પદ્મ પુરાણ · અધ્યાય 3.49

સૂત ઉવાચ-
ભ્રાતૃભિઃ સહિતાઃ સર્વે પાંડવા ધર્મનિશ્ચયાઃ ।
બ્રાહ્મણેભ્યો નમસ્કૃત્વાગુરુદેવાંસ્ત્વતર્પયન્

વાસુદેવોઽપિ તત્રૈવ ક્ષણેનાભ્યાગતસ્તદા ।
પાંડવૈઃ સહિતૈઃ સર્વૈઃ પૂજ્યમાનઃ સ માધવઃ

કૃષ્ણેન સહિતૈઃ સર્વૈઃ પુનરેવ મહાત્મભિઃ ।
અભિષિક્તઃ સ્વરાજ્યે તુ ધર્મપુત્રો યુધિષ્ઠિરઃ

એતસ્મિન્નંતરે ચૈવ માર્કંડેયો મહાત્મવાન્ ।
તતઃ સ્વસ્તીતિ ચોક્ત્વા વૈ ક્ષણાદાશ્રમમાગતઃ

યુધિષ્ઠિરોઽપિ ધર્માત્મા ભ્રાતૃભિઃ સહિતસ્તુ સઃ ।
મહાદાનં દદૌ ચાથ ધર્મપુત્રો યુધિષ્ઠિરઃ

યસ્ત્વિદં કલ્યમુત્થાય પઠતે વા શૃણોતિ વા ।
મુચ્યતે સર્વપાપેભ્યો વિષ્ણુલોકં સ ગચ્છતિ

વાસુદેવ ઉવાચ-
મમ વાક્યં તુ કર્તવ્યં તવ સ્નેહાદ્બ્રવીમ્યહમ્ ।
નિત્યં યજ્ઞરતો ભૂત્વા પ્રયાગે વિગતજ્વરઃ

પ્રયાગં સંસ્મરન્નિત્યં સહાસ્માભિર્યુધિષ્ઠિર ।
સ્વયં પ્રાપ્સ્યસિ રાજેંદ્ર સ્વર્ગલોકં તુ શાશ્વતમ્

પ્રયાગમનુગચ્છેદ્વા વસતે વાપિ યો નરઃ ।
સર્વપાપવિશુદ્ધાત્મા સ્વર્ગલોકં ચ ગચ્છતિ

પ્રતિગ્રહાદુપાવૃત્તઃ સન્તુષ્ટો નિયતઃ શુચિઃ

અહંકારનિવૃત્તશ્ચ સ તીર્થફલમશ્નુતે ।
અકોપનશ્ચ રાજેંદ્ર સત્યવાદી દૃઢવ્રતઃ ।
આત્મોપમશ્ચ ભૂતેષુ સ તીર્થફલમશ્નુતે

ઋષિભિઃ ક્રતવઃ પ્રોક્તા દેવૈશ્ચાપિ યથાક્રમમ્ ।
ન હિ શક્યા દરિદ્રેણ યજ્ઞાઃ પ્રાપ્તું મહીપતે

બહૂપકરણો યજ્ઞો નાનાસંભારસંભ્રમઃ ।
પ્રાપ્યતે વિવિધૈરર્થ્યૈઃ સમૃદ્ધૈર્વા નરૈઃ ક્વચિત્

યો દરિદ્રૈરપિ બુધૈઃ શક્યઃ પ્રાપ્તું નરેશ્વર ।
તતો યજ્ઞફલૈઃ પુણ્યૈસ્તન્નિબોધ જનેશ્વર

ઋષીણાં પરમં ગુહ્યમિદં ભરતસત્તમ ।
તીર્થાભિગમનં પુણ્યં યજ્ઞૈરપિ વિશિષ્યતે

દશકોટિસહસ્રાણિ ત્રિંશત્કોટ્યસ્તથાપરે ।
માઘમાસે તુ ગંગાયાં ગમિષ્યંતિ નરર્ષભ

સ્વસ્થો ભવ મહારાજ ભુક્ત્વા રાજ્યમકંટકમ્ ।
પુનર્દ્રક્ષ્યસિ રાજેંદ્ર યજમાનો વિશેષતઃ

ઇતિ શ્રીપાદ્મે મહાપુરાણે સ્વર્ગખંડે પ્રયાગમાહાત્મ્યં।
નામ ઊનપંચાશત્તમોઽધ્યાયઃ