પદ્મ પુરાણ · અધ્યાય 3.44

માર્કંડેય ઉવાચ-
શૃણુ રાજન્પ્રયાગસ્ય માહાત્મ્યં પુનરેવ તુ ।
યચ્છ્રુત્વા સર્વપાપેભ્યો મુચ્યતે નાત્ર સંશયઃ

માનસં નામ તત્તીર્થં ગંગાયામુત્તરે તટે ।
ત્રિરાત્રોપોષિતો ભૂત્વા સર્વાન્કામાનવાપ્નુયાત્

ગોભૂહિરણ્યદાનેન યત્ફલં પ્રાપ્નુયાન્નરઃ ।
એતત્ફલમવાપ્નોતિ તત્તીર્થં સ્મરતે પુનઃ

અકામો વા સકામો વા ગંગાયાં યો વિપદ્યતે ।
મૃતસ્તુ ભવતિ સ્વર્ગે નરકં ન ચ પશ્યતિ

અપ્સરોગણસંગીતૈઃ સુપ્તોઽસૌ પ્રતિબુધ્યતે ।
હંસસારસયુક્તેન વિમાનેન સ ગચ્છતિ

બહુવર્ષાણિ રાજેન્દ્ર ષટ્સહસ્રાણિ ભુંજતે ।
તતઃ સ્વર્ગાત્પરિભ્રષ્ટઃ ક્ષીણકર્મા દિવશ્ચ્યુતઃ

સુવર્ણમણિમુક્તાઢ્યે જાયતે સ મહાકુલે ।
ષષ્ટિતીર્થસહસ્રાણિ ષષ્ટિતીર્થશતાનિ ચ

માઘેમાસિ ગમિષ્યંતિ ગંગાયમુનસંગમે ।
ગવાં શતસહસ્રસ્ય સમ્યગ્દત્તસ્ય યત્ફલમ્

પ્રયાગે માઘમાસે તુ ત્ર્યહંસ્નાનસ્ય તત્ફલમ્ ।
ગંગાયમુનયોર્મધ્યે પંચાગ્નિં યસ્તુ સાધયેત્

અહીનાંગો હ્યરોગશ્ચ પંચેન્દ્રિયસમન્વિતઃ ।
યાવંતિ રોમકૂપાણિ તસ્ય ગાત્રસ્ય દેહિનઃ

તાવદ્વર્ષસહસ્રાણિ સ્વર્ગલોકે મહીયતે ।
તતઃ સ્વર્ગાત્પરિભ્રષ્ટો જંબૂદ્વીપપતિર્ભવેત્

સ ભુક્ત્વા વિપુલાન્ભોગાંસ્તત્તીર્થં ભજતે નરઃ ।
જલપ્રવેશં યઃ કુર્યાત્સંગમે લોકવિશ્રુતે

રાહુગ્રસ્તો યથા સોમો વિમુક્તઃ સર્વપાતકૈઃ ।
સોમલોકમવાપ્નોતિ સોમેન સહ મોદતે

ષષ્ટિવર્ષસહસ્રાણિ ષષ્ટિવર્ષશતાનિ ચ ।
સ્વર્ગલોકમવાપ્નોતિ ઋષિગંધર્વસેવિતઃ

પરિભ્રષ્ટસ્તુ રાજેંદ્ર સમૃદ્ધે જાયતે કુલે ।
અધઃશિરાસ્તુ યો જ્વાલામૂર્ધ્વપાદઃ પિબેન્નરઃ

શતં વર્ષસહસ્રાણિ સ્વર્ગલોકે મહીયતે ।
પરિભ્રષ્ટસ્તુ રાજેંદ્ર અગ્નિહોત્રી ભવેન્નરઃ

ભુક્ત્વા તુ વિપુલાન્ભોગાંસ્તત્તીર્થં ભજતે નરઃ ।
યસ્તુ દેહં વિકર્તિત્વા શકુનિભ્યઃ પ્રયચ્છતિ

વિહંગૈરુપભુક્તસ્ય શૃણુ તસ્યાપિ યત્ફલમ્ ।
શતં વર્ષસહસ્રાણાં સોમલોકે મહીયતે

તતઃ સ્વર્ગાત્પરિભ્રષ્ટો રાજા ભવતિ ધાર્મિકઃ ।
ગુણવાન્રૂપસંપન્નો વિદ્વાન્સુપ્રિયદેહવાન્

ભુક્ત્વા તુ વિપુલાન્ભોગાંસ્તત્તીર્થં ભજતે પુનઃ ।
યામુને ચોત્તરે કૂલે પ્રયાગસ્ય તુ દક્ષિણે

ઋણપ્રમોચનં નામ તીર્થં તત્પરમં સ્મૃતમ્ ।
એકરાત્રોષિતો ભૂત્વા ઋણૈઃ સર્વૈઃ પ્રમુચ્યતે

સૂર્યલોકમવાપ્નોતિ અનૃણી ચ સદા ભવેત્

ઇતિ શ્રીપાદ્મે મહાપુરાણે સ્વર્ગખંડે પ્રયાગમાહાત્મ્યે ચતુશ્ચત્વારિંશોઽધ્યાયઃ