પદ્મ પુરાણ · અધ્યાય 3.25

નારદૌવાચ-।
વિતસ્તાં ચ સમાસાદ્ય સંતર્પ્ય પિતૃદેવતાઃ ।
નરઃ ફલમવાપ્નોતિ વાજપેયસ્ય ભારત

કાશ્મીરેષ્વેવ નાગસ્ય ભવનં તક્ષકસ્ય ચ ।
વિતસ્તાખ્યમિતિ ખ્યાતં સર્વપાપપ્રમોચનમ્

તત્ર સ્નાત્વા નરો નૂનં વાજપેયમવાપ્નુયાત્ ।
સર્વપાપવિશુદ્ધાત્મા ગચ્છેત પરમાં ગતિમ્

તતો ગચ્છેત મલદં ત્રિષુ લોકેષુ વિશ્રુતમ્ ।
પશ્ચિમાયાં તુ સંધ્યાયામુપસ્પૃશ્ય યથાવિધિ

ચરું સપ્તાર્ચિષે રાજન્યથાશક્તિ નિવેદયેત્ ।
પિતૄણામક્ષયં દાનં પ્રવદંતિ મનીષિણઃ

ગવાંશતસહસ્રેણ રાજસૂયશતેન ચ ।
અશ્વમેધસહસ્રેણ શ્રેયાન્સપ્તાર્ચિષશ્ચરુઃ

તતો નિવૃત્તો રાજેંદ્ર રુદ્રાસ્પદમથાવિશેત્ ।
અભિગમ્ય મહાદેવમશ્વમેધફલં લભેત્

મણિમંતં સમાસાદ્ય બ્રહ્મચારી સમાહિતઃ ।
એકરાત્રોષિતો રાજન્નગ્નિષ્ટોમફલં લભેત્

અથ ગચ્છેત રાજેંદ્ર દેવિકાં લોકવિશ્રુતામ્ ।
પ્રસૂતિર્યત્ર વિપ્રાણાં શ્રૂયતે ભરતર્ષભ

ત્રિશૂલપાણેઃ સ્થાનં યત્ત્રિષુલોકેષુ વિશ્રુતમ્ ।
દેવિકાયાં નરઃ સ્નાત્વા અભ્યર્ચ્ય ચ મહેશ્વરમ્

યથાશક્તિ નરસ્તત્ર નિવેદ્ય ભરતર્ષભ ।
સર્વકામસમૃદ્ધસ્ય યજ્ઞસ્ય લભતે ફલમ્

કામાખ્યં તત્ર રુદ્રસ્ય તીર્થં દેવર્ષિસંમતમ્ ।
તત્ર સ્નાત્વા નરઃ ક્ષિપ્રં સિદ્ધિમાપ્નોતિ ભારત

યજનં યાજનં ગત્વા તથૈવ બ્રહ્મવાલકમ્ ।
પુષ્પન્યાસ ઉપસ્પૃશ્ય ન શોચેન્મરણં તતઃ

અર્દ્ધયોજનવિસ્તારાં પંચયોજનમાયતામ્ ।
એતાવદ્દેવિકામાહુઃ પુણ્યાં દેવર્ષિસંમતામ્

તતો ગચ્છેત ધર્મજ્ઞ દીર્ઘસત્રં યથાક્રમમ્ ।
યત્ર બ્રહ્માદયો દેવાઃ સિદ્ધાશ્ચ પરમર્ષયઃ

દીર્ઘસત્રમુપાસંતે દીક્ષિતા નિયતવ્રતાઃ ।
ગમનાદેવ રાજેંદ્ર દીર્ઘસત્રમરિંદમ

રાજસૂયાશ્વમેધાભ્યાં ફલં પ્રાપ્નોતિ માનવઃ ।
તતો વિનાશનં ગચ્છેન્નિયતો નિયતાશનઃ

ગચ્છંત્યંતર્હિતા યત્ર મેરુપૃષ્ઠે સરસ્વતી ।
ચમસે ચ શિવોદ્ભેદે નાગોદ્ભેદે ચ દૃશ્યતે

સ્નાત્વા તુ ચમસોદ્ભેદે અગ્નિષ્ટોમફલં લભેત્ ।
શિવોદ્ભેદે નરઃ સ્નાત્વા ગોસહસ્રફલં લભેત્

નાગોદ્ભેદે નરઃ સ્નાત્વા નાગલોકમવાપ્નુયાત્ ।
શશયાનં ચ રાજેંદ્ર તીર્થમાસાદ્ય દુર્લભમ્

શશરૂપપ્રતિચ્છન્ના પુષ્કરા યત્ર ભારત ।
સરસ્વત્યાં મહાભાગ અનુસંવત્સરંહિતે

સ્નાયંતે ભરતશ્રેષ્ઠ વૃત્તા વૈ કાર્ત્તિકીં સદા ।
તત્ર સ્નાત્વા નરવ્યાઘ્ર દ્યોતતે શિવવત્સદા

ગોસહસ્રફલં ચૈવ પ્રાપ્નુયાદ્ભરતર્ષભ ।
કુમારકોટિમાસાદ્ય નિયતઃ કુરુનંદન

તત્રાભિષેકં કુર્વીત પિતૃદેવાર્ચને રતઃ ।
ગવામયુતમાપ્નોતિ કુલં ચૈવ સમુદ્ધરેત્

તતો ગચ્છેત ધર્મજ્ઞ રુદ્રકોટિં સમાહિતાઃ ।
પુરા યત્ર મહારાજ ઋષિકોટિઃ સમાહિતા

વર્ષેણ ચ સમાવિષ્ટા દેવદર્શનકાંક્ષયા ।
અહંપૂર્વમહંપૂર્વં દ્રક્ષ્યામિ વૃષભધ્વજમ્

એવં સંપ્રસ્થિતા રાજનૃષયઃ કિલભારત ।
તતો યોગીશ્વરેણાપિ યોગમાસ્થાય ભૂપતે

તેષાં મન્યુપ્રશાંત્યર્થમૃષીણાં ભાવિતાત્મનામ્ ।
સૃષ્ટા તુ કોટિરુદ્રાણામૃષીણામગ્રતઃ સ્થિતા

મયા પૂર્વં હરો દૃષ્ટો ઇતિ તે મેનિરે પૃથક્ ।
તેષાં તુષ્ટો મહાદેવ ઋષીણામુગ્રતેજસામ્

ભક્ત્યા પરમયા રાજન્વરં તેષાં પ્રદત્તવાન્ ।
અદ્યપ્રભૃતિ યુષ્માકં ધર્મવૃદ્ધિર્ભવિષ્યતિ

તત્ર સ્નાત્વા નરવ્યાઘ્ર રુદ્રકોટ્યાં નરઃ શુચિઃ ।
અશ્વમેધમવાપ્નોતિ કુલં ચૈવ સમુદ્ધરેત્

તતો ગચ્છેત રાજેંદ્ર સંગમં લોકવિશ્રુતમ્ ।
સરસ્વત્યાં મહાપુણ્યમુપાસીત જનાર્દનમ્

યત્ર બ્રહ્માદયો દેવા ઋષયઃ સિદ્ધચારણાઃ ।
અભિગચ્છંતિ રાજેંદ્ર ચૈત્રશુક્લચતુર્દશીમ્

તત્ર સ્નાત્વા નરવ્યાઘ્ર વિંદેદ્બહુસુવર્ણકમ્ ।
સર્વપાપવિશુદ્ધાત્મા શિવલોકં ચ ગચ્છતિ

ઋષીણાં યત્ર સત્રાણિ સમાપ્તાનિ નરાધિપ ।
તત્રાવસાનમાસાદ્ય ગોસહસ્રફલં લભેત્

ઇતિ શ્રીપાદ્મે મહાપુરાણે સ્વર્ગખંડે પંચવિંશોઽધ્યાયઃ