પદ્મ પુરાણ · અધ્યાય 3.42

માર્કંડેય ઉવાચ-
શૃણુ રાજન્પ્રયાગસ્ય માહાત્મ્યં પુનરેવ તુ ।
યં ગત્વા સર્વપાપેભ્યો મુચ્યતે નાત્ર સંશયઃ

આર્તાનાં ચ દરિદ્રાણાં નિશ્ચિતવ્યવસાયિનામ્ ।
સ્થાનં મુક્ત્વા પ્રયાગં તુ નાક્ષયં તુ કદાચન

ગંગાયમુનમાસાદ્ય યસ્તુ પ્રાણાન્પરિત્યજેત્ ।
દીપ્તકાંચનવર્ણાભે વિમાને સૂર્યવર્ચસિ

ગંધર્વાપ્સરસાં મધ્યે સ્વર્ગે મોદતિ માનવઃ ।
ઈપ્સિતાઁલ્લભતેકામાન્વદંતિ ઋષિપુંગવાઃ

સર્વરત્નમયૈર્દિવ્યૈર્નાનાધ્વજસમાકુલૈઃ ।
વરાંગના સમાકીર્ણૈર્મોદતે શુભલક્ષણૈઃ

ગીતવાદિત્રનિર્ઘોષૈઃ પ્રસુપ્તઃ પ્રતિબુધ્યતે ।
યાવન્ન સ્મરતે જન્મ તાવત્સ્વર્ગે મહીયતે

તત્ર સ્વર્ગાત્પરિભ્રષ્ટઃ ક્ષીણકર્મ્મા દિવશ્ચ્યુતઃ ।
હિરણ્યરત્નસંપૂર્ણે સમૃદ્ધે જાયતે કુલે

તદેવ સ્મરતે તીર્થં સ્મરણાત્તત્ર ગચ્છતિ ।
દેશસ્થો યદિ વારણ્યે વિદેશે યદિ વા ગૃહે

પ્રયાગં સ્મરમાત્રોપિ યસ્તુ પ્રાણાન્પરિત્યજેત્ ।
સ બ્રહ્મલોકમાપ્નોતિ વદંતિ ઋષિપુંગવાઃ

સર્વકામફલાવૃત્તા મહી યત્ર હિરણ્મયી ।
ઋષયો મુનયઃ સિદ્ધા યત્ર લોકે પ્રગચ્છતિ

સ્ત્રીસહસ્રા કુલે રમ્યે મંદાકિન્યાસ્તટે શુભે ।
મોદતે ઋષિભિઃ સાર્દ્ધં સ્વકૃતેનેહ કર્મણા

સિદ્ધચારણગન્ધર્વૈઃ પૂજ્યતે દિવિ દૈવતૈઃ ।
તતઃ સ્વર્ગાત્પરિભ્રષ્ટો જંબુદ્વીપપતિર્ભવેત્

તતઃ શુભાનિ કર્માણિ ચિંતયાનઃ પુનઃ પુનઃ ।
ગુણવાન્વિત્તસંપન્નો ભવતીહ ન સંશયઃ

કર્મણા મનસા વાચા સત્યધર્મપ્રતિષ્ઠિતઃ ।
ગંગાયમુનયોર્મધ્યે યસ્તુ દાનં પ્રયચ્છતિ

સુવર્ણંમણિમુક્તાં વા યદિ ધાન્યં પ્રતિગ્રહમ્ ।
સ્વકાર્યે પિતૃકાર્યે વા દેવતાભ્યર્ચનેઽપિ વા

નિષ્ફલં તસ્ય તત્તીર્થં યાવત્તત્ફલમશ્નુતે ।
એવં તીર્થેન ગૃહ્ણીયાત્ પુણ્યેષ્વાયતનેષુ ચ

નિમિત્તેષુ ચ સર્વેષુ અપ્રમત્તો દ્વિજો ભવેત્ ।
કપિલાં પાટલાવર્ણાં પ્રયાગે યઃ પ્રયચ્છતિ

સ્વર્ણશૃંગીં રૌપ્યખુરાં ચૈલકંઠીં પયસ્વિનીમ્ ।
પ્રયાગે શ્રોત્રિયં સાધું ગ્રાહયિત્વા યથાવિધિ

શુક્લાંબરધરં શાંતં ધર્મજ્ઞં વેદપારગમ્ ।
સા ગૌસ્તસ્મૈ ચ દાતવ્યા ગંગાયમુનસંગમે

વાસાંસિ ચ મહાર્હાણિ રત્નાનિ વિવિધાનિ ચ ।
યાવદ્રોમાણિ તસ્યા ગોઃ સંતિ ગાત્રેષુ સત્તમ

તાવદ્વર્ષસહસ્રાણિ સ્વર્ગલોકે મહીયતે ।
યત્રાસૌ લભતે જન્મ સા ગૌસ્તત્રાભિજાયતે

ન ચ પશ્યત્યસૌ ઘોરં નરકં તેન કર્મણા ।
ઉત્તરાન્સ કુરૂન્પ્રાપ્ય મોદતે કાલમક્ષયમ્

ગવાં શતસહસ્રેભ્યો દદ્યાદેકાં પયસ્વિનીમ્ ।
પુત્રાન્દારાન્તથા ભૃત્યાન્ગૌરેકા પ્રતિતારયેત્

તસ્માત્સર્વેષુ દાનેષુ ગોદાનં તુ વિશિષ્યતે ।
દુર્ગમે વિષમે ઘોરે મહાપાતકસંભવે ।
ગૌરેવ રક્ષાં કુરુતે તસ્માદ્દેયા દ્વિજાતયે

ઇતિ શ્રીપાદ્મે મહાપુરાણે સ્વર્ગખંડે દ્વિચત્વારિંશોઽધ્યાયઃ