પદ્મ પુરાણ · અધ્યાય 4.10

સૂત ઉવાચ-
ઐરાવતસ્તતો જજ્ઞે તથૈવોચ્ચૈઃશ્રવા હયઃ ।
ધન્વંતરિઃ પારિજાતઃ સુરભિશ્ચાપ્સરોદયઃ

તતઃ પ્રભાતસમયે દ્વાદશ્યામુદિતે રવૌ ।
ઉત્પન્ના શ્રીર્મહાલક્ષ્મીઃ સર્વલક્ષણશોભિતા

દદૃશુસ્તાં મહાદેવીં માતરં ધર્મદેવતાઃ ।
પ્રહૃષ્ટાઃ સર્વજંતૂનાં શ્રીકૃષ્ણહૃદયાલયામ્

લક્ષ્મીભ્રાતા શીતરશ્મિર્જાતશ્ચ સુધયા તતઃ ।
ઉત્પન્ના સા હરેર્જાયા તુલસી લોકપાવની

તં શૈલં પૂર્વવત્સ્થાપ્ય પરિપૂર્ણમનોરથાઃ ।
સમેત્ય માતરં સ્તુત્વા જેપુઃ શ્રીસૂક્તમુત્તમમ્

તતઃ પ્રસન્ના સા દેવી સર્વાન્દેવાનુવાચ હ ।
વરં વૃણીધ્વં ભદ્રં વો વરદાહં સુરોત્તમાઃ

દેવા ઊચુઃ-
પ્રસીદ કમલે દેવિ સર્વમાતર્હરિપ્રિયે ।
ત્વયા વિના જગચ્છૂન્યં કુરુ પ્રાણપ્રરક્ષણમ્

ઇત્યુક્તા સા મહાલક્ષ્મીઃ પ્રાહ નારાયણપ્રિયા ।
ઇદાનીં સર્વજંતૂનાં પ્રાણરક્ષાં કરોમ્યહમ્

તતો નારાયણઃ શ્રીમાઞ્છંખચક્રગદાધરઃ ।
આવિર્બભૂવ સહસા દયાલુર્જગદીશ્વરઃ

તતસ્તે તુષ્ટુવુર્દેવાઃ પ્રણમ્ય જગતાં પતિમ્ ।
કૃતાંજલિપુટાઃ પ્રોચુઃ હર્ષગદ્ગદભાષિણઃ

ગૃહાણ માતરં વિષ્ણો મહિષીં વલ્લભાં તવ ।
સંસારરક્ષણાર્થાય લક્ષ્મીમનપગામિનીમ્ ।
યાવત્પ્રતિજ્ઞાં નો ચક્રે તાવત્પ્રાહેંદિરા હરિમ્

લક્ષ્મીરુવાચ-
અવિવાહ્ય કથં જ્યેષ્ઠામલક્ષ્મીં મધુસૂદન ।
તસ્યાઃ કનિષ્ઠાં માં નાથ વિવાહં કર્તુમિચ્છસિ ।
જ્યેષ્ઠાયાં ચ સ્થિતાયાં વૈ કનિષ્ઠા પરિણીયતે

સૂત ઉવાચ-
ઇતિ શ્રુત્વા તતો વિષ્ણુર્દદૌ ચોદ્દાલકાય ચ ।
વેદવાક્યાનુરૂપેણ હ્યલક્ષ્મીં નિર્જરૈઃ સહ

તતો નારાયણઃ શ્રીમાન્લક્ષ્મીમંગીચકાર હ ।
તતઃ સુરગણાઃ સર્વે નમશ્ચક્રુઃ પુનઃપુનઃ

અથ તે ચાસુરાન્સર્વાન્જઘ્નુઃ સર્વે બલાધિકાઃ ।
સર્વે તે ક્રંદમાનાશ્ચ ગતાશ્ચૈવ દિશો દશ

સુધાં તત્ખાદિતું ચક્રુર્દેવાઃ પંક્તિં યથાક્રમમ્ ।
શ્રીવિષ્ણોરાજ્ઞયા સર્વે ચોચુશ્ચૈવ પરસ્પરમ્

ત્વં ચ દેહિ ત્વં ચ દેહિ ત્વં ચ દેહીતિ ચાબ્રુવન્ ।
ન શક્તોઽસ્મિ ન શક્તોઽસ્મિ ન શક્તોઽસ્મીતિ ચાબ્રુવન્

તતો વિષ્ણુઃ સમુત્તસ્થૌ સ્ત્રીરૂપં ચ દધાર હ ।
ચકાર સ્વર્ણપાત્રે તત્પીયૂષપરિવેષણમ્

પીયૂષભક્ષણં રાહુર્યાવત્કુર્યાદ્દ્વિજોત્તમ ।
ચંદ્રસૂર્યૌ ચોક્તવંતૌ રાક્ષસોઽસૌ છલાગતઃ

તતઃ ક્રુદ્ધો જગન્નાથો જઘાન સ્વર્ણપાત્રતઃ ।
શિરસ્તસ્ય પપાતોર્વ્યાં કેતુર્નામ્ના બભૂવ હ

રાહુકેતૂ તતસ્તૂર્ણં ગતૌ તૌ ભયવિહ્વલૌ ।
ઇદાનીં તદ્દિને પ્રાપ્તે ચંદ્રસૂર્યૌ સ યુધ્યતિ

કુર્યાદ્ગ્રાસં સૈંહિકેયસ્તત્ક્ષણં દુર્લભં ભવેત્ ।
સર્વં ગંગાસમં તોયં વેદવ્યાસસમા દ્વિજાઃ

સ્નાનં વાયસતીર્થે યો ગંગાસ્નાનફલં લભેત્ ।
દાનમક્ષયપુણ્યં સ્યાત્કોટિજન્માર્જિતં તથા

પાપં નશ્યેત્સમૂલં ચ કિં પુનઃ ક્રતુકોટિભિઃ ।
વિદ્યાર્થી લભતે વિદ્યાં પુત્રાર્થી પુત્રમાપ્યતે

મોક્ષાર્થી લભતે મોક્ષં મંત્રસિદ્ધિર્ભવેદ્ધ્રુવમ્ ।
ઇતિ તે કથિતં વિપ્ર સમુદ્રમથનં તુ તત્

ઇતિ શ્રીપાદ્મે મહાપુરાણે બ્રહ્મખંડે સૂતશૌનકાદિકસંવાદે સમુદ્રમથનંનામ દશમોઽધ્યાયઃ