પદ્મ પુરાણ · અધ્યાય 4.9

સૂત ઉવાચ-
તતોઽમરગણાસ્તે ચ સગંધર્વાઃ સદાનવા ।
ઉત્પાટ્ય મંદરં શૈલં ચિક્ષિપુઃ પયસાં નિધૌ

તતઃ સનાતનઃ શ્રીમાન્દયાલુર્જગદીશ્વરઃ ।
અધારયદ્ગિરેર્મૂલં કૂર્મરૂપેણ પૃષ્ઠતઃ

અનંતં તત્ર સંવેષ્ટ્ય મમંથુર્દુગ્ધસાગરમ્ ।
એકાદશ્યાં મથ્યમાને ચોદ્ભૂતં પ્રથમં દ્વિજ

કાલકૂટવિષં તે તુ દૃષ્ટ્વા સર્વે પ્રદુદ્રુવુઃ ।
તતસ્તાન્વિદ્રુતાન્દૃષ્ટ્વા શંકરશ્ચોક્તવાનિદમ્

ભોભોઽમરગણા યૂયં વિષં કુરુતમાદરમ્ ।
વારયિષ્યામ્યહં તૂર્ણં કાલકૂટં મહાવિષમ્

ઇત્યુક્ત્વા પાર્વતીનાથો ધ્યાયન્નારાયણં હૃદિ ।
મહામંત્રં સમુચ્ચાર્ય વિષમાદદ્ભયંકરમ્

મહામંત્રપ્રભાવેણ વિષં જીર્ણં ગતં મહત્ ।
અચ્યુતાનંતગોવિંદ ઇતિ નામત્રયં હરેઃ

યોજપેત્પ્રયતો ભક્ત્યા પ્રણવાદ્યં નમોંઽતિકમ્ ।
વિષભોગાગ્નિજં તસ્ય નાસ્તિ મૃત્યોર્ભયં તથા

તતો હૃષ્ટમના દેવા મમંથુઃ ક્ષીરસાગરમ્ ।
તતોઽલક્ષ્મીઃ સમુત્પન્ના કાલાસ્યા રક્તલોચના

રૂક્ષપિંગલકેશા ચ જરતીં બિભ્રતી તનુમ્ ।
સા ચ જ્યેષ્ઠાબ્રવીદ્દેવાન્કિંકર્તવ્યં મયેતિ વૈ

દેવાસ્તથાબ્રુવંસ્તાં ચ દેવીં દુઃખસ્યભાજનમ્ ।
યેષાં નૄણાં ગૃહે દેવી કલહઃ સંપ્રવર્તતે

તત્ર સ્થાનં પ્રયચ્છામો વસ જ્યેષ્ઠે શુભાન્વિતા ।
નિષ્ઠુરં વચનં યે ચ વદંતિ યેઽનૃતં નરાઃ

સંધ્યાયાં યે હિ ચાશ્નંતિ દુઃખદા તિષ્ઠ તદ્ગૃહે ।
કપાલકેશભસ્માસ્થિ તુષાંગારાણિ યત્ર તુ

સ્થાનં જ્યેષ્ઠે તત્ર તવ ભવિષ્યતિ ન સંશયઃ ।
અકૃત્વા પાદયોર્ધૌતં યે ચાશ્નંતિ નરાધમાઃ

તદ્ગૃહે સર્વદા તિષ્ઠ દુઃખદારિદ્રદાયિની ।
વાલુકાલવણાંગારૈઃ કુર્વંતિ દંતધાવનમ્

તેષાં ગેહે સદા તિષ્ઠ દુઃખદા કલિના સહ ।
છત્રાકં શ્રીફલં શિષ્ટં યે ખાદંતિ નરાધમાઃ

ગેહે તેષાં તવ સ્થાનં જ્યેષ્ઠે કલુષદાયિનિ ।
તિલપિષ્ટમલાબું યે ગૃંજનં પોતિકાદલમ્

કલં બુકં પલાંડું યે ચાશ્નંતિ પાપબુદ્ધયઃ ।
તેષાં ગૃહે તવ સ્થાનં ભવિષ્યતિ ન સંશયઃ

ગુરુ દેવાતિથીનાં ચ યજ્ઞદાનવિવર્જિતમ્ ।
યત્રવેદધ્વનિર્નાસ્તિ તત્ર તિષ્ઠ સદાઽશુભે

દંપત્યોઃ કલહો યત્ર પિતૃદેવાર્ચનં ન વૈ ।
દુરોદરરતા યત્ર તત્ર તિષ્ઠ સદાશુભે

પરદારરતા યત્ર પરદ્રવ્યાપહારિણઃ ।
વિપ્રસજ્જનવૃદ્ધાનાં યત્ર પૂજા ન વિદ્યતે ।
તત્ર સ્થાને સદા તિષ્ઠ પાપદારિદ્ર્યદાયિની

ઇત્યાદિશ્ય સુરા જ્યેષ્ઠાં સર્વેષાં કલિવલ્લભામ્ ।
ક્ષીરાબ્ધેર્મથનં ચક્રુઃ પુનસ્તે સુસમાહિતાઃ

ઇતિ શ્રીપાદ્મે મહાપુરાણે બ્રહ્મખંડે સૂતશૌનકસંવાદે સમુદ્રમથનંનામ નવમોઽધ્યાયઃ