પદ્મ પુરાણ · અધ્યાય 3.37

નારદ ઉવાચ-।
અન્યાનિ ચ મહારાજ તીર્થાનિ પાવનાનિ તુ ।
વારાણસ્યાં સ્થિતાનીહ સંશૃણુષ્વ યુધિષ્ઠિર

પ્રયાગાદધિકં તીર્થં પ્રયાગં પરમં શુભમ્ ।
વિશ્વરૂપં તથા તીર્થં તાલતીર્થમનુત્તમમ્

આકાશાખ્યં મહાતીર્થં તીર્થં ચૈવાર્ષભં પરમ્ ।
સુનીલં ચ મહાતીર્થં ગૌરીતીર્થમનુત્તમમ્

પ્રાજાપત્યં તથા તીર્થં સ્વર્ગદ્વારં તથૈવ ચ ।
જંબુકેશ્વરમિત્યુક્તં ધર્માખ્યં તીર્થમુત્તમમ્

ગયાતીર્થં પરં તીર્થં તીર્થં ચૈવ મહાનદી ।
નારાયણપરં તીર્થં વાયુતીર્થમનુત્તમમ્

જ્ઞાનતીર્થં પરં ગુહ્યં વારાહં તીર્થમુત્તમમ્ ।
યમતીર્થં યથાપુણ્યં તીર્થં સંમૂર્તિકં શુભમ્

અગ્નિતીર્થં મહારાજ કલશેશ્વરમુત્તમમ્ ।
નાગતીર્થં સોમતીર્થં સૂર્યતીર્થં તથૈવ ચ

પર્વતાખ્યં મહાગુહ્યં મણિકર્ણ્યમનુત્તમમ્ ।
ઘટોત્કચં તીર્થવરં શ્રીતીર્થં ચ પિતામહમ્

ગંગાતીર્થં તુ દેવેશં યયાતેસ્તીર્થમુત્તમમ્ ।
કાપિલં ચૈવ સોમેશં બ્રહ્મતીર્થમનુત્તમમ્

તત્ર લિંગં પુરાણીયં સ્થાતું બ્રહ્મા યથાગતઃ ।
તદાનીં સ્થાપયામાસ વિષ્ણુસ્તલ્લિંગમૈશ્વરમ્

તત્ર સ્નાત્વા સમાગમ્ય બ્રહ્મા પ્રોવાચ તં હરિમ્ ।
મયાનીતમિદં લિંગં કસ્માત્સ્થાપિતવાનસિ

તમાહ વિષ્ણુસ્ત્વત્તોઽપિ રુદ્રે ભક્તિર્દૃઢા મમ ।
તસ્માત્પ્રતિષ્ઠિતં લિગં નામ્ના તવ ભવિષ્યતિ

ભૂતેશ્વરં તથા તીર્થં તીર્થં ધર્મસમુદ્ભવમ્ ।
ગંધર્વતીર્થં સુશુભં વાહ્નેયં તીર્થમુત્તમમ્

દૌર્વાસિકં વ્યોમતીર્થં ચંદ્રતીર્થં યુધિષ્ઠિર ।
ચિંતાંગદેશ્વરં તીર્થં પુણ્યં વિદ્યાધરેશ્વરમ્

કેદારતીર્થમુગ્રાખ્યં કાલંજરમનુત્તમમ્ ।
સારસ્વતં પ્રભાસં ચ રુદ્રકર્ણહ્રદં શુભમ્

કોકિલાખ્યં મહાતીર્થં તીર્થં ચૈવ મહાલયમ્ ।
હિરણ્યગર્ભં ગોપ્રેક્ષં તીર્થં ચૈવમનુત્તમમ્

ઉપશાંતં શિવં ચૈવ વ્યાઘ્રેશ્વરમનુત્તમમ્ ।
ત્રિલોચનં મહાતીર્થં લોકાર્કં ચોત્તરાહ્વયમ્

કપાલમોચનં તીર્થં બ્રહ્મહત્યાવિનાશનમ્ ।
શુક્રેશ્વરં મહાપુણ્યમાનંદપુરમુત્તમમ્

એવમાદીનિ તીર્થાનિ વારાણસ્યાં સ્થિતાનિ વૈ ।
ન શક્યં વિસ્તરાદ્વક્તું કલ્પકોટિશતૈરપિ

ઇતિ શ્રીપાદ્મે મહાપુરાણે સ્વર્ગખંડે વારાણસીમાહાત્મ્યે સપ્તત્રિંશોઽધ્યાયઃ