પદ્મ પુરાણ · અધ્યાય 4.18

શૌનક ઉવાચ।
અગમ્યાગમનં સૂત કુર્યાદ્યો વૈ વિમોહિતઃ ।
તસ્ય શુદ્ધિર્ભવેત્કેન કથયસ્વ સમૂલતઃ

સૂત ઉવાચ।
અભિગચ્છતિ ચાંડાલીં શ્વપાકીં યો દ્વિજોત્તમઃ ।
ઉપવાસત્રયં કુર્યાત્પ્રાજાપત્યં ચરેત્તતઃ

સશિખં વપનં ચૈવ દદ્યાદ્ગોદ્વયમેવ ચ ।
યથાર્થદક્ષિણાં દત્વા શુદ્ધિમાપ્નોતિ સ દ્વિજઃ

ક્ષત્ત્રિયો વાપિ ચાંડાલીં વૈશ્યો વા યદિ ગચ્છતિ ।
પ્રાજાપત્યં સકૃચ્છ્રં ચ દદ્યાદ્ગોમિથુનદ્વયમ્

અનુગચ્છતિ શૂદ્રો હિ શ્વપાકીં ચ તપોધન ।
ચતુર્ગોમિથુનં દદ્યાત્પ્રાજાપત્યં વ્રતં ચરેત્

માતરં યદિ વા ગચ્છેદ્ભગિનીં સ્વસુતામપિ ।
વધૂં ચ મોહિતો ગચ્છંસ્ત્રીણિ કૃચ્છ્રાણ્યથાચરેત્

ચાંદ્રાયણત્રયં કૃત્વા દદ્યાદ્ગોમિથુનત્રયમ્ ।
સશિખં વપનં કૃત્વા પંચગવ્યં પિબેત્તતઃ

હુતે હ્યગ્નૌ તથાપ્યત્ર શુદ્ધ્યત્યેવં તપોધન ।
પિતૃદારાન્દ્વિજશ્રેષ્ઠ માતુશ્ચ ભગિનીં તથા

ગુરુપત્નીં માતુલાનીં ભ્રાતુર્ભાર્યાં સ્વગોત્રજામ્ ।
યદિ ગચ્છતિ મોહેન પ્રાજાપત્યદ્વયં ચરેત્

ચાંદ્રાયણત્રયં બ્રહ્મન્પંચગોમિથુનાનિ ચ ।
વિપ્રેભ્યો દક્ષિણાં દદ્યાચ્છુધ્યતે નાત્ર સંશયઃ

ગાં ચ ગચ્છતિ યો મૂઢ ઉપવાસત્રયં ચરેત્ ।
ધેનું દત્ત્વા તથા ચાન્નં શુદ્ધ્યત્યત્ર ન સંશયઃ

વેશ્યાં ખરીં શૂકરીં ચ કપિં તું મહિષીં દ્વિજ ।
આકંઠતઃ સમાક્ષિપ્ય ગોમયોદકકર્દ્દમે

તત્ર તિષ્ઠેન્નિરાહારો ત્રિરાત્રેણૈવ શુદ્ધ્યતિ ।
સશિખં વપનં કૃત્વા ત્રિરાત્રમુપવાસયેત્

એકરાત્રં જલે સ્થિત્વા શુદ્ધ્યત્યેવ ન સંશયઃ ।
બ્રાહ્મણીં તુ યદા ગચ્છેત્યો નરઃ કામમોહિતઃ

પ્રાજાપત્યત્રયં કુર્ય્યાચ્ચાંદ્રાયણત્રયં તથા ।
ગોત્રયં તુ તથા દદ્યાચ્છુદ્ધ્યત્યેવ તપોધન

બ્રાહ્મણી પંચગવ્યં તુ પંચરાત્રં પિબેદ્દ્વિજ ।
ગોદ્વયં દક્ષિણાં દદ્યાચ્છુધ્યત્યત્ર ન સંશયઃ

પરાંગનાં યદાગચ્છેત્કૃચ્છ્રં સાંતપનં ચરેત્ ।
યથાર્ગલા તથા યોષિત્તસ્માત્તાં પરિવર્જયેત્

વર્ણબાહ્યાં તથા નીચામનુગચ્છેત્સકૃન્નરઃ ।
પ્રાજાપત્યં ચરેત્કૃચ્છ્રં શુદ્ધ્યત્યેવ ન સંશયઃ

અંગારસદૃશી યોષિત્સર્પિઃ કુંભસમઃ પુમાન્ ।
તસ્યાઃ પરિસરે બ્રહ્મન્ન સ્થાતવ્યં કદાચન

જારેણ જનયેદ્ગર્ભં યા ચ નારી કુલાંતકા ।
ત્યાજ્યા સા સર્વથા બ્રંહ્મસ્તત્ર દોષો ન વિદ્યતે

યા ચ નારી ગૃહાદ્ગચ્છેત્ત્યક્ત્વા બંધૂન્સ્વકાનપિ ।
નષ્ટા સા ચ કુલભ્રષ્ટા ન તસ્યાઃ સંગમઃ પુનઃ

યા ચ નારી યદા ગચ્છેન્મોહિતા પરપૂરુષમ્ ।
પ્રાજાપત્યં ચરેત્કૃચ્છ્રં પંચગવ્યં પિબેત્તતઃ

ગોદ્વયં તુ તતો દદ્યાચ્છુધ્યત્યેવ ન સંશયઃ ।
બ્રાહ્મણી બાલિશા બ્રહ્મન્મોહિતા પરપૂરુષમ્

યદા ગચ્છેત્તદા ત્યાજ્યા જનૈર્દોષો ન વિદ્યતે ।
યો ગચ્છેદ્બ્રાહ્મણીં વિપ્ર ભૂસુરઃ કામમોહિતઃ ।
ગો તિલાંશ્ચ તદા દદ્યાચ્છુદ્ધ્યત્યત્ર ન સંશયઃ

ઇતિ શ્રીપાદ્મે મહાપુરાણે બ્રહ્મખંડે સૂતશૌનકસંવાદે અષ્ટાદશોઽધ્યાયઃ