પદ્મ પુરાણ · અધ્યાય 3.45

યુધિષ્ઠિર ઉવાચ-
એતચ્છ્રુત્વા પ્રયાગસ્ય યત્ત્વયા કીર્તનં કૃતમ્ ।
વિશુદ્ધમેતદ્ધૃદયં પ્રયાગસ્ય ચ કીર્તનાત્ ।
અનાશકફલં બ્રૂહિ ભગવંસ્તત્ર કીદૃશમ્

માર્કંડેય ઉવાચ-
શૃણુ રાજન્પ્રયાગે તુ અનાશકફલં વિભો ।
પ્રાપ્નોતિ પુરુષો ધીમાન્શ્રદ્દધાનશ્ચ યાદૃશમ્

અહીનાંગો વિરોગશ્ચ પંચેંદ્રિયસમન્વિતઃ ।
અશ્વમેધફલં તસ્ય ગચ્છતસ્તુ પદે પદે

કુલાનિ તારયેદ્રાજન્દશપૂર્વાન્દશાપરાન્ ।
મુચ્યતે સર્વપાપેભ્યો ગચ્છેત પરમં પદમ્

યુધિષ્ઠિર ઉવાચ-
મહાભાગોસિ ધર્મજ્ઞ દાનં વદસિ મે પ્રભો ।
અલ્પેનૈવ પ્રધાનેન બહૂન્ધર્માનવાપ્નુયાત્

અશ્વમેધસ્તુ બહુભિઃ સુકૃતૈઃ પ્રાપ્યતે ઇહ ।
એતન્મે સંશયં બ્રૂહિ પરં કૌતૂહલં હિ મે

માર્કંડેય ઉવાચ-
શૃણુ રાજન્મહાવીર યુદુક્તં પદ્મયોનિના ।
ઋષીણાં સન્નિધૌ પૂર્વં કથ્યમાનં મયા શ્રુતમ્

પંચયોજનવિસ્તીર્ણં પ્રયાગસ્ય તુ મંડલમ્ ।
પ્રવિશંસ્તસ્ય તદ્ભૂમાવશ્વમેધં પદે પદે

વ્યતીતાન્પુરુષાન્સપ્ત ભવિષ્યાંશ્ચ ચતુર્દશ ।
નરસ્તારયતે સર્વાન્યસ્તુ પ્રાણાન્પરિત્યજેત્

એવં જ્ઞાત્વા તુ રાજેંદ્ર સદા શ્રદ્ધાપરો ભવેત્ ।
અશ્રદ્દધાનાઃ પુરુષાઃ પાપોપહતચેતસઃ ।
ન પ્રાપ્નુવંતિ તત્સ્થાનં પ્રયાગં દેવનિર્મિતમ્

યુધિષ્ઠિર ઉવાચ-
સ્નેહાદ્વા દ્રવ્યલોભાદ્વા યે તુ કામવશં ગતાઃ ।
કથં તીર્થફલં તેષાં કથં પુણ્યમવાપ્નુયુઃ

વિક્રયં સર્વભાંડાનાં કાર્યાકાર્યમજાનતઃ ।
પ્રયાગે કા ગતિસ્તસ્ય એવં બ્રૂહિ મહામુને

માર્કંડેય ઉવાચ-
શૃણુ રાજન્મહાગુહ્યં સર્વપાપપ્રણાશનમ્ ।
માસં વસંસ્તુ રાજેંદ્ર પ્રયાગે નિયતેંદ્રિયઃ

મુચ્યતે સર્વપાપેભ્યઃ યથાદિષ્ટં સ્વયંભુવા ।
શુચિસ્તુ પ્રયતો ભૂત્વાઽહિંસકઃ શ્રદ્ધયાન્વિતઃ

મુચ્યતે સર્વપાપેભ્યઃ સ ગચ્છેત્પરમં પદમ્ ।
વિશ્રંભઘાતકાનાં તુ પ્રયાગે શૃણુ તત્ફલમ્

ત્રિકાલમેવ સ્નાયીત આહારં ભૈક્ષ્યમાચરેત્ ।
ત્રિભિર્માસૈઃ પ્રમુચ્યેત પ્રયાગાત્તુ ન સંશયઃ

પ્રજ્ઞાનેન તુ યસ્યેહ તીર્થયાત્રાદિકં ભવેત્ ।
સર્વકામસમૃદ્ધસ્તુ સ્વર્ગલોકે મહીયતે

સ્થાનં સ લભતે નિત્યં ધનધાન્યસમાકુલમ્ ।
એવં જ્ઞાનેન સંપૂર્ણઃ સદા ભવતિ ભોગવાન્

તારિતાઃ પિતરસ્તેન નરકાત્પ્રપિતામહાઃ ।
ધર્માનુસારે તત્ત્વજ્ઞ પૃચ્છતસ્તે પુનઃ પુનઃ ।
ત્વત્પ્રિયાર્થં સમાખ્યાતં ગુહ્યમેતત્સનાતનમ્

યુધિષ્ઠિર ઉવાચ-
અદ્ય મે સફલં જન્મ અદ્ય મે સફલં કુલમ્ ।
પ્રીતોઽસ્મ્યનુગૃહીતોઽસ્મિ દર્શનાદેવ તેઽદ્ય વૈ ।
ત્વદ્દર્શનાત્તુ ધર્માત્મન્મુક્તોઽહં સર્વપાતકૈઃ

માર્કંડેય ઉવાચ-
દિષ્ટ્યા તે સફલં જન્મ દિષ્ટ્યા તે તારિતં કુલમ્ ।
કીર્તનાદ્વર્દ્ધતે પુણ્યં શ્રુતં પાપપ્રણાશનમ્

યુધિષ્ઠિર ઉવાચ-
યમુનાયાં તુ કિં પુણ્યં કિં ફલં તુ મહામુને ।
એતન્મે સર્વમાખ્યાહિ યથાદૃષ્ટં યથાશ્રુતમ્

માર્કંડેય ઉવાચ-।
તપનસ્ય સુતા દેવી ત્રિષુ લોકેષુ વિશ્રુતા ।
સમાગતા મહાભાગા યમુના યત્ર નિમ્નગા

યેનૈવ નિઃસૃતા ગઙ્ગા તેનૈવ યમુના ગતા ।
યોજનાનાં સહસ્રેષુ કીર્તનાત્પાપનાશિની

તત્ર સ્નાત્વા ચ પીત્વા ચ યમુનાયાં યુધિષ્ઠિર ।
કીર્ત્તનાલ્લભતે પુણ્યં દૃષ્ટ્વા ભદ્રાણિ પશ્યતિ

અવગાઢા ચ પીત્વા ચ પુનાત્યાસપ્તમં કુલમ્ ।
પ્રાણાંસ્ત્યજતિ યસ્તત્ર સ યાતિ પરમાં ગતિમ્

અગ્નિતીર્થમિતિ ખ્યાતં યમુના દક્ષિણે તટે ।
પશ્ચિમે ધર્મરાજસ્ય તીર્થં હરવરં સ્મૃતમ્

તત્ર સ્નાત્વા દિવં યાંતિ યે મૃતાસ્તેઽપુનર્ભવાઃ ।
એવં તીર્થસહસ્રાણિ યમુના દક્ષિણે તટે

ઉત્તરેણ પ્રવક્ષ્યામિ આદિત્યસ્ય મહાત્મનઃ ।
તીર્થં તુ વિરજં નામ યત્ર દેવાઃ સવાસવાઃ

ઉપાસતે સ્મ સંધ્યાં તુ નિત્યકાલં યુધિષ્ઠિર ।
દેવાઃ સેવંતિ તત્તીર્થં યે ચાન્યે વિદુષો જનાઃ

શ્રદ્દધાનપરો ભૂત્વા કુરુ તીર્થાભિષેચનમ્ ।
અન્યે ચ બહવસ્તીર્થાઃ સર્વપાપહરાઃ શુભાઃ

તેષુ સ્નાત્વા દિવં યાંતિ યે મૃતાસ્તેઽપુનર્ભવાઃ ।
ગંગા ચ યમુના ચૈવ ઉભે તુલ્યફલે સ્મૃતે

કેવલં શ્રેષ્ઠભાવેન ગંગા સર્વત્ર પૂજ્યતે ।
એવં કુરુષ્વ કૌંતેય સ્વર્ગતીર્થાભિષેચનમ્

યાવજ્જીવકૃતં પાપં તત્ક્ષણાદેવ નશ્યતિ ।
યસ્ત્વિદં કલ્ય ઉત્થાય પઠતે ચ શૃણોતિ વા

મુચ્યતે સર્વપાપેભ્યઃ સ્વર્ગલોકં ચ ગચ્છતિ

ઇતિ શ્રીપાદ્મે મહાપુરાણે સ્વર્ગખંડે યમુનામાહાત્મ્યે પંચચત્વારિંશોઽધ્યાયઃ