પદ્મ પુરાણ · અધ્યાય 4.20

શૌનક ઉવાચ।
સુકૃતં કિં તથા પ્રાહ કૃત્વા સંસારસાગરાત્ ।
તરિષ્યંતિ કલૌ સૂત તમોન્ધકૂપમંડુકાઃ

સૂત ઉવાચ।
રાધાકૃષ્ણપ્રિયે ચૌર્જે પ્રાતઃસ્નાનં સમાચરેત્ ।
રાધાદામોદરં ભક્ત્યા કુર્યાત્પૂજાં સમાહિતા

ત્યક્ત્વામિષાદિકં બ્રહ્મન્પતિસેવાપરાયણા ।
સા યાતિ શ્રીહરેઃ સ્થાનં ગોલોકાખ્યં સુદુર્લ્લભમ્

રાધાદામોદરાભ્યાં યા ધૂપદીપં તુ કાર્તિકે ।
દદ્યાત્સા ભવનં વિષ્ણોર્યાતિ વૈ ત્યક્તપાતકાઃ

યોષિદ્યા કાર્ત્તિકે વિપ્ર દદ્યાદ્વસ્ત્રં નિકેતને ।
રાધાદામોદરાભ્યાં તુ વસેત્સા શ્રીહરેશ્ચિરમ્

રાધાદામોદરાભ્યાં સા પુષ્પં માલ્યં સુવાસિતમ્ ।
કાર્તિકે માસિ સા દદ્યાદ્યાતિ વૈકુંઠમંદિરમ્

ગંધં યા ચાપિ નૈવેદ્યં દદ્યાદ્વૈ શર્કરાદિકમ્ ।
રાધાદામોદરાભ્યાં સા ગચ્છેદ્વૈ વિષ્ણુમંદિરમ્

યત્કિંચિદ્યચ્છતિ બ્રહ્મન્કાર્તિકે ચ દ્વિજાતયે ।
રાધાદામોદરપ્રીત્યૈ તસ્યાઃ પુણ્યાક્ષયં ભવેત્

યા નારી કાર્તિકે ભક્ત્યા રાધાદામોદરં દ્વિજ ।
પ્રાતઃ સપર્યાં સા યાતિ ન કુર્ય્યાન્નિરયં ચિરમ્

કદાચિજ્જન્મભૂમૌ સા વિધવા પ્રતિ જન્મનિ ।
ભવેચ્ચાસાદ્ય પૂર્વ્વં વૈ ચાપ્રિયા સ્વામિનોઽપિ ચ

પુરા ત્રેતાયુગે વિપ્ર વૃષલો નામ શંકરઃ ।
સૌરાષ્ટ્રદેશવાસી ચ તસ્ય જાયા કલિપ્રિયા

જારાકાંક્ષી સદા નામ્ના તૃણવન્મન્યતે પતિમ્ ।
અસૌ પતિર્ન મે યોગ્યો મે સ્વામી પરપૂરુષઃ

ઇતિ મત્વા સદા તસ્મૈ ચોચ્છિષ્ટં તુ દદાતિ વૈ ।
નીચસંગાન્મહામૂઢા મદ્યમાંસં ચખાદ હ

સ્વામિનો ભર્ત્સનાં નિત્યં કુર્યાત્કામં તુ નિષ્ઠુરા ।
પાદરજ્જુર્ભવેચ્ચાસૌ કસ્માદ્વૈ ન મૃતોઽપિ ચ

મૃતે તસ્મિન્નહં ભોગં કરિષ્યામિ યદૃચ્છયા ।
વિચાર્યેતિ હૃદા મૂઢા જારેણૈકેન સા તદા

અન્યદેશં ગમિષ્યાવઃ સંકેતમકરોદ્દ્વિજ ।
સુપ્તસ્ય સ્વામિનો રાત્રૌ ચાસિના તદ્ગલં દ્વિજ

છિત્ત્વા જારકૃતે સાપિ સંકેતસ્ય સ્થલં ગતા ।
આગતં જારપુરુષં દ્વીપિના ભક્ષિતં દ્વિજ

દૃષ્ટ્વા સા રોદનં કૃત્વા મૂર્ચ્છિતા નિપપાત હ ।
ચિરાદાશ્વસ્ય સા મૂઢા કરુણં વિલલાપ હ

કલિપ્રિયોવાચ।
સ્વકીયં સ્વામિનં હત્વા ચાગતા પરપૂરુષમ્ ।
તં જારં સ્વામિનં દૈવાત્શાર્દૂલો ભક્ષયન્મમ ।
કિં કરોમિ ક્વ ગચ્છામિ વિધાત્રા વંચિતાસ્મ્યહમ્

સૂત ઉવાચ।
તતઃ કલિપ્રિયા બ્રહ્મનાગતા સ્વગૃહં પ્રતિ ।
લપને સ્વામિનો દત્વા મુખં ચ વિલલાપ સા

કલિપ્રિયોવાચ।
હા નાથ કિં કૃતં કર્મ્મ મયા હંતાતિદારુણમ્ ।
કં લોકં વા ગમિષ્યામિ વદ સ્વામિન્મનાગ્ગિરમ્

ભર્ત્સનાં તુ યથાકામં કુર્ય્યાચ્ચાહં સુનિંદિતા ।
કિંચિન્ન વદસિ સ્વામિન્નેનો યન્મે ન વિદ્યતે

સૂત ઉવાચ।
નનામ ચરણે તસ્ય ગતાન્યનગરં પ્રતિ ।
તત્ર પ્રવિષ્ટા સા યોષિદ્દૃષ્ટ્વા પુણ્યજનાન્બહૂન્

ઊર્જે સ્નાનપરાન્પ્રાતર્નર્મદાયાં ચ વૈષ્ણવાન્ ।
તત્ર નદ્યાં સ્ત્રિયશ્ચાપિ રાધાદામોદરં દ્વિજ

સપર્યાં ચ કૃતાં ચૈવ શંખનાદૈર્મહોત્સવૈઃ ।
ગંધપુષ્પૈર્ધૂપદીપૈર્વસ્ત્રૈર્નાનાવિધૈઃ ફલૈઃ

મુખવાસૈર્ભક્તિયુક્તા દૃષ્ટ્વા સા વિનયાન્વિતા ।
પપ્રચ્છ બ્રૂત યૂયં મે કિમેતત્ક્રિયતે સ્ત્રિયઃ

સ્ત્રિય ઊચુઃ -
સર્વમાસોત્તમે ચોર્જે રાધાદામોદરૌ શુભૌ ।
પૂજાં કૃત્વા વયં માતઃ સર્વપાપહરાં શુભામ્

કોટિજન્માર્જિતં પાપં નષ્ટં પ્રાપ્તં નિકેતનમ્ ।
સપર્ય્યામામિષં ત્યક્ત્વા કૃત્વા સા ચ હરેર્દ્દિને

નિધનત્વં પૌર્ણમાસ્યાં ગતા સા નિર્મલા દ્વિજ ।
કિંકરાશ્ચાગતાસ્તૂર્ણં યમસ્ય નિલયં પ્રતિ

નેતું તાં ક્રોધસંયુક્તા બબંધુશ્ચર્મરજ્જુભિઃ ।
તદાગતા વિષ્ણુદૂતા વિમાનં સ્વર્ણનિર્મિતમ્

શંખચક્રગદાપદ્મધારિણો વનમાલિનઃ ।
નિજઘ્નુશ્ચક્રધારાભિર્યમદૂતાઃ પલાયિતાઃ

રાજહંસયુતે વિપ્ર વિમાને સ્વર્ણનિર્મિતે ।
આરૂઢા સા ગતા તૈસ્તુ વેષ્ટિતા વિષ્ણુમંદિરમ્

તત્ર તસ્થૌ ચિરં ભોગં કૃત્વા સા વૈ યથેપ્સિતમ્ ।
યા કુર્યાત્કાર્ત્તિકે વિપ્ર રાધાદામોદરાર્ચનમ્

યાતિ પૂજા ત્યક્તપાપાદ્ગોલોકાખ્યં મનોહરમ્ ।
ય ઇદં શૃણુયાદ્ભક્ત્યા યા ચ નારી સમાહિતા ।
કોટિજન્માર્જિતં પાપં તસ્ય તસ્યા વિનશ્યતિ

ઇતિ શ્રીપાદ્મે મહાપુરાણે બ્રહ્મખંડે સૂતશૌનકસંવાદે રાધાદામોદરપૂજામાહાત્મ્યકથનંનામ વિંશતિતમોઽધ્યાયઃ