પદ્મ પુરાણ · અધ્યાય 5.106

શુચિસ્મિતોવાચ-
આયુષ્યવર્દ્ધનં ભસ્માશનં દૃષ્ટં મહામુને ।
પરલોકગતિં દાતું શક્તમેતં વદસ્વ મે

દધીચ ઉવાચ-
અત્ર તે કથયિષ્યામિ ઇતિહાસં પુરાતનમ્ ।
ચિત્રગુપ્તયમાભ્યાં ચ યદ્વિખ્યાતં બભૂવ હ

મિથિલાયાં પુરા કશ્ચિચ્છુનઃ પર્યટતે ક્ષુધા ।
પુરા જન્મશતાત્પૂર્વં બ્રાહ્મણઃ પાપનિશ્ચયઃ

પૂર્વેવયસિ વેદાઢ્યઃ શાસ્ત્રાઢ્યશ્ચ સુબુદ્ધિમાન્ ।
સ સ્નાતું જાહ્નવીં ગત્વા સ્નાનં કૃત્વા પિતૄનપિ

દેવાનૃષીન્સમભ્યર્ચ્ય યયૌ પ્રાત્તલિકાપુરમ્ ।
પ્રતિશ્રયમથો ચક્રે બ્રાહ્મણસ્ય નિવેશને

તત્રૈકા ક્ષત્રિયસુતા યૌવનસ્થા હતપ્રિયા ।
ભ્રષ્ટરાજ્યા ચ ષટ્કોટિ નિષ્કદ્રવ્યેણ સંયુતા

ભુક્ત્વાથ શયિતં વિપ્રં સર્વાવયવસુંદરમ્ ।
રાત્રૌ ચંદ્રોદયે શુદ્ધે જ્યોત્સ્નાહસિતદિઙ્મુખે

બ્રાહ્મણાભ્યાશમાગત્ય તમુદીક્ષ્યેદમબ્રવીત્ ।
કુતસ્ત્વમાગતો વિપ્ર કં વા દેશં ગમિષ્યસિ

બ્રાહ્મણ ઉવાચ-
અકાલચર્યા સર્વેષાં શંકામુત્પાદયેદ્ધ્રુવમ્ ।
વયઃસ્થયોર્મિથોવાદો રહસ્યે હાસ્યમંદિરે

ક્ષત્રિયોવાચ-
કથાપ્રસંગે યાત્રાયાં તીર્થે દેશાદિ વિપ્લવે ।
દુર્ભિક્ષે ગ્રામદહને રહોવાદો ન દૂષિતઃ

પ્રતિશ્રયસ્તુ મદ્ગેહે ભવતૈવ પુરા કૃતઃ ।
મદ્ગેહવાસિની ચાહં ન શંકા ત્વિહ કસ્યચિત્

બ્રાહ્મણ ઉવાચ-
તૂષ્ણીંભાવો મયા કાર્યો ગચ્છ ત્વં શીઘ્રમગ્રતઃ ।
ઇત્યુક્તા બ્રાહ્મણેનાસૌ મનસેદમચિંતયત્

અનેન સંગમો મહ્યં યથાભૂયાત્તથાવિધિ ।
રોદનં તુ કરિષ્યામિ તથા યાસ્યતિ સાંત્વિતુમ્

માં ચ સાંત્વયિતું પ્રાપ્તો માં સમુત્થાપયિષ્યતિ ।
અહમુત્તિષ્ઠમાનૈવ દોર્લતાકંઠસંગિની

કુચયુગ્મેન તદ્ગાત્રં સ્પર્શયંતી વિમૂર્ચ્છિતા ।
ગતભાનાં હિ માં દૃષ્ટ્વા નિષણ્ણઃ સ્વયમેવ સઃ

ઉત્સંગે મામકં દેહં નિધાસ્યતિ દ્વિજાગ્રણીઃ ।
અચેતનેવ વસનમપાસ્ય રુદતીવ ચ

સુસ્નિગ્ધં રોમરહિતં પક્વાશ્વત્થદલાકૃતિ ।
દર્શયિષ્યામિ તત્સ્થાનં કામગેહં સુગંધિ ચ

મયૈવ વિલુઠંત્યાંગે તસ્ય વસ્ત્રમપાસ્યતે ।
વિલુપ્યમાનસં તસ્ય કરિષ્યે સ્વવશં દ્વિજમ્

અદૃષ્ટૌ યાદૃશં ચિત્તં દૃષ્ટૌ નૈતાદૃશં ભવેત્ ।
દર્શને યાદૃશં ચિત્તં સંલાપે નૈવ તાદૃશમ્

સંલાપે યાદૃશં ચિત્તં હાસ્યોક્તૌ નૈવ તાદૃશમ્ ।
હાસ્યોક્તૌ યાદૃશં ચિત્તં સ્પર્શને નૈવ તાદૃશમ્

સ્પર્શને યાદૃશં ચિત્તં યોનિદૃષ્ટૌ ન તાદૃશમ્ ।
તદ્દૃષ્ટૌ યાદૃશં ચિત્તં યોનિસ્પર્શે ન તાદૃશમ્

બાહુમૂલકુચદ્વંદ્વ સ્વયોનિસ્પર્શદર્શનાત્ ।
કસ્ય ન સ્ખલતે ચેતો રેતઃ સ્કન્નં ચ નો ભવેત્

દધીચ ઉવાચ-
ઇતિ સંચિંત્ય મનસા ક્ષત્રિયા ગૃહમભ્યગાત્ ।
સ્વગૃહદ્વારમાસાદ્ય મંદં મંદં રુરોદ વૈ

ચિરં કાલં ચ રુદિતં બ્રાહ્મણઃ કરુણાનિધિઃ

સ્ત્રીબાલવૃદ્ધાતુર રાજયોગિનાં વિષાગ્નિતોયાદ્રિ નિપાતનાદિના ।
દુઃખસ્ય ચૈવોદ્ધરણં પ્રશસ્યતે કૂપસ્યદાનેન સમં વદંતિ

ઇત્થં વિચાર્ય વિપ્રોઽસૌ શુચિર્ભૂતઃ પ્રસન્નધીઃ ।
તસ્યાઃ સમીપમગમત્તામુવાચ તતો દ્વિજઃ

અલં શોકેન મહતા ઇહામુત્ર વિરોધિના ।
શરીરશોષણં હ્યેતચ્ચિત્તવિધ્વંસનં તથા

ત્યજ શોકમિમં બાલે ન ચાર્થઃ શોચિતેન વૈ ।
શોકસ્ય કારણં કિં વા યેનેત્થં રુદ્યતે ત્વયા

દધીચ ઉવાચ-
એવમુક્તા દ્વિજેનાથ ન સા કિંચિદુવાચ હ ।
મૂર્ચ્છિતેવાપતદ્ભૂમૌ તમદૃષ્ટ્વેવ વીક્ષતે

તામથોત્થાપયામાસ બ્રાહ્મણઃ પરમાર્થવિત્ ।
ઉત્થિતોત્થાપિતા તેન નિપપાત પુનઃ પુનઃ

પતિતાં પતિતાં વિપ્રો નિષદ્યોત્થાપ્ય તાં પુનઃ ।
અંકમારોપયામાસ પ્રમમાર્જ વિલોચને

અથ સા મૂર્ચ્છિતેવાશુ વસનં પરિમુચ્ય તમ્ ।
દર્શયંતી સ્તનૌ ગુહ્યં બાહુમૂલે વિલોચને

આલંબ્ય કંઠે બાહુભ્યાં સ્તનાભ્યામસ્પૃશદ્દ્વિજમ્ ।
ચંદ્રાતપશ્ચ વિશદો મંદમારુતસંભવઃ

અથ ચિંતાપરો વિપ્રો નૈવ કાર્યમિદં મમ ।
પિતુર્વા માતુરુચિતં પત્યુર્વાથ ગુરોસ્તથા

અસંબુદ્ધસ્ય મે સર્વં વિપરીતં વિભાતિ વૈ ।
અથ કામઃ સમાયાતો રહસ્યે સ્થિતયોસ્તયોઃ

વિવ્યાધ નિશિતૈર્બાણૈર્દ્વિજં કામો દુરાત્મવાન્ ।
સ્મરબાણાતુરો વિપ્રશ્ચિંતયામાસ કામુકઃ

ઇયં સુચારુ સર્વાંગી કામિનીવ પ્રદૃશ્યતે ।
નોચેદ્યોનિમુખે હ્યસ્યાઃ કથં રોમાંચસંભવઃ

તદેતસ્યાઃ કુચસ્પર્શાત્સર્વં વ્યક્તં ભવિષ્યતિ ।
ઇતિ સંચિંત્ય મનસા કુચૌ યોનિં દ્વિજોઽસ્પૃશત્

સાપિ મૂર્ચ્છિતરૂપેવ મંદસ્મિતમુખાભવત્ ।
આલિલિંગ દ્વિજં ગાઢમાનનં ચ ચુચુંબ હ

તયોરથ સમાયોગો વર્ષાણાં શતમપ્યભૂત્ ।
ગતે વર્ષશતે પશ્ચાદેકસ્મિન્દિવસે દ્વિજઃ

સ્નાતું યયૌ નદીં પ્રાતઃ સાપિ વિપ્રપ્રસંગતઃ ।
સ્નાનં તત્ર તથા ચક્રે પુરાણં શ્રુતવાનથ

કૌર્મં સમસ્તપાપાનાં નાશનં શિવભક્તિદમ્ ।
ઇદં ચ પદ્યં શુશ્રાવ પુરાણજ્ઞેન ભાષિતમ્

બ્રહ્મહા મદ્યપઃ સ્તેનસ્તથૈવ ગુરુતલ્પગઃ ।
કૌર્મં પુરાણં શ્રુત્વૈવ મુચ્યતે પાતકાત્તતઃ

શ્રુત્વૈતદ્વચનં વિપ્રઃ પૌરાણિકમભાષત ।
મયા કૃતાનાં પાપાનાં ન ચ સંખ્યાસ્તિ કાચન

અશેષપાપસંદોહનાશનં તદિહોચ્યતામ્ ।
પૌરાણિક ઉવાચ-
આરાધય સ્વદેવેશં શંકરં ત્રિદશેશ્વરમ્

તસ્ય સંપૂજનાદ્વિપ્ર સર્વં પાપં વિનશ્યતિ ।
પાપમેવ તમઃ પ્રોક્તં જ્ઞાનદીપેન નશ્યતિ

અથવા પૂજયા વિપ્ર સમસ્તાઘવિનાશનમ્ ।
જ્ઞાનપૂજાવિહીનાનાં નરકે પતનં ધ્રુવમ્

દધીચ ઉવાચ-
અથ દ્વિજો હ્યભિગતઃ શિવાલયમનુત્તમમ્ ।
દ્રોણપુષ્પસહસ્રેણ પૂજયામાસ શંકરમ્

ગૃહં જગામ ચ તતો ભોજનં કૃતવાનથ ।
વિહાય ક્ષત્રિયાં વિપ્રો જગામેષ્ટાં ભુવં તતઃ

હવિષ્યમન્નમાદાય ભુક્ત્યશક્તેઃ શિવાલયમ્ ।
ગત્વા દીપસ્થિતાજ્યેન ભોજનં કૃતવાન્બહિઃ

અથ મૃત્યુવશં પ્રાપ્તો યમલોકં જગામ વૈ ।
યમ ઉવાચ-
ત્વયા કૃતાનાં પાપાનાં કેષાંચિન્નાશનં પુરા

ત્વયૈકદિવસે પૂજા શંકરસ્ય યતઃ કૃતા ।
તવ પાપસહસ્રં ચ પ્રણષ્ટં ભવતો દ્વિજ

સ્થિતાનામપિ પાપાનાં ફલં નરકપાતનમ્ ।
વર્ષકોટિદ્વયં વિપ્ર શ્વાનજન્મશતં પુનઃ

શિવદીપાજ્યહરણાત્ફલં નરકસેવનમ્ ।
નરકે ચ સ્થિતિસ્તસ્ય શતવર્ષં સુભીષણમ્

કુંભીપાકે ચ કાષ્ઠત્વં ભસ્મ ભૂત્વા પુનઃ પુનઃ ।
વર્ષાણાં દશકં ત્વેવં કૃમિભુક્તિઃ પરં દશ

પુનશ્ચ દીપવર્તિત્વં વર્ષાણાં ચ તથા દશ ।
શ્લેષ્મામેધ્યપુરીષેષુ મૂત્રરેતોહ્રદેષુ ચ

ઉન્મજ્જ્ય ચ નિમજ્જ્યાથ શ્લેષ્મવિણ્મલભોજનમ્ ।
તતો નરકશેષેણ શ્વાનજન્મશતં પરમ્

યમવાક્યમિતિ શ્રુત્વા બ્રાહ્મણો નિપપાત ચ ।
અથ તસ્ય પ્રિયા ભાર્યા પતિચિંતાપરાભવત્

એતસ્મિન્નંતરે તસ્યાઃ સમીપં નારદોઽભ્યગાત્ ।
નારદસ્ય પપાતાસૌ પાદયોરતિદુઃખિતા

તામુત્થાપ્ય મુનિઃ શુદ્ધાં ગતાયુષમભાષત ।
અયિ મુગ્ધે વિશાલાક્ષિ ભર્તારં ગંતુમર્હસિ

ભર્તા તે હિ વિશાલાક્ષિ મૃતો બંધુવિવર્જિતઃ ।
ન રોદિતવ્યં તે ભદ્રે જ્વલનં પ્રવિશસ્વ ભોઃ

બ્રાહ્મણ્યુવાચ-
અશક્યં યદિ વા શક્યં મયા ગંતું મુને વદ ।
અગ્નિપ્રવેશકાલો વૈ વ્યતીતો ન ભવેદ્યથા

નારદ ઉવાચ-
યોજનાનાં શતં ત્વેકમિતઃ સ્થાનાત્પુરં હિતત્ ।
શ્વો દાહઃ કિલ વિપ્રસ્ય ભવિતા ગંતુમર્હસિ

અવ્યયોવાચ-
દૂરસ્થિતં કાયનાથં ગંતુમર્હામિ હે મુને ।
તદ્વચસ્તુ સમાકર્ણ્ય નારદસ્તામભાષત

વિપંચી નાલસંસ્થા ત્વં ભવ ગચ્છામ્યહં ક્ષણાત્ ।
ઇત્યુદીર્ય તદા ગત્વા ત્વરાં ચક્રે ગતં ચ તત્

દેશં નષ્ટદ્વિજસ્થાનં તામુવાચાવ્યયાં મુનિઃ ।
રોદનં નેહ કર્તવ્યં યદિ તત્રાગ્નિમેષ્યસિ

પાપં યદિ કૃતં ભદ્રે પરપૂરુષસેવનમ્ ।
એતદ્વિશુદ્ધયે પુત્રિ પ્રાયશ્ચિત્તં સમાચર

તવોપપાતકવ્રાત નાશો વહ્નિપ્રવેશનાત્ ।
નાન્યત્પશ્યામિ નારીણાં સર્વપાપોપશાંતયે

અગ્નિપ્રવેશં મુક્ત્વૈકં પ્રાયશ્ચિત્તં જગત્ત્રયે ।
દધીચ ઉવાચ-
અથ નારદવાક્યેન નોદિતા સા વચોઽબ્રવીત્

અગ્નિપ્રવેશે નારીણાં કિં કર્તવ્યં મહામુને ।
નારદ ઉવાચ-
સ્નાનં મંગલસંસ્કારો ભૂષણાંજનધારણમ્

ગંધપુષ્પં તથા ધૂપં હરિદ્રાક્ષતધારણમ્ ।
મંગલં ચ તથા સૂત્રં પાદાલક્તકમેવ ચ

શક્ત્યા દાનં પ્રિયોક્તિશ્ચ પ્રસન્નાસ્યત્વમેવ ચ ।
નાનામંગલવાદ્યાનાં શ્રવણં ગીતકસ્ય ચ

વ્યભિચારકૃતે પાપે તત્પાપસ્ય પ્રશાંતયે ।
અતીતં પાતકં સ્પૃષ્ટ્વા પ્રાયશ્ચિત્તં તદીરિતમ્

કુર્યાદથ સ્વકાં ભૂષાં વિપ્રાય પ્રતિપાદયેત્ ।
ભૂષાભાવે સ્વકીયેન પ્રાયશ્ચિત્તં તુ કારયેત્

નાન્યથા તસ્ય પાપસ્ય નાશનં વેતિ કુત્રચિત્ ।
અવ્યયોવાચ-
સર્વમેતત્કરિષ્યામિ હરિદ્રા મે ન વિદ્યતે

ભૂષણં કિમુત બ્રહ્મન્સર્વમેતત્પ્રદીયતામ્ ।
નારદ ઉવાચ-
ન હ્યસ્તિ કિંચિત્સૌભાગ્યદ્રવ્યમન્યત્ત્વપેક્ષયા

દધીચ ઉવાચ-
અથ ક્ષણેનાભ્યગમત્કૈલાસં શિવમંદિરમ્ ।
ગિરિજામથ દૃષ્ટ્વાસૌ પ્રણિપત્યેદમબ્રવીત્

હરિદ્રા દીયતાં માતર્ભૂષણાનિ ચ સૂત્રકમ્ ।
પાર્વત્યુવાચ-
વિધવાયૈ મયા કિંચિદ્ભૂષણં દીયતાં કથમ્

મયા દત્તે હિ તસ્મિન્વૈ વૈધવ્યં નોપપદ્યતે ।
નારદ ઉવાચ-
માતર્ન વિધવા યાવદ્ધવાંગં વર્તતે સ્ત્રિયઃ

આદાહાત્સૂતકં નાસ્તિ તિષ્ઠેત્સૌભાગ્યમુત્તમમ્ ।
પાર્વત્યુવાચ-
ન ચાન્યદેહો મદ્ભૂષાં હરિદ્રાં ધર્તુમર્હતિ

ભૂષણાદૌ મયા દત્તે ચિરંજીવિતમિષ્યતે ।
દીયતે હિ જયંત્યૈવ સર્વમેતત્ત્વયોદિતમ્

જયંતીં સ જગામાથ તયા દત્તમથાહરત્ ।
સ્નપંત્યા અવ્યયાયાસ્તુ હરિદ્રાં દત્તવાન્મુનિઃ

તતઃ સ સૂક્ષ્મવસનભૂષણાનિ મુનિર્દદૌ ।
આહ ચૈનાં તવાંતેષ્ટિં કઃ કરોતિ નિયુંક્ષ્વ તમ્

અવ્યયોવાચ-
ત્વયૈવ મે સમસ્તાનાં ક્રિયાણાં કારણં મુને ।
પિતાસિ સર્વં કુર્વદ્ય નમસ્તે મુનિસત્તમ

દધીચ ઉવાચ-
અથ તં બ્રાહ્મણં દગ્ધ્વા નારદસ્તામુવાચ હ ।
અવ્યયે ગચ્છ દહનં પ્રવિશ ત્વં યદીચ્છસિ

અથ સા ભૂષિતા સાધ્વી ત્રિઃપ્રદક્ષિણપૂર્વકમ્ ।
નારદં તુ નમસ્કૃત્ય ગૌરાંગીમર્પયન્મનઃ

સુસૂક્ષ્મં મંગલંસૂત્રં હરિદ્રામક્ષતાંસ્તથા ।
કુસુમાનિ ચ વાસાંસિ કસ્તૂરીચંદનં તથા

સૌવર્ણકંકતિકાં ચ ફલાનિ વિવિધાનિ ચ ।
સ્વદક્ષિણાદિવસ્ત્રાંતં સ્પર્શયિત્વા પૃથક્પૃથક્

પાર્વતીપ્રીતિકામા સા પુરંધ્રીભ્યોઽખિલં દદૌ ।
જ્વાલામાલાભિરાકાશં દહંતમિવ ચાનલમ્

ત્રિઃપ્રદક્ષિણમાગત્ય સ્થિત્વાગ્નેઃ પુરતઃ સતી ।
ઇદં પ્રાહ તદા વાક્યં પ્રાંજલિઃ પ્રહસન્મુખી

અવ્યયોવાચ-
ઇંદ્રાદયો દિશાંપાલા માતર્મેદિનિ ભાસ્કર ।
ધર્માદયઃ સુરાઃ સર્વે શૃણુધ્વં મમ ભાષિતમ્

પાણિપીડનમારભ્ય ચૈતદંતમહર્નિશમ્ ।
વાઙ્મનઃકર્મભિર્ભર્તા સેવિતો યદિ ભક્તિતઃ

વ્યભિચારો યથા ન સ્યાદવસ્થાત્રિતયે મમ ।
તેન સત્યેન મે પત્યા સાર્દ્ધં યાનં પ્રયચ્છત

ઇત્યુક્ત્વાથ સ્વહસ્તાગ્રપુષ્પકં દ્રુતમાક્ષિપત્ ।
પ્રવિષ્ટા જ્વલનં દીપ્તમથાપશ્યદ્વિમાનકમ્

સૂર્યેણ સમમુત્કૃષ્ટમપ્સરોગીતશોભિતમ્ ।
આરુરોહ વિમાનં સા ભર્ત્રા સાકં દિવં યયૌ

યમઃ પ્રાહાથ સંપૂજ્ય વનિતાં તાં પતિવ્રતામ્ ।
અક્ષયઃ સ્વર્ગ એવેહ ન ચ પાપં તવાસ્તિ વૈ

કોટિદ્વયસમાસ્તત્ર નરકે હંત પાતકમ્ ।
મૃષ્ટમેવ ન સંદેહઃ કિંતુ પાતકમેવ ચ

એકં શિવસ્ય દીપાજ્યભક્ષણેન સમર્જિતમ્ ।
ન વાપિ નરકે પાતઃ શ્વાનજન્મશતં ભવેત્

અવ્યયોવાચ-
અગ્નિપ્રવેશશુદ્ધાનાં પુનશ્ચ નરકઃ કથમ્ ।
અગ્નિપ્રવેશાત્સર્વેષાં પાપાનાં નાશનં ભવેત્

યમ ઉવાચ-
શિવદ્રવ્યાપહારસ્ય પાતકં નૈવ નશ્યતિ ।
ઇત્થમાહપુરા શંભુરન્યેષાં નાશનં ભવેત્

અથ સ શ્વાનતામાપ્ય શતાબ્દં સ્યાત્તતઃ પરમ્ ।
દધીચમંદિરં પ્રાપ્તો મૃત્યોરાસ્ય ગતો હિ સઃ

તસ્ય ભિત્તિસમીપે તુ ભસ્માસ્તે હ્યભિમંત્રિતમ્ ।
ભસ્મનિ શ્વા પપાતાથ મમાર ચ ગતો યમમ્

યમઃ સંપૂજ્યાવનતો ભવાન્પુણ્યતમો મુનિઃ ।
મદ્ગેહે ભવતઃ સ્થાનં ન યોગ્યં ગમ્યતાં બહિઃ

અથ ગત્વા બહિસ્તસ્થૌ સારમેયો યમોદિતઃ ।
સંતાપાવસ્થિતં તં ચ નારદો દૃષ્ટવાનમુમ્

પપ્રચ્છ ચ કિમર્થં ત્વમિહ તિષ્ઠસિ દીપ્તિમાન્ ।
શિવભસ્મસ્થિતમૃતં શૈવં જાને મહામતે

શૈવાનાં પાપિનાં ચાપિ સાહસેન તનુત્યજામ્ ।
યમલોકો ન ચાસ્તીતિ શિવાજ્ઞા શિવનોદિતા

દધીચ ઉવાચ-
ઇત્થમાભાષ્ય તં શ્વાનં કૈલાસમગમન્મુનિઃ ।
દંડવત્પ્રણિપત્યેશં વ્યજ્ઞાપયદથો હરમ્

દેવ કશ્ચિદ્યમપુરાદ્બહિરાસ્તે સ કુક્કુરઃ ।
ભસ્મન્યેવ મૃતસ્તદ્વદ્ભવલોકં સ ચાર્હતિ

અથ મુખ્યગણાવિષ્ટો વીરભદ્રઃ શિવેરિતઃ ।
આનયામાસ તં શ્વાનં દિવ્યરૂપધરં તદા

મહેશપાદપ્રણતં દેવાયાથ વ્યજિજ્ઞપત્ ।
આહ માહેશ્વરો દેવં ગણમેનં કુરુષ્વ મે

તથેતિ ચ શિવઃ પ્રાહ ગણઃ શ્વાનમુખોઽભવત્ ।
દધીચ ઉવાચ-।
અતુલ્યં ભસ્મમાહાત્મ્યં મયોક્તં તે શુચિસ્મિતે

ઇતઃ પરં હિ કિં ભૂયઃ શ્રોતુમિચ્છસિ સુવ્રતે

ઇતિ શ્રીપદ્મપુરાણે પાતાલખંડે શિવરાઘવસંવાદે વિભૂતિમાહાત્મ્યે ષડુત્તરશતતમોઽધ્યાયઃ