વિદિત્વા ચાઽત્મનોઽધિકામ્ ।
તદા યુદ્ધં પ્રશસ્તં સ્યાદ્વિપરીતં વિનાશકમ્

રામેણ બલિનાનૈવ યુદ્ધં તે દુર્બલસ્ય ચ ।
એકેષુવાલિહન્તાઽસૌ વાલિર્જ્ઞાતસ્ત્વયા પુરા

મારીચમેકબાણેન ભવાનપિ પલાયિતઃ ।
નિહતા રાક્ષસાઃ શૂરા ઇન્દ્ર જિચ્ચ સુતો હતઃ

વરેણ્યત્રિતયં ભગ્નં તેન યુદ્ધં ચ નૈવ તે ।
દાસભાવમથો વાઽપિ દત્ત્વા સીતામથાઽપ્નુહિ

ગોપુરસ્થં તથા દારુ પઞ્ચવક્ત્રમથેષુણા ।
ચિચ્છેદ પઞ્ચધા તેન રામસ્ત્વાં મારયિષ્યતિ

ત્વદર્થં બહવો નષ્ટા નાશમેષ્યંતિ ચાપરે ।
એકો ન્યાયઃ સુખાર્થાય ન ચ મૌઢ્યં સહોદર

માનુષીં મૃત્યુસંયુક્તામનિચ્છન્તીં પતિવ્રતામ્ ।
પત્નીં બલવતશ્ચાપિ પૂજયિત્વા વિસર્જય

અનિચ્છન્ત્યાઃ સમાયોગે ભવેદ્દુઃખપરંપરા ।
દુર્ગન્ધમલસંયુક્તો નારીસઙ્ગો જુગુપ્સિતઃ

વિરક્તિરથ ચેજ્જાતા દુઃખાયાકાર્યવર્તનમ્ ।
અનુરાગોયદિ ભવેન્મરણં નરકં તતઃ

આત્મનો મરણં વ્યર્થં તસ્યાશ્ચાદ્ય સમાગમે ।
ત્યાગો વા મરણં તાત ધર્મપત્ન્યાસ્તથા ભવેત્

એવમાદિ તથાઽન્યચ્ચ કશ્મલં સંભવિષ્યતિ ।
અન્યદાખ્યામિ તે વાક્યં સર્વેષાં ચ પ્રિયં હિતમ્

ગત્વા રામાન્તિકં નત્વા સ્તુત્વા વિજ્ઞાપ્ય રાઘવમ્ ।
ક્ષમ રામ મહાવીર શરણાગતવત્સલ

તામસા રાક્ષસાઃ સર્વે વયમેતે સુપાપિનઃ ।
સીતાપહારજં દોષં ત્યક્ત્વા પુત્રાનવેહિ નઃ

ત્વદધીના વયં રામ રક્ષ વા મારયેચ્છયા ।
ઇત્યુદીર્ય પુરસ્તસ્ય રાઘવસ્ય સ્થિતા વયમ્

સ્થિરાયુષો ભવિષ્યામઃ સ્થિરરાજ્યા દશાનન ।
અથાઽહં રાવણો વાક્યમહો નો રાક્ષસો ભવાન્

ન શૂરો રાજધર્મં ચ ન ચ જાનાસિ શાશ્વતમ્ ।
પરનારીપરદ્ર વ્યપરરાજ્યનિષેવયા

શૂરાણામુત્તમો ધર્મો ન ષણ્ઢાનાં ભવાદૃશામ્ ।
શત્રુપક્ષં સમાલિગ્ય નિર્ગચ્છેચ્છા હિ ચેન્નૃપ

અથ બિભીષણો મન્દિરં ગત્વા રામાન્તિકં ગત્વા તં શરણમભજત્

અથ રાવણઃ પુરાન્નિર્ગત્ય રામેણ લક્ષ્મણવાનરૈ રાક્ષસા અપિ યુયુધિરે

અથ રાવણં મહાબલં હન્તુમશક્તોરામો વિભીષણમુખમવલોક્ય તદુક્તચિહ્નપદં બાણેન નિર્ભિદ્યામારયત્

અથ કુમ્ભકર્ણો મહાગદામાદાય સર્વં નિષ્પાદ્ય વાનરાનનેકશો ભક્ષયિત્વા રામોત્તમાઙ્ગં ગદયાઽહન્

અથ રામો નિશિતબાણશતેન તમહન્મમાર કુમ્ભકર્ણઃ

અથ વિભીષણેન રાવણાદેઃ શ્રાદ્ધાદિકં કારયિત્વા શિવાલયં તન્નામ્ના કારયિત્વા તમેવ લઙ્કારાજ્યે વિભીષણમભિષિચ્ય સીતામગ્નિપ્રવેશશુદ્ધામુમામહેશ્વરાભ્યાં નમયિત્વા પુરહરેણ દત્તાખિલામૃતબલાયુષ્યઃ સુપુષ્પકમારુહ્ય જલધિમુત્તીર્ય પારાવારતટે સેનાં સમવસ્થાપ્ય શિવપ્રતિષ્ઠાં તત્ર કૃત્વા મુનિભિર્દેવૈરભ્યર્ચિતોઽયોધ્યામગમત્

અથ ભરતાદિસમુપેતો નાગરૈર્વસિષ્ઠેન મુનિભિશ્ચાભ્યર્ચિતઃસ્વગૃહમગમત્

આત્મનાઽગતાનિન્દ્રા દિદેવાનાસનાદિનાઽભ્યર્ચ્ય વાનરાન્સંપૂજ્ય મુક્તજટોઽભિષિક્તો રાજ્યે રાવણવધહર્ષિતા દેવા રામમૂચુઃ

ત્વયાઽત્મરાજ્યે સ્થાપિતા વયં નઃ સર્વદા પરિપાલય ત્વમાદિનારાયણો દેવો નિખિલદુષ્ટનિગ્રહાર્થમવતીર્ણો રાવણં સબાન્ધવં હત્વા લોકત્રયરક્ષકોઽસિ શ્રિયા સહ સુખી ભવેત્યુદીર્ય સ્વર્ગં ગતાઃ

અથાયોધ્યાવાસિનો રામં પ્રહર્ષિતા ઊચુઃ

હત્વા શત્રૂન્સમાયાતો દૃષ્ટ્વા પ્રાપ્તોઽસિ વૈ શિવમ્ ।
દિષ્ટ્યા ત્વં રાજસે રામ દિષ્ટ્યા પાલયસે પ્રજાઃ

ત્વયા યજ્ઞાઃ કરિષ્યંતે ત્વયા ધર્મો વિવર્ધતે ।
ઇતિપૌરવચઃશ્રુત્વારામો રાજીવલોચનઃ

વસ્ત્રાદિભિરથોસર્વાન્નાગરાન્સમપૂજયત્ ।
મુનીનુવાચધર્મ્માત્માપૂજયિત્વાખિલૈર્જનૈઃ

કચ્ચિત્તપઃસમૃદ્ધંવઃકચ્ચિદ્યજ્ઞઃસ્વનુષ્ઠિતઃ ।
કચ્ચિત્સ્વદારનિરતાઃકચ્ચિદીશોભિપૂજ્યતે

કચ્ચિત્સુપ્રજસોભાર્યાઃકચ્ચિત્સર્વંસુખોત્તરમ્

મુનય ઊચુઃ -
ત્વયિ રાજનિ કાકુત્સ્થ સર્વં સ્વસ્થં તપસ્વિનામ્ ।
ગચ્છામહે પદમિતઃ કિં વા ત્વં મન્યસે નૃપ

રામ ઉવાચ-
યસ્ય વિપ્રાઃ પ્રસીદંતિ તસ્ય શંભુઃ પ્રસીદતિ ।
યસ્ય પ્રસીદતીશાનસ્તસ્ય ભદ્રં ભવિષ્યતિ

તત્કૃત્વા ભોજનમિહ ગંતુમર્હા અનંતરમ્ ।
અથેત્યુક્ત્વા મુનિગણાઃ કૃત્વા ભોજનમુત્તમમ્

અભિવર્ધ્યતમાશીર્ભિર્હૃષ્ટાઃ સ્વં સ્વં પદં યયુઃ ।
રામોઽપિ પરમપ્રીતઃ સભાર્યશ્ચ સહાનુજઃ

અકંટકં સ કૃતવાન્રાજ્યં સર્વજનપ્રિયઃ ।
શૃણોત્યેતદુપાખ્યાનં યઃ કશ્ચિદપિ પાતકી

સર્વપાપવિનિર્મુક્તઃ પરં બ્રહ્માધિગચ્છતિ ।
ન દુર્ગતિર્ભવેત્તસ્ય યશ્ચેદં સ્મરતે નરઃ

યશ્ચાપિ કીર્તયેત્તસ્ય એવમેતદુદીરિતમ્

ઇતિ શ્રીપદ્મપુરાણે પાતાલખંડે શિવરાઘવસંવાદે પુરાકલ્પીયરામાયણકથનંનામ ષોડશોત્તરશતતમોઽધ્યાયઃ