Padma Purana · Chapter 4.6

śaunaka uvāca-
kena puṇyena bho sūta vaikuṃṭhaṃ samavāpyate /
tadvadasva śṛṇvato me poto hi bhavasāgare

sūta uvāca-
sādhusādhu muniśreṣṭha sarvamaṃgalakāraka /
kathayāmi samāsena śṛṇvatāṃ pāpanāśanam

viṣṇave brāhmaṇāyaiva mṛdāveśmavinirmitam /
yo vai dadyāddvijaśreṣṭha tasya puṇyaṃ niśāmaya

viṣṇuloke ca sa vipraḥ sarvapāpavivarjitaḥ /
saudhavāsī bhavennityaṃ viṣṇuloke prapūjyate

viṣṇave saudhagehaṃ yo dadyādvai brāhmaṇāya ca /
harernniketanaṃ prāpya svargavāsī bhaveddhruvam

aṃte viṣṇupuraṃ gatvā yuktaḥ koṭikulairdvija /
svarṇasaudhe gṛhe sthitvā kuryādbhogaṃ yathāsukham

brāhmaṇasthāpane puṇyaṃ yadvai bhavati bho mune /
saṃkhyāṃ kartumaśaktastu tadvedhāḥ sarvakārakaḥ

gaṇyaṃte reṇavaścaiva gaṇyaṃte vṛṣṭibiṃdavaḥ /
na gaṇyaṃte vidhātrāpi brahmasaṃsthāpane phalam

nāradena purā brahmā pṛṣṭaḥ saṃsārasaṃbhavaḥ /
vedhāstaṃ kathayāmāsa tacchṛṇuṣva mahāmune

purāsīddvāpare brahmanvāranārī suśobhanā /
sukeśī hariṇīnetrā sumadhyā cāruhāsinī

nāmnā sā caṃcalāpāṃgī yayau deśāṃtaraṃ kadā /
sarvapāpasamāyuktā narake pātayaṃti ca

saṃgena siṃdhunākāṃkṣī janāndevālayaṃ gatā /
tatra kṣaṇaṃ sopaviṣṭā tāṃbūlabhakṣaṇaṃ kṛtam

śeṣaṃ cūrṇaṃ saudhabhittau datvā nimne kutūhalāt /
tato gatā jārakāṃkṣī dhanārthaṃ nagaraṃ prati

jāreṇa kenacitsārddhaṃ saṃketaḥ sahasā kṛtaḥ /
saṃketaṃ tu gatā veśyā vanaṃ rātrau vimohitā

saṃketaṃ nāgato vaiśyo vyaśaṃkiṣṭavilokitā /
kathaṃ kāṃto nāgato me sarpavyāghraiśca bhakṣitaḥ

saṃketanaṃ kathaṃ hitvā gataḥ kiṃ kāmavihvalaḥ /
anyayā jñātayā sārddhamabhilāṣī bhavetkimu

parāmṛṣyaitadhṛdyaṃtaḥ koṭapālabhayāddvija /
nagaraṃ nāgatā sā hi ruddhe lokapathe tamaiḥ

etasminnaṃtare vyāghraḥ kāmarūpī balātkṣudhī /
preṣitaḥ kāladevenāgrasadāgatya tāṃ dvija

tatastu yamunābhrāturdūtāste bhīmavarṣiṇaḥ /
āgatā girikūṭāṃgā netuṃ tāṃ pāpakarmaṇā

vakrapādā vakramukhā unnāsā bahudaṃṣṭriṇaḥ /
carmarajjūrmudgarāṃśca gṛhītvā pāṃśulāṃ dvija

baṃdhayāmāsurunmattā gaṇikāṃ carmmarajjubhiḥ /
śaṃkhacakragadāpadmadhāriṇo vanamālinaḥ

preṣitā devadevena tadbhaktavatsalena ca /
kṛṣṇajīmūtasaṃkāśāḥ sphuradvadanapaṃkajāḥ

śreṇīdharāścārunāsā divyakuṃḍalabhūṣitāḥ /
dadṛśuḥ pathi gacchaṃto viṣṇordūtāmahātmanaḥ

viṣṇudūtā ūcuḥ-
ke yūyaṃ vikṛtākārā lakṣyaṃte karburā iva /
imāṃ viṣṇoḥ priyatamāṃ nītvā kva vrajathottamām /
idaṃ vacanamākarṇya teṣāṃ te tu drutaṃ yayuḥ

atha te krodhasaṃpannā viṣṇordūtā mahābalāḥ /
jaghnuste saṃdeśaharānyamasya jagataḥ prabhoḥ

cakrādiśastrasaṃghaiśca sūryakoṭisamaprabhaiḥ /
kṛtāṃtasya bhaṭāḥ sarve rudaṃtaste palāyitāḥ

yamaṃ procuḥ sabhītāśca vṛttāṃtaṃ sakalaṃ dvija /
yamo'pi tatkathāṃ śrutvā citraguptamuvāca ha

dharma uvāca-
kena puṇyena bho maṃtrinveśyā muktiṃ samāgatā /
etanme pṛcchata sarvaṃ kathayasva yathārhataḥ

citragupta uvāca-
tayā pāpānyarjitāni janmataḥ subahūnyapi /
kiṃtvākarṇaya lokeśa yadi syātpuṇyamasti tat

gaṇikaikadā dharmmarāja sarvālaṃkārabhūṣitā /
kāṃcitpurīṃ jagāmāśu jārakāṃkṣī dhanārthinī

tatra devālaye tasminsthitvā tāṃbūlabhakṣaṇaṃ /
kṛtvā taccheṣacūrṇaṃ tu dadau bhittau tu kautukāt

tena puṇyaprabhāveṇa gaṇikā gatapātakā /
vaikuṃṭhaṃ prati sā yāti nirgatā tava daṃḍataḥ

sūta uvāca-
iti śrutvā tato dūtā yamo'pi vacanaṃ dvija /
vyāpāre cānyataścittaṃ dadau sā gaṇikāpi ca

ārūḍhā syaṃdane divye rājahaṃsayute tathā /
viṣṇulokaṃ yayau sā ca veṣṭitā viṣṇukiṃkaraiḥ

śrīviṣṇorājñayā sātha kulakoṭiyutāpi ca /
tasthau saudhagṛhe vipra nānābhogaṃ cakāra ha

bhaktyā yo vai harergehe dadyāccūrṇaṃ prayatnataḥ /
puṇyaṃ kiṃ vā bhavettasya na jāne dvijapuṃgava

bhaktyādhyāyaṃ paṭhedyo vai śṛṇoti sādareṇa ca /
sarvapāpavinirmukto yātyasau harimaṃdiram

iti śrīpādme mahāpurāṇe brahmakhaṃḍe brahmanāradasaṃvāde ṣaṣṭho'dhyāyaḥ