પદ્મ પુરાણ · અધ્યાય 3.48

યુધિષ્ઠિર ઉવાચ-
કથા સર્વાત્વિયં પ્રોક્તાપ્રયાગસ્ય મહામુને ।
એવં મે સર્વમાખ્યાહિ યથા ચ મમ તારયેત્

માર્કંડેય ઉવાચ-
શૃણુ રાજન્પ્રવક્ષ્યામિ પ્રોક્તં સર્વમિદં જગત્ ।
બ્રહ્માવિષ્ણુસ્તથેશાનો દેવતા પ્રભુરવ્યયઃ

બ્રહ્મા સૃજતિ ભૂતાનિ સ્થાવરં જંગમં ચ યત્ ।
તાન્યેતાનિ પરો લોકે વિષ્ણુઃ પાલયતિ પ્રજાઃ

કલ્પાંતે તત્સમગ્રં હિ રુદ્રઃ સંહરતે જગત્ ।
ન દદાતિ ચ નાધ્યેતિ ન કદાચિદ્વિનશ્યતિ

ઈશ્વરઃ સર્વભૂતાનાં યઃ પશ્યતિ સ પશ્યતિ ।
ઉત્તરેણ પ્રતિષ્ઠાનાદિદાનીં બ્રહ્મ તિષ્ઠતિ

મહેશ્વરો વટે ભૂત્વા તિષ્ઠતે પરમેશ્વરઃ ।
તતો દેવાઃ સગંધર્વાઃ સિદ્ધાશ્ચ પરમર્ષયઃ

રક્ષંતિ પરમં નિત્યં પાપકર્મપરાયણાન્ ।
યે તુ ચાન્યે ચ તિષ્ઠંતિ ન યાંતિ પરમાં ગતિમ્

યુધિષ્ઠિર ઉવાચ-
અપ્યાહ મે યથાતત્ત્વં યથૈષાં તિષ્ઠતે શ્રુતમ્ ।
કેન વા કારણેનૈવ તિષ્ઠંતિ લોકસંમતાઃ

માર્કંડેય ઉવાચ-
પ્રયાગે નિવસંત્યેતે બ્રહ્મવિષ્ણુમહેશ્વરાઃ ।
કારણં તુ પ્રવક્ષ્યામિ શૃણુ તત્ત્વં યુધિષ્ઠિર

પંચયોજનવિસ્તીર્ણં પ્રયાગસ્ય તુ મંડલમ્ ।
તિષ્ઠંતિ રક્ષણાર્થાય પાપકર્મનિવારણાઃ

તસ્મિંસ્તુ સ્વલ્પકં પાપં નરકે પાતયિષ્યતિ ।
એવં બ્રહ્મા ચ વિષ્ણુશ્ચ પ્રયાગે સમહેશ્વરઃ

સપ્તદ્વીપાઃ સમુદ્રાશ્ચ પર્વતાશ્ચ મહીતલે ।
તિષ્ઠંતિ ધ્રિયમાણાશ્ચ યાવદાભૂતસંપ્લવમ્

યે ચાન્યે બહવઃ સર્વે તિષ્ઠંતિ ચ યુધિષ્ઠિર ।
પૃથિવીસ્થાનમારભ્ય નિર્મિતં દૈવતૈસ્ત્રિભિઃ

પ્રજાપતેરિદં ક્ષેત્રં પ્રયાગમિતિ વિશ્રુતમ્ ।
એતત્પુણ્યં પવિત્રં ચ પ્રયાગં તુ યુધિષ્ઠિર

સ્વરાજ્યં કુરુ રાજેંદ્ર ભ્રાતૃભિઃ સહિતો ભવ

ઇતિ શ્રીપાદ્મે મહાપુરાણે સ્વર્ગખંડે પ્રયાગમાહાત્મ્યે અષ્ટચત્વારિંશોઽધ્યાયઃ