પદ્મ પુરાણ · અધ્યાય 3.24

યુધિષ્ઠિર ઉવાચ-।
અથાન્યાનિ તુ તીર્થાનિ વસિષ્ઠોક્તાનિ મે વદ ।
શ્રુત્વા યાનિ ચ પાપાનિ વિલયં યાંતિ નારદ

નારદ ઉવાચ-।
શૃણુષ્વાત્ર હિ તીર્થાનિ વસિષ્ઠોક્તાનિ પાર્થિવ ।
દક્ષિણં સિંધુમાસાદ્ય બ્રહ્મચારી જિતેંદ્રિયઃ

અગ્નિષ્ટોમમવાપ્નોતિ વિમાનં ચાધિરોહતિ ।
ચર્મણ્વતીં સમાસાદ્ય નિયતો નિયતાશનઃ

રંતિદેવાભ્યનુજ્ઞાતો અગ્નિષ્ટોમફલં લભેત્ ।
તતો ગચ્છેત ધર્મજ્ઞ હિમવત્સુતમર્બુદમ્

પૃથિવ્યા યત્ર વૈ છિદ્રં પૂર્વમાસીદ્યુધિષ્ઠિર ।
તત્રાશ્રમો વસિષ્ઠસ્ય ત્રિષુ લોકેષુ વિશ્રુતં

તત્રોષ્ય રજનીમેકાં ગોસહસ્રફલં લભેત્ ।
પિંગાતીર્થમુપસ્પૃશ્ય બ્રહ્મચારી નરાધિપ

કપિલાનાં નરવ્યાઘ્ર શતસ્ય ફલમાપ્નુયાત્ ।
તતો ગચ્છેત ધર્મજ્ઞ પ્રભાસં લોકવિશ્રુતમ્

યત્ર સન્નિહિતો નિત્યં સ્વયમેવ હુતાશનઃ ।
દેવતાનાં મુખં વીર અનલોઽનિલસારથિઃ

તસ્મિંસ્તીર્થવરે સ્નાત્વા શુચિઃ પ્રયતમાનસઃ ।
અગ્નિષ્ટોમાતિરાત્રાભ્યાં ફલં પ્રાપ્નોતિ માનવઃ

તતો ગત્વા સરસ્વત્યાઃ સાગરસ્ય ચ સંગમમ્ ।
ગોસહસ્રફલં પ્રાપ્ય સ્વર્ગલોકે મહીયતે

દીપ્યમાનોઽગ્નિવન્નિત્યં પ્રભયા ભરતર્ષભ ।
તીર્થે સલિલરાજસ્ય સ્નાત્વા પ્રયતમાનસઃ

ત્રિરાત્રમુષિતસ્તત્ર તર્પયેત્પિતૃદેવતાઃ ।
વિરાજતિ યથા સોમો વાજિમેધં ચ વિંદતિ

વરદાનં તતો ગચ્છેત્તીર્થં ભરતસત્તમ ।
વિષ્ણોર્દુર્વાસસા યત્ર વરો દત્તો યુધિષ્ઠિર

વરદાને નરઃ સ્નાત્વા ગોસહસ્રફલં લભેત્ ।
તતો દ્વારવતીં ગચ્છેન્નિયતો નિયતાશનઃ

પિંડારકે નરઃ સ્નાત્વા લભેદ્બહુસુવર્ણકમ્

તસ્મિંસ્તીર્થે મહારાજ પદ્મલક્ષણલક્ષિતાઃ ।
અદ્યાપિ મુદ્રા દૃશ્યંતે તદદ્ભુતમરિંદમ

ત્રિશૂલાંકાનિ પદ્માનિ દૃશ્યંતે કુરુનંદન ।
મહાદેવસ્ય સાન્નિધ્યં તત્રૈવ ભરતર્ષભ

સાગરસ્ય ચ સિંધોશ્ચ સંગમં પ્રાપ્ય ભારત ।
તીર્થે સલિલરાજસ્ય સ્નાત્વા પ્રયતમાનસઃ

તર્પયિત્વા પિતૄન્દેવાનૃષીંશ્ચ ભરતર્ષભ ।
પ્રાપ્નોતિ વારુણં લોકં દીપ્યમાનઃ સ્વતેજસા

શંકુકર્ણેશ્વરં દેવમર્ચયિત્વા યુધિષ્ઠિર ।
અશ્વમેધં દશગુણં પ્રવદંતિ મનીષિણઃ

પ્રદક્ષિણમુપાવૃત્ય ગચ્છેત ભરતર્ષભ ।
તીર્થં કુરુવરશ્રેષ્ઠ ત્રિષુ લોકેષુ વિશ્રુતમ્

તિમીતિ નામ્ના વિખ્યાતં સર્વપાપપ્રમોચનમ્ ।
યત્ર શક્રાદયો દેવા ઉપાસંતે મહેશ્વરમ્

તત્ર સ્નાત્વાર્ચયિત્વા ચ રુદ્રં દેવગણૈર્વૃતમ્ ।
જન્મપ્રભૃતિ પાપાનિ કૃતાનિ નુદતે નરઃ

તિમિરત્ર નરશ્રેષ્ઠ સર્વદેવૈરભિષ્ટુતઃ ।
તત્ર સ્નાત્વા નરશ્રેષ્ઠ હયમેધમવાપ્નુયાત્

જિત્વા તત્ર મહાપ્રાજ્ઞ વિષ્ણુના દિતિનંદનમ્ ।
પુરા શૌચં કૃતં રાજન્હત્વા દૈવતકંટકાન્

તતો ગચ્છેત ધર્મજ્ઞ વસુધારામભિષ્ટુતામ્ ।
ગમનાદેવ તસ્યાં હિ હયમેધમવાપ્નુયાત્

સ્નાત્વા કુરુવરશ્રેષ્ઠ પ્રયતાત્મા તુ માનવઃ ।
તર્પયિત્વા પિતૄન્દેવાન્વિષ્ણુલોકે મહીયતે

તીર્થં ચાપિ પરં તત્ર વસૂનાં ભરતર્ષભ ।
તત્ર સ્નાત્વા ચ પીત્વા ચ વસૂનાં સંમતો ભવેત્

સિંધુતમમિતિ ખ્યાતં સર્વપાપપ્રણાશનમ્ ।
તત્ર સ્નાત્વા નરશ્રેષ્ઠ લભેદ્બહુસુવર્ણકમ્

બ્રહ્મતુંગં સમાસાદ્ય શુચિઃ પ્રયતમાનસઃ ।
બ્રહ્મલોકમવાપ્નોતિ સુકૃતી વિરજા નરઃ

કુમારિકાણાં શક્રસ્ય તીર્થં સિદ્ધનિષેવિતમ્ ।
તત્ર સ્નાત્વા નરશ્રેષ્ઠ શક્રલોકમવાપ્નુયાત્

રેણુકાયાશ્ચ તત્રૈવ તીર્થં દેવનિષેવિતમ્ ।
સ્નાત્વા તત્ર ભવેદ્વિપ્રો વિમલશ્ચંદ્રમા ઇવ

અથ પંચનદં ગત્વા નિયતો નિયતાશનઃ ।
પંચયજ્ઞાનવાપ્નોતિ ક્રમશો યે તુ કીર્તિતાઃ

તતો ગચ્છેત ધર્મજ્ઞ ભીમાયાઃ સ્થાનમુત્તમમ્ ।
તત્ર સ્નાત્વા ન યોન્યાં વૈ નરો ભરતસત્તમ

દેવ્યાઃ પુત્રો ભવેદ્રાજન્તત્ર કુંડલવિગ્રહઃ ।
ગવાં શતસહસ્રસ્ય ફલં ચૈવાપ્નુયાન્મહત્

ગિરિકુંજં સમાસાદ્ય ત્રિષુ લોકેષુ વિશ્રુતમ્ ।
પિતામહં નમસ્કૃત્ય ગોસહસ્રફલં લભેત્

તતો ગચ્છેત ધર્મજ્ઞ વિમલં તીર્થમુત્તમમ્ ।
અદ્યાપિ યત્ર દૃશ્યંતે મત્સ્યાઃ સૌવર્ણરાજતાઃ

તત્ર સ્નાત્વા નરશ્રેષ્ઠ વાજપેયમવાપ્નુયાત્ ।
સર્વપાપવિશુદ્ધાત્મા ગચ્છેત્પરમિકાં ગતિમ્

ઇતિ શ્રીપાદ્મે મહાપુરાણે સ્વર્ગખંડે ચતુર્વિંશોઽધ્યાયઃ