Padma Purana · Chapter 3.42

mārkaṃḍeya uvāca-
śṛṇu rājanprayāgasya māhātmyaṃ punareva tu /
yaṃ gatvā sarvapāpebhyo mucyate nātra saṃśayaḥ

ārtānāṃ ca daridrāṇāṃ niścitavyavasāyinām /
sthānaṃ muktvā prayāgaṃ tu nākṣayaṃ tu kadācana

gaṃgāyamunamāsādya yastu prāṇānparityajet /
dīptakāṃcanavarṇābhe vimāne sūryavarcasi

gaṃdharvāpsarasāṃ madhye svarge modati mānavaḥ /
īpsitām̐llabhatekāmānvadaṃti ṛṣipuṃgavāḥ

sarvaratnamayairdivyairnānādhvajasamākulaiḥ /
varāṃganā samākīrṇairmodate śubhalakṣaṇaiḥ

gītavāditranirghoṣaiḥ prasuptaḥ pratibudhyate /
yāvanna smarate janma tāvatsvarge mahīyate

tatra svargātparibhraṣṭaḥ kṣīṇakarmmā divaścyutaḥ /
hiraṇyaratnasaṃpūrṇe samṛddhe jāyate kule

tadeva smarate tīrthaṃ smaraṇāttatra gacchati /
deśastho yadi vāraṇye videśe yadi vā gṛhe

prayāgaṃ smaramātropi yastu prāṇānparityajet /
sa brahmalokamāpnoti vadaṃti ṛṣipuṃgavāḥ

sarvakāmaphalāvṛttā mahī yatra hiraṇmayī /
ṛṣayo munayaḥ siddhā yatra loke pragacchati

strīsahasrā kule ramye maṃdākinyāstaṭe śubhe /
modate ṛṣibhiḥ sārddhaṃ svakṛteneha karmaṇā

siddhacāraṇagandharvaiḥ pūjyate divi daivataiḥ /
tataḥ svargātparibhraṣṭo jaṃbudvīpapatirbhavet

tataḥ śubhāni karmāṇi ciṃtayānaḥ punaḥ punaḥ /
guṇavānvittasaṃpanno bhavatīha na saṃśayaḥ

karmaṇā manasā vācā satyadharmapratiṣṭhitaḥ /
gaṃgāyamunayormadhye yastu dānaṃ prayacchati

suvarṇaṃmaṇimuktāṃ vā yadi dhānyaṃ pratigraham /
svakārye pitṛkārye vā devatābhyarcane'pi vā

niṣphalaṃ tasya tattīrthaṃ yāvattatphalamaśnute /
evaṃ tīrthena gṛhṇīyāt puṇyeṣvāyataneṣu ca

nimitteṣu ca sarveṣu apramatto dvijo bhavet /
kapilāṃ pāṭalāvarṇāṃ prayāge yaḥ prayacchati

svarṇaśṛṃgīṃ raupyakhurāṃ cailakaṃṭhīṃ payasvinīm /
prayāge śrotriyaṃ sādhuṃ grāhayitvā yathāvidhi

śuklāṃbaradharaṃ śāṃtaṃ dharmajñaṃ vedapāragam /
sā gaustasmai ca dātavyā gaṃgāyamunasaṃgame

vāsāṃsi ca mahārhāṇi ratnāni vividhāni ca /
yāvadromāṇi tasyā goḥ saṃti gātreṣu sattama

tāvadvarṣasahasrāṇi svargaloke mahīyate /
yatrāsau labhate janma sā gaustatrābhijāyate

na ca paśyatyasau ghoraṃ narakaṃ tena karmaṇā /
uttarānsa kurūnprāpya modate kālamakṣayam

gavāṃ śatasahasrebhyo dadyādekāṃ payasvinīm /
putrāndārāntathā bhṛtyāngaurekā pratitārayet

tasmātsarveṣu dāneṣu godānaṃ tu viśiṣyate /
durgame viṣame ghore mahāpātakasaṃbhave /
gaureva rakṣāṃ kurute tasmāddeyā dvijātaye

iti śrīpādme mahāpurāṇe svargakhaṃḍe dvicatvāriṃśo'dhyāyaḥ