Padma Purana · Chapter 3.37

nārada uvāca-/
anyāni ca mahārāja tīrthāni pāvanāni tu /
vārāṇasyāṃ sthitānīha saṃśṛṇuṣva yudhiṣṭhira

prayāgādadhikaṃ tīrthaṃ prayāgaṃ paramaṃ śubham /
viśvarūpaṃ tathā tīrthaṃ tālatīrthamanuttamam

ākāśākhyaṃ mahātīrthaṃ tīrthaṃ caivārṣabhaṃ param /
sunīlaṃ ca mahātīrthaṃ gaurītīrthamanuttamam

prājāpatyaṃ tathā tīrthaṃ svargadvāraṃ tathaiva ca /
jaṃbukeśvaramityuktaṃ dharmākhyaṃ tīrthamuttamam

gayātīrthaṃ paraṃ tīrthaṃ tīrthaṃ caiva mahānadī /
nārāyaṇaparaṃ tīrthaṃ vāyutīrthamanuttamam

jñānatīrthaṃ paraṃ guhyaṃ vārāhaṃ tīrthamuttamam /
yamatīrthaṃ yathāpuṇyaṃ tīrthaṃ saṃmūrtikaṃ śubham

agnitīrthaṃ mahārāja kalaśeśvaramuttamam /
nāgatīrthaṃ somatīrthaṃ sūryatīrthaṃ tathaiva ca

parvatākhyaṃ mahāguhyaṃ maṇikarṇyamanuttamam /
ghaṭotkacaṃ tīrthavaraṃ śrītīrthaṃ ca pitāmaham

gaṃgātīrthaṃ tu deveśaṃ yayātestīrthamuttamam /
kāpilaṃ caiva someśaṃ brahmatīrthamanuttamam

tatra liṃgaṃ purāṇīyaṃ sthātuṃ brahmā yathāgataḥ /
tadānīṃ sthāpayāmāsa viṣṇustalliṃgamaiśvaram

tatra snātvā samāgamya brahmā provāca taṃ harim /
mayānītamidaṃ liṃgaṃ kasmātsthāpitavānasi

tamāha viṣṇustvatto'pi rudre bhaktirdṛḍhā mama /
tasmātpratiṣṭhitaṃ ligaṃ nāmnā tava bhaviṣyati

bhūteśvaraṃ tathā tīrthaṃ tīrthaṃ dharmasamudbhavam /
gaṃdharvatīrthaṃ suśubhaṃ vāhneyaṃ tīrthamuttamam

daurvāsikaṃ vyomatīrthaṃ caṃdratīrthaṃ yudhiṣṭhira /
ciṃtāṃgadeśvaraṃ tīrthaṃ puṇyaṃ vidyādhareśvaram

kedāratīrthamugrākhyaṃ kālaṃjaramanuttamam /
sārasvataṃ prabhāsaṃ ca rudrakarṇahradaṃ śubham

kokilākhyaṃ mahātīrthaṃ tīrthaṃ caiva mahālayam /
hiraṇyagarbhaṃ goprekṣaṃ tīrthaṃ caivamanuttamam

upaśāṃtaṃ śivaṃ caiva vyāghreśvaramanuttamam /
trilocanaṃ mahātīrthaṃ lokārkaṃ cottarāhvayam

kapālamocanaṃ tīrthaṃ brahmahatyāvināśanam /
śukreśvaraṃ mahāpuṇyamānaṃdapuramuttamam

evamādīni tīrthāni vārāṇasyāṃ sthitāni vai /
na śakyaṃ vistarādvaktuṃ kalpakoṭiśatairapi

iti śrīpādme mahāpurāṇe svargakhaṃḍe vārāṇasīmāhātmye saptatriṃśo'dhyāyaḥ