પદ્મ પુરાણ · અધ્યાય 3.7

ઋષય ઊચુઃ-।
ભારતસ્યાસ્ય વર્ષસ્ય તથા હૈમવતસ્ય ચ ।
પ્રમાણમાયુષઃ સૂત બલં ચાપિ શુભાશુભમ્

અનાગતમતિક્રાંતં વર્તમાનં ચ સત્તમ ।
આચક્ષ્વ નો વિસ્તરેણ હરિવર્ષં તથૈવ ચ

સૂત ઉવાચ-।
ચત્વારિ ભારતે વર્ષે યુગાનિ મુનિપુંગવાઃ ।
કૃતં ત્રેતા દ્વાપરં ચ તિષ્યં ચ દ્વિજસત્તમાઃ

પૂર્વે કૃતયુગં નામ તતસ્ત્રેતાયુગં દ્વિજાઃ ।
તત્પશ્ચાદ્દ્વાપરં ચાથ તતસ્તિષ્યઃ પ્રવર્તતે

ચત્વારિ તુ સહસ્રાણિ વર્ષાણાં મુનિપુંગવાઃ ।
આયુઃ સંખ્યા કૃતયુગે સંખ્યાતા હિ તપોધનાઃ

તથા ત્રીણિ સહસ્રાણિ ત્રેતાયામાયુષો વિદુઃ ।
દ્વે સહસ્રે દ્વાપરે તુ ભુવિ તિષ્ઠંતિ સાંપ્રતમ્

તત્પ્રમાણસ્થિતિર્હ્યસ્તિ તિષ્યે તુ મુનિપુંગવાઃ ।
ગર્ભસ્થાશ્ચ મ્રિયંતેઽત્ર તથા જાતા મ્રિયંતિ ચ

મહાબલા મહાસત્ત્વાઃ પ્રજ્ઞાગુણસમન્વિતાઃ ।
પ્રજાયંતે ચ જાતાશ્ચ શતશોઽથ સહસ્રશઃ

દ્વિજાઃ કૃતયુગે વિપ્રા બલિનઃ પ્રિયદર્શનાઃ ।
પ્રજાયંતે ચ જાતાશ્ચ મુનયો વૈ તપોધનાઃ

મહોત્સાહા મહાત્માનો ધાર્મિકાઃ સત્યવાદિનઃ ।
પ્રિયદર્શા વપુષ્મંતો મહાવીર્ય્યા ધનુર્ધરાઃ

વીરા હિ યુધિ જાયંતે ક્ષત્રિયાઃ શૂરસંમતાઃ ।
ત્રેતાયાં ક્ષત્રિયાસ્તાવત્સર્વે વૈ ચક્રવર્તિનઃ

સર્વવર્ણાશ્ચ જાયંતે સદૈવ દ્વાપરે યુગે ।
મહોત્સાહા વીર્યવંતઃ પરસ્પરવધૈષિણઃ

તેજસાંધેનસંયુક્તાઃ ક્રોધનાઃ પુરુષાઃ કિલ ।
લુબ્ધાશ્ચાનૃતકાશ્ચૈવ તિષ્યે જાયંતિ ભો દ્વિજાઃ

ઈર્ષ્યા માનસ્તથા ક્રોધો માયાસૂયા તથૈવ ચ ।
તિષ્યે ભવંતિ ભૂતાનાં રાગો લોભશ્ચ સત્તમાઃ

સંક્ષેપો વર્ત્તતે વિપ્રા દ્વાપરે યુગમધ્યગે ।
ગુણોત્તરં હૈમવતં હરિવર્ષં તતઃ પરમ્

ઇતિ શ્રીપાદ્મે મહાપુરાણે સ્વર્ગખંડે સપ્તમોઽધ્યાયઃ