પદ્મ પુરાણ · અધ્યાય 3.36

નારદ ઉવાચ-
વારાણસ્યાં મહારાજ મધ્યમેશં પરાત્પરમ્ ।
તસ્મિન્સ્થાને મહાદેવો દેવ્યા સહ મહેશ્વરઃ

રમતે ભગવાન્નિત્યં રુદ્રૈશ્ચ પરિવારિતઃ ।
તત્ર પૂર્વં હૃષીકેશો વિશ્વાત્મા દેવકીસુતઃ

ઉવાસ વત્સરં કૃષ્ણઃ સદા પાશુપતૈર્યુતઃ ।
ભસ્મોદ્ધૂલિતસર્વાંગો રુદ્રાધ્યયનતત્પરઃ

આરાધયન્હરિઃ શંભું કૃત્વા પાશુપતંવ્રતમ્ ।
તસ્ય તે બહવઃ શિષ્યાઃ બ્રહ્મચર્યપરાયણાઃ

લબ્ધ્વા તદ્વદનાજ્જ્ઞાનં દૃષ્ટવંતો મહેશ્વરમ્ ।
તસ્ય દેવો મહાદેવઃ પ્રત્યક્ષં નીલલોહિતઃ

દદૌ કૃષ્ણસ્ય ભગવાન્વરદો વરમુત્તમમ્ ।
યેઽર્ચયંતિ ચ ગોવિંદં મદ્ભક્તા વિધિપૂર્વકમ્

તેષાં તદૈશ્વરં જ્ઞાનમુત્પત્સ્યતિ જગન્મયમ્ ।
નમસ્યોઽર્ચયિતવ્યશ્ચ ધ્યાતવ્યો મત્પરૈર્જનૈઃ

ભવિષ્યંતિ ન સંદેહો મત્પ્રસાદાદ્દ્વિજાતયઃ ।
યેઽત્ર દ્રક્ષ્યંતિ દેવેશં સ્નાત્વા દેવં પિનાકિનમ્

બ્રહ્મહત્યાદિકં પાપં તેષામાશુ વિનશ્યતિ ।
પ્રાણાંસ્ત્યક્ષ્યંતિ યે ર્મત્યાઃ પાપકર્મરતા અપિ

તે યાંતિ તત્પરં સ્થાનં નાત્ર કાર્યા વિચારણા ।
ધન્યાસ્તુ ખલુ તે વિજ્ઞા મંદાકિન્યાં કૃતોદકાઃ

અર્ચયિત્વા મહાદેવં મધ્યમેશ્વરમીશ્વરમ્ ।
જ્ઞાનં દાનં તપઃ શ્રાદ્ધં પિંડનિર્વપણં ત્વિહ

એકૈકશઃ કૃતં કર્મ પુનાત્યાસપ્તમં કુલમ્ ।
સન્નિહત્યામુપસ્પૃશ્ય રાહુગ્રસ્તે દિવાકરે

યત્ફલં લભતે મર્ત્ત્યસ્તસ્માદ્દશગુણં ત્વિહ ।
એવમુક્તં મહારાજ માહાત્મ્યં મધ્યમેશ્વરે ।
યઃ શૃણોતિ પરં ભક્ત્યા સ યાતિ પરમં પદમ્

ઇતિ શ્રીપાદ્મે મહાપુરાણે સ્વર્ગખંડે વારાણસીમાહાત્મ્યે ષટ્ત્રિંશોઽધ્યાયઃ