પદ્મ પુરાણ · અધ્યાય 4.6

શૌનક ઉવાચ-
કેન પુણ્યેન ભો સૂત વૈકુંઠં સમવાપ્યતે ।
તદ્વદસ્વ શૃણ્વતો મે પોતો હિ ભવસાગરે

સૂત ઉવાચ-
સાધુસાધુ મુનિશ્રેષ્ઠ સર્વમંગલકારક ।
કથયામિ સમાસેન શૃણ્વતાં પાપનાશનમ્

વિષ્ણવે બ્રાહ્મણાયૈવ મૃદાવેશ્મવિનિર્મિતમ્ ।
યો વૈ દદ્યાદ્દ્વિજશ્રેષ્ઠ તસ્ય પુણ્યં નિશામય

વિષ્ણુલોકે ચ સ વિપ્રઃ સર્વપાપવિવર્જિતઃ ।
સૌધવાસી ભવેન્નિત્યં વિષ્ણુલોકે પ્રપૂજ્યતે

વિષ્ણવે સૌધગેહં યો દદ્યાદ્વૈ બ્રાહ્મણાય ચ ।
હરેર્ન્નિકેતનં પ્રાપ્ય સ્વર્ગવાસી ભવેદ્ધ્રુવમ્

અંતે વિષ્ણુપુરં ગત્વા યુક્તઃ કોટિકુલૈર્દ્વિજ ।
સ્વર્ણસૌધે ગૃહે સ્થિત્વા કુર્યાદ્ભોગં યથાસુખમ્

બ્રાહ્મણસ્થાપને પુણ્યં યદ્વૈ ભવતિ ભો મુને ।
સંખ્યાં કર્તુમશક્તસ્તુ તદ્વેધાઃ સર્વકારકઃ

ગણ્યંતે રેણવશ્ચૈવ ગણ્યંતે વૃષ્ટિબિંદવઃ ।
ન ગણ્યંતે વિધાત્રાપિ બ્રહ્મસંસ્થાપને ફલમ્

નારદેન પુરા બ્રહ્મા પૃષ્ટઃ સંસારસંભવઃ ।
વેધાસ્તં કથયામાસ તચ્છૃણુષ્વ મહામુને

પુરાસીદ્દ્વાપરે બ્રહ્મન્વારનારી સુશોભના ।
સુકેશી હરિણીનેત્રા સુમધ્યા ચારુહાસિની

નામ્ના સા ચંચલાપાંગી યયૌ દેશાંતરં કદા ।
સર્વપાપસમાયુક્તા નરકે પાતયંતિ ચ

સંગેન સિંધુનાકાંક્ષી જનાન્દેવાલયં ગતા ।
તત્ર ક્ષણં સોપવિષ્ટા તાંબૂલભક્ષણં કૃતમ્

શેષં ચૂર્ણં સૌધભિત્તૌ દત્વા નિમ્ને કુતૂહલાત્ ।
તતો ગતા જારકાંક્ષી ધનાર્થં નગરં પ્રતિ

જારેણ કેનચિત્સાર્દ્ધં સંકેતઃ સહસા કૃતઃ ।
સંકેતં તુ ગતા વેશ્યા વનં રાત્રૌ વિમોહિતા

સંકેતં નાગતો વૈશ્યો વ્યશંકિષ્ટવિલોકિતા ।
કથં કાંતો નાગતો મે સર્પવ્યાઘ્રૈશ્ચ ભક્ષિતઃ

સંકેતનં કથં હિત્વા ગતઃ કિં કામવિહ્વલઃ ।
અન્યયા જ્ઞાતયા સાર્દ્ધમભિલાષી ભવેત્કિમુ

પરામૃષ્યૈતધૃદ્યંતઃ કોટપાલભયાદ્દ્વિજ ।
નગરં નાગતા સા હિ રુદ્ધે લોકપથે તમૈઃ

એતસ્મિન્નંતરે વ્યાઘ્રઃ કામરૂપી બલાત્ક્ષુધી ।
પ્રેષિતઃ કાલદેવેનાગ્રસદાગત્ય તાં દ્વિજ

તતસ્તુ યમુનાભ્રાતુર્દૂતાસ્તે ભીમવર્ષિણઃ ।
આગતા ગિરિકૂટાંગા નેતું તાં પાપકર્મણા

વક્રપાદા વક્રમુખા ઉન્નાસા બહુદંષ્ટ્રિણઃ ।
ચર્મરજ્જૂર્મુદ્ગરાંશ્ચ ગૃહીત્વા પાંશુલાં દ્વિજ

બંધયામાસુરુન્મત્તા ગણિકાં ચર્મ્મરજ્જુભિઃ ।
શંખચક્રગદાપદ્મધારિણો વનમાલિનઃ

પ્રેષિતા દેવદેવેન તદ્ભક્તવત્સલેન ચ ।
કૃષ્ણજીમૂતસંકાશાઃ સ્ફુરદ્વદનપંકજાઃ

શ્રેણીધરાશ્ચારુનાસા દિવ્યકુંડલભૂષિતાઃ ।
દદૃશુઃ પથિ ગચ્છંતો વિષ્ણોર્દૂતામહાત્મનઃ

વિષ્ણુદૂતા ઊચુઃ-
કે યૂયં વિકૃતાકારા લક્ષ્યંતે કર્બુરા ઇવ ।
ઇમાં વિષ્ણોઃ પ્રિયતમાં નીત્વા ક્વ વ્રજથોત્તમામ્ ।
ઇદં વચનમાકર્ણ્ય તેષાં તે તુ દ્રુતં યયુઃ

અથ તે ક્રોધસંપન્ના વિષ્ણોર્દૂતા મહાબલાઃ ।
જઘ્નુસ્તે સંદેશહરાન્યમસ્ય જગતઃ પ્રભોઃ

ચક્રાદિશસ્ત્રસંઘૈશ્ચ સૂર્યકોટિસમપ્રભૈઃ ।
કૃતાંતસ્ય ભટાઃ સર્વે રુદંતસ્તે પલાયિતાઃ

યમં પ્રોચુઃ સભીતાશ્ચ વૃત્તાંતં સકલં દ્વિજ ।
યમોઽપિ તત્કથાં શ્રુત્વા ચિત્રગુપ્તમુવાચ હ

ધર્મ ઉવાચ-
કેન પુણ્યેન ભો મંત્રિન્વેશ્યા મુક્તિં સમાગતા ।
એતન્મે પૃચ્છત સર્વં કથયસ્વ યથાર્હતઃ

ચિત્રગુપ્ત ઉવાચ-
તયા પાપાન્યર્જિતાનિ જન્મતઃ સુબહૂન્યપિ ।
કિંત્વાકર્ણય લોકેશ યદિ સ્યાત્પુણ્યમસ્તિ તત્

ગણિકૈકદા ધર્મ્મરાજ સર્વાલંકારભૂષિતા ।
કાંચિત્પુરીં જગામાશુ જારકાંક્ષી ધનાર્થિની

તત્ર દેવાલયે તસ્મિન્સ્થિત્વા તાંબૂલભક્ષણં ।
કૃત્વા તચ્છેષચૂર્ણં તુ દદૌ ભિત્તૌ તુ કૌતુકાત્

તેન પુણ્યપ્રભાવેણ ગણિકા ગતપાતકા ।
વૈકુંઠં પ્રતિ સા યાતિ નિર્ગતા તવ દંડતઃ

સૂત ઉવાચ-
ઇતિ શ્રુત્વા તતો દૂતા યમોઽપિ વચનં દ્વિજ ।
વ્યાપારે ચાન્યતશ્ચિત્તં દદૌ સા ગણિકાપિ ચ

આરૂઢા સ્યંદને દિવ્યે રાજહંસયુતે તથા ।
વિષ્ણુલોકં યયૌ સા ચ વેષ્ટિતા વિષ્ણુકિંકરૈઃ

શ્રીવિષ્ણોરાજ્ઞયા સાથ કુલકોટિયુતાપિ ચ ।
તસ્થૌ સૌધગૃહે વિપ્ર નાનાભોગં ચકાર હ

ભક્ત્યા યો વૈ હરેર્ગેહે દદ્યાચ્ચૂર્ણં પ્રયત્નતઃ ।
પુણ્યં કિં વા ભવેત્તસ્ય ન જાને દ્વિજપુંગવ

ભક્ત્યાધ્યાયં પઠેદ્યો વૈ શૃણોતિ સાદરેણ ચ ।
સર્વપાપવિનિર્મુક્તો યાત્યસૌ હરિમંદિરમ્

ઇતિ શ્રીપાદ્મે મહાપુરાણે બ્રહ્મખંડે બ્રહ્મનારદસંવાદે ષષ્ઠોઽધ્યાયઃ