Padma Purana · Chapter 3.25

nāradauvāca-/
vitastāṃ ca samāsādya saṃtarpya pitṛdevatāḥ /
naraḥ phalamavāpnoti vājapeyasya bhārata

kāśmīreṣveva nāgasya bhavanaṃ takṣakasya ca /
vitastākhyamiti khyātaṃ sarvapāpapramocanam

tatra snātvā naro nūnaṃ vājapeyamavāpnuyāt /
sarvapāpaviśuddhātmā gaccheta paramāṃ gatim

tato gaccheta maladaṃ triṣu lokeṣu viśrutam /
paścimāyāṃ tu saṃdhyāyāmupaspṛśya yathāvidhi

caruṃ saptārciṣe rājanyathāśakti nivedayet /
pitṝṇāmakṣayaṃ dānaṃ pravadaṃti manīṣiṇaḥ

gavāṃśatasahasreṇa rājasūyaśatena ca /
aśvamedhasahasreṇa śreyānsaptārciṣaścaruḥ

tato nivṛtto rājeṃdra rudrāspadamathāviśet /
abhigamya mahādevamaśvamedhaphalaṃ labhet

maṇimaṃtaṃ samāsādya brahmacārī samāhitaḥ /
ekarātroṣito rājannagniṣṭomaphalaṃ labhet

atha gaccheta rājeṃdra devikāṃ lokaviśrutām /
prasūtiryatra viprāṇāṃ śrūyate bharatarṣabha

triśūlapāṇeḥ sthānaṃ yattriṣulokeṣu viśrutam /
devikāyāṃ naraḥ snātvā abhyarcya ca maheśvaram

yathāśakti narastatra nivedya bharatarṣabha /
sarvakāmasamṛddhasya yajñasya labhate phalam

kāmākhyaṃ tatra rudrasya tīrthaṃ devarṣisaṃmatam /
tatra snātvā naraḥ kṣipraṃ siddhimāpnoti bhārata

yajanaṃ yājanaṃ gatvā tathaiva brahmavālakam /
puṣpanyāsa upaspṛśya na śocenmaraṇaṃ tataḥ

arddhayojanavistārāṃ paṃcayojanamāyatām /
etāvaddevikāmāhuḥ puṇyāṃ devarṣisaṃmatām

tato gaccheta dharmajña dīrghasatraṃ yathākramam /
yatra brahmādayo devāḥ siddhāśca paramarṣayaḥ

dīrghasatramupāsaṃte dīkṣitā niyatavratāḥ /
gamanādeva rājeṃdra dīrghasatramariṃdama

rājasūyāśvamedhābhyāṃ phalaṃ prāpnoti mānavaḥ /
tato vināśanaṃ gacchenniyato niyatāśanaḥ

gacchaṃtyaṃtarhitā yatra merupṛṣṭhe sarasvatī /
camase ca śivodbhede nāgodbhede ca dṛśyate

snātvā tu camasodbhede agniṣṭomaphalaṃ labhet /
śivodbhede naraḥ snātvā gosahasraphalaṃ labhet

nāgodbhede naraḥ snātvā nāgalokamavāpnuyāt /
śaśayānaṃ ca rājeṃdra tīrthamāsādya durlabham

śaśarūpapraticchannā puṣkarā yatra bhārata /
sarasvatyāṃ mahābhāga anusaṃvatsaraṃhite

snāyaṃte bharataśreṣṭha vṛttā vai kārttikīṃ sadā /
tatra snātvā naravyāghra dyotate śivavatsadā

gosahasraphalaṃ caiva prāpnuyādbharatarṣabha /
kumārakoṭimāsādya niyataḥ kurunaṃdana

tatrābhiṣekaṃ kurvīta pitṛdevārcane rataḥ /
gavāmayutamāpnoti kulaṃ caiva samuddharet

tato gaccheta dharmajña rudrakoṭiṃ samāhitāḥ /
purā yatra mahārāja ṛṣikoṭiḥ samāhitā

varṣeṇa ca samāviṣṭā devadarśanakāṃkṣayā /
ahaṃpūrvamahaṃpūrvaṃ drakṣyāmi vṛṣabhadhvajam

evaṃ saṃprasthitā rājanṛṣayaḥ kilabhārata /
tato yogīśvareṇāpi yogamāsthāya bhūpate

teṣāṃ manyupraśāṃtyarthamṛṣīṇāṃ bhāvitātmanām /
sṛṣṭā tu koṭirudrāṇāmṛṣīṇāmagrataḥ sthitā

mayā pūrvaṃ haro dṛṣṭo iti te menire pṛthak /
teṣāṃ tuṣṭo mahādeva ṛṣīṇāmugratejasām

bhaktyā paramayā rājanvaraṃ teṣāṃ pradattavān /
adyaprabhṛti yuṣmākaṃ dharmavṛddhirbhaviṣyati

tatra snātvā naravyāghra rudrakoṭyāṃ naraḥ śuciḥ /
aśvamedhamavāpnoti kulaṃ caiva samuddharet

tato gaccheta rājeṃdra saṃgamaṃ lokaviśrutam /
sarasvatyāṃ mahāpuṇyamupāsīta janārdanam

yatra brahmādayo devā ṛṣayaḥ siddhacāraṇāḥ /
abhigacchaṃti rājeṃdra caitraśuklacaturdaśīm

tatra snātvā naravyāghra viṃdedbahusuvarṇakam /
sarvapāpaviśuddhātmā śivalokaṃ ca gacchati

ṛṣīṇāṃ yatra satrāṇi samāptāni narādhipa /
tatrāvasānamāsādya gosahasraphalaṃ labhet

iti śrīpādme mahāpurāṇe svargakhaṃḍe paṃcaviṃśo'dhyāyaḥ