પદ્મ પુરાણ · અધ્યાય 3.41

યુધિષ્ઠિર ઉવાચ-
ભગવઞ્છ્રોતુમિચ્છામિ પુરાકલ્પે યથાસ્થિતમ્ ।
કથં પ્રયાગગમનં નરાણાં તત્ર કીદૃશમ્

મૃતાનાં કા ગતિસ્તત્ર સ્નાતાનાં ચૈવ કિં ફલમ્ ।
યે વસંતિ પ્રયાગે તુ બ્રૂહિ તેષાં ચ કિં ફલમ્ ।
એતન્મે સર્વમાખ્યાહિ પરં કૌતૂહલં હિ મે

માર્કંડેય ઉવાચ-
કથયિષ્યામિ તે વત્સ નાથેષ્ટં યચ્ચ યત્ફલમ્ ।
પુરા ઋષીણાં વિપ્રાણાં કથ્યમાનં મયા શ્રુતમ્

આપ્રયાગાત્પ્રતિષ્ઠાનાદ્ધર્મકી વાસુકી હ્રદાત્ ।
કંબલાશ્વતરૌ નાગૌ નાગાશ્ચ બહુમૂલિકાઃ

એતત્પ્રજાપતિક્ષેત્રં ત્રિષુ લોકેષુ વિશ્રુતમ્ ।
અત્ર સ્નાત્વા દિવં યાંતિ યે મૃતાસ્તેઽપુનર્ભવાઃ

તત્ર બ્રહ્માદયો દેવા રક્ષાં કુર્વંતિ સંગતાઃ ।
અન્યે ચ બહવસ્તીર્થાઃ સર્વપાપપ્રણાશનાઃ

ન શક્યાઃ કથિતું રાજન્બહુવર્ષશતૈરપિ ।
સંક્ષેપેણ પ્રવક્ષ્યામિ પ્રયાગસ્ય ચ કીર્ત્તનમ્

ષષ્ટિર્ધનુઃ સહસ્રાણિ પરિરક્ષંતિ જાહ્નવીમ્ ।
યમુનાં રક્ષતિ સદા સવિતા સપ્તવાહનઃ

પ્રયાગં તુ વિશેષેણ સ્વયં રક્ષતિ વાસવઃ ।
મંડલં રક્ષતિ હરિર્દેવૈઃ સહ સુસંમતમ્

તં વટં રક્ષતે નિત્યં શૂલપાણિર્મહેશ્વરઃ ।
સ્થાનં રક્ષતિ વૈ દેવઃ સર્વપાપહરં શુભમ્

અધર્મેણ વૃતો લોકે નૈવ ગચ્છતિ તત્પદમ્ ।
સ્વલ્પમલ્પતરં પાપં યદા તસ્ય નરાધિપ

પ્રયાગસ્મરમાણસ્ય સર્વમાયાતિ સંક્ષયમ્ ।
દર્શનાત્તસ્ય તીર્થસ્ય નામસંકીર્તનાદપિ

મૃત્તિકા લભનાદ્વાપિ નરઃ પાપાદ્વિમુચ્યતે ।
પંચકુંડાનિ રાજેંદ્ર યેષાં મધ્યે તુ જાહ્નવી

પ્રયાગે તુ પ્રવિષ્ટસ્ય પાપં ક્ષરતિ તત્ક્ષણાત્ ।
યોજનાનાં સહસ્રેષુ ગંગાં સ્મરતિ યો નરઃ

અપિ દુષ્કૃતકર્માસૌ લભતે પરમાં ગતિમ્ ।
કીર્તનાન્મુચ્યતે પાપૈર્દૃષ્ટ્વા ભદ્રાણિ પશ્યતિ

અવગાહ્ય ચ પીત્વા ચ પુનાત્યાસપ્તમં કુલમ્ ।
સત્યવાદી જિતક્રોધો અહિંસાં પરમાસ્થિતઃ

ધર્માનુસારી તત્ત્વજ્ઞો ગોબ્રાહ્મણહિતે રતઃ ।
ગંગાયમુનયોર્મધ્યે સ્નાતો મુચ્યેત કિલ્બિષાત્

મનસા ચિંતિતાન્કામાન્સમ્યક્પ્રાપ્નોતિ પુષ્કલાન્ ।
તતો ગત્ત્વા પ્રયાગં તુ સર્વદેવાભિરક્ષિતમ્

બ્રહ્મચારી વસેન્માસં પિતૃદેવાંશ્ચ તર્પયેત્ ।
ઈપ્સિતાઁલ્લભતે કામાન્યત્ર તત્રાભિજાયતે

તપનસ્ય સુતા દેવી ત્રિષુ લોકેષુ વિશ્રુતા ।
સમાગતા મહાભાગા યમુના યત્ર નિમ્નગાઃ

તત્ર સન્નિહિતો નિત્યં સાક્ષાદ્દેવો મહેશ્વરઃ ।
દુષ્પ્રાપં માનુષૈઃ પુણ્યં પ્રયાગં તુ યુધિષ્ઠિર

દેવદાનવગંધર્વા ઋષયઃ સિદ્ધચારણાઃ ।
તત્રોપસ્પૃશ્ય રાજેંદ્ર સ્વર્ગલોકે મહીયતે

ઇતિ શ્રીપાદ્મે મહાપુરાણે સ્વર્ગખંડે એકચત્વારિંશોઽધ્યાયઃ