પદ્મ પુરાણ · અધ્યાય 4.7

શૌનક ઉવાચ-
કથયસ્વ મહાપ્રાજ્ઞ ગોલોકં યાતિ કર્મણા ।
સુમતે દુસ્તરાત્કેન જનઃ સંસારસાગરાત્ ।
રાધાયાશ્ચાષ્ટમી સૂત તસ્યા માહાત્મ્યમુત્તમમ્

સૂત ઉવાચ-
બ્રહ્માણં નારદોઽપૃચ્છત્પુરા ચૈતન્મહામુને ।
તચ્છૃણુષ્વ સમાસેન પૃષ્ટવાન્સ ઇતિ દ્વિજ

નારદ ઉવાચ-
પિતામહ મહાપ્રાજ્ઞ સર્વશાસ્ત્રવિદાં વર ।
રાધાજન્માષ્ટમી તાત કથયસ્વ મમાગ્રતઃ

તસ્યાઃ પુણ્યફલં કિંવા કૃતં કેન પુરા વિભો ।
અકુર્વતાં જનાનાં હિ કિલ્બિષં કિં ભવેદ્દ્વિજ

કેનૈવ તુ વિધાનેન કર્ત્તવ્યં તદ્વ્રતં કદા ।
કસ્માજ્જાતા ચ સા રાધા તન્મે કથય મૂલતઃ

બ્રહ્મોવાચ-
રાધાજન્માષ્ટમીં વત્સ શૃણુષ્વ સુસમાહિતઃ ।
કથયામિ સમાસેન સમગ્રં હરિણા વિના

કથિતું તત્ફલં પુણ્યં ન શક્નોત્યપિ નારદ ।
કોટિજન્માર્જિતં પાપં બ્રહ્મહત્યાદિકં મહત્

કુર્વંતિ યે સકૃદ્ભક્ત્યા તેષાં નશ્યતિ તત્ક્ષણાત્ ।
એકાદશ્યાઃ સહસ્રેણ યત્ફલં લભતે નરઃ

રાધાજન્માષ્ટમી પુણ્યં તસ્માચ્છતગુણાધિકમ્ ।
મેરુતુલ્યસુવર્ણાનિ દત્વા યત્ફલમાપ્યતે

સકૃદ્રાધાષ્ટમીં કૃત્વા તસ્માચ્છતગુણાધિકમ્ ।
કન્યાદાનસહસ્રેણ યત્પુણ્યં પ્રાપ્યતે જનૈઃ

વૃષભાનુસુતાષ્ટમ્યા તત્ફલં પ્રાપ્યતે જનૈઃ ।
ગંગાદિષુ ચ તીર્થેષુ સ્નાત્વા તુ યત્ફલં લભેત્

કૃષ્ણપ્રાણપ્રિયાષ્ટમ્યાઃ ફલં પ્રાપ્નોતિ માનવઃ ।
એતદ્વ્રતં તુ યઃ પાપી હેલયા શ્રદ્ધયાપિ વા

કરોતિ વિષ્ણુસદનં ગચ્છેત્કોટિકુલાન્વિતઃ ।
પુરા કૃતયુગે વત્સ વરનારી સુશોભના

સુમધ્યા હરિણીનેત્રા શુભાંગી ચારુહાસિની ।
સુકેશી ચારુકર્ણી ચ નામ્ના લીલાવતી સ્મૃતા

તયા બહૂનિ પાપાનિ કૃતાનિ સુદૃઢાનિ ચ ।
એકદા સાધનાકાંક્ષી નિઃસૃત્ય પુરતઃ સ્વતઃ

ગતાન્યનગરં તત્ર દૃષ્ટ્વા સુજ્ઞ જનાન્બહૂન્ ।
રાધાષ્ટમીવ્રતપરાન્સુંદરે દેવતાલયે

ગંધપુષ્પૈર્ધૂપદીપૈર્વસ્ત્રૈર્નાનાવિધૈઃ ફલૈઃ ।
ભક્તિભાવૈઃ પૂજયંતો રાધાયા મૂર્તિમુત્તમામ્

કેચિદ્ગાયંતિ નૃત્યંતિ પઠંતિ સ્તવમુત્તમમ્ ।
તાલવેણુમૃદંગાંશ્ચ વાદયંતિ ચ કે મુદા

તાંસ્તાંસ્તથાવિધાન્દૃષ્ટ્વા કૌતૂહલસમન્વિતા ।
જગામ તત્સમીપં સા પપ્રચ્છ વિનયાન્વિતા

ભોભોઃ પુણ્યાત્માનો યૂયં કિં કુર્વંતો મુદાન્વિતાઃ ।
કથયધ્વં પુણ્યવંતો માં ચૈવ વિનયાન્વિતામ્

તસ્યાસ્તુ વચનં શ્રુત્વા પરકાર્યહિતેરતાઃ ।
આરેભિરે તદા વક્તું વૈષ્ણવા વ્રતતત્પરાઃ

રાધાવ્રતિન ઊચુઃ-
ભાદ્રે માસિ સિતાષ્ટમ્યાં જાતા શ્રીરાધિકા યતઃ ।
અષ્ટમી સાદ્ય સંપ્રાપ્તા તાં કુર્વામ પ્રયત્નતઃ

ગોઘાતજનિતં પાપં સ્તેયજં બ્રહ્મઘાતજમ્ ।
પરસ્ત્રીહરણાચ્ચૈવ તથા ચ ગુરુતલ્પજમ્

વિશ્વાસઘાતજં ચૈવ સ્ત્રીહત્યાજનિતં તથા ।
એતાનિ નાશયત્યાશુ કૃતા યા ચાષ્ટમી નૃણામ્

તેષાં ચ વચનં શ્રુત્વા સર્વપાતકનાશનમ્ ।
કરિષ્યામ્યહમિત્યેવ પરામૃષ્ય પુનઃ પુનઃ

તત્રૈવ વ્રતિભિઃ સાર્દ્ધં કૃત્વા સા વ્રતમુત્તમમ્ ।
દૈવાત્સા પંચતાં યાતા સર્પઘાતેન નિર્મલા

તતો યમાજ્ઞયા દૂતાઃ પાશમુદ્ગરપાણયઃ ।
આગતાસ્તાં સમાનેતું બબંધુરતિકૃચ્છ્રતઃ

યદા નેતું મનશ્ચક્રુર્યમસ્ય સદનં પ્રતિ ।
તદાગતા વિષ્ણુદૂતાઃ શંખચક્રગદાધરાઃ

હિરણ્મયં વિમાનં ચ રાજહંસયુતં શુભમ્ ।
છેદનં ચક્રધારાભિઃ પાશં કૃત્વા ત્વરાન્વિતાઃ

રથે ચારોપયામાસુસ્તાં નારીં ગતકિલ્બિષામ્ ।
નિન્યુર્વિષ્ણુપુરં તે ચ ગોલોકાખ્યં મનોહરમ્

કૃષ્ણેન રાધયા તત્ર સ્થિતા વ્રતપ્રસાદતઃ ।
રાધાષ્ટમીવ્રતં તાત યો ન કુર્ય્યાચ્ચ મૂઢધીઃ

નરકાન્નિષ્કૃતિર્નાસ્તિ કોટિકલ્પશતૈરપિ ।
સ્ત્રિયશ્ચ યા ન કુર્વંતિ વ્રતમેતચ્છુભપ્રદમ્

રાધાવિષ્ણોઃ પ્રીતિકરં સર્વપાપપ્રણાશનમ્ ।
અંતે યમપુરીં ગત્વા પતંતિ નરકે ચિરમ્

કદાચિજ્જન્મચાસાદ્ય પૃથિવ્યાં વિધવા ધ્રુવમ્ ।
એકદા પૃથિવી વત્સ દુષ્ટસંઘૈશ્ચ તાડિતા

ગૌર્ભૂત્વા ચ ભૃશં દીના ચાયયૌ સા મમાંતિકમ્ ।
નિવેદયામાસ દુઃખં રુદંતી ચ પુનઃ પુનઃ

તદ્વાક્યં ચ સમાકર્ણ્ય ગતોઽહં વિષ્ણુસંનિધિમ્ ।
કૃષ્ણે નિવેદિતશ્ચાશુ પૃથિવ્યા દુઃખસંચયઃ

તેનોક્તં ગચ્છ ભો બ્રહ્મન્દેવૈઃ સાર્દ્ધં ચ ભૂતલે ।
અહં તત્રાપિ ગચ્છામિ પશ્ચાન્મમગણૈઃ સહ

તચ્છ્રુત્વા સહિતો દૈવૈરાગતઃ પૃથિવીતલમ્ ।
તતઃ કૃષ્ણઃ સમાહૂય રાધાં પ્રાણગરીયસીમ્

ઉવાચ વચનં દેવિ ગચ્છેહં પૃથિવીતલમ્ ।
પૃથિવીભારનાશાય ગચ્છ ત્વં મર્ત્ત્યમંડલમ્

ઇતિ શ્રુત્વાપિ સા રાધાપ્યાગતા પૃથિવીં તતઃ ।
ભાદ્રે માસિ સિતે પક્ષે અષ્ટમીસંજ્ઞિકે તિથૌ

વૃષભાનો ર્યજ્ઞભૂમૌ જાતા સા રાધિકા દિવા ।
યજ્ઞાર્થં શોધિતાયાં ચ દૃષ્ટા સા દિવ્યરૂપિણી

રાજાનં દમના ભૂત્વા તાં પ્રાપ્ય નિજમંદિરમ્ ।
દત્તવાન્મહિષીં નીત્વા સા ચ તાં પર્યપાલયત્

ઇતિ તે કથિતં વત્સ ત્વયા પૃષ્ટં ચ યદ્વચઃ ।
ગોપનીયં ગોપનીયં ગોપનીયં પ્રયત્નતઃ

સૂત ઉવાચ-
ય ઇદં શૃણુયાદ્ભક્ત્યા ચતુર્વર્ગફલપ્રદમ્ ।
સર્વપાપવિનિર્મુક્તશ્ચાંતેયાતિહરેર્ગૃહમ્

ઇતિ શ્રીપાદ્મે મહાપુરાણે બ્રહ્મખંડે બ્રહ્મનારદસંવાદે શ્રીરાધાષ્ટમીમાહાત્મ્યંનામ સપ્તમોઽધ્યાયઃ