પદ્મ પુરાણ · અધ્યાય 3.19

નારદ ઉવાચ-
ભાર્ગવેશં તતો ગચ્છેદ્ભક્ત્યા યત્ર ચ વિષ્ણુના ।
હુંકારિતાસ્તુ દેવેન દાનવાઃ પ્રલયં ગતાઃ

તત્ર સ્નાત્વા તુ રાજેંદ્ર સર્વપાપૈઃ પ્રમુચ્યતે ।
શુક્લતીર્થસ્ય ચોત્પત્તિં શૃણુ ત્વં પાંડુનંદન

હિમવચ્છિખરે રમ્યે નાનાધાતુવિચિત્રિતે ।
તરુણાદિત્યસંકાશે તપ્તકાંચનસંનિભે

વજ્રસ્ફટિકસોપાને ચિત્રપટ્ટશિલાતલે ।
જાંબૂનદમયે દિવ્યે નાના પદ્મોપશોભિતે

તત્રાસીનં મહાદેવં સર્વજ્ઞં પ્રભુમવ્યયમ્ ।
લોકાનુગ્રાહકં શાંતં ગણવૃંદૈઃ સમાવૃતમ્

સ્કંદનંદિમહાકાલૈર્વીરભદ્ર ગણાદિભિઃ ।
ઉમયા સહિતં દેવં માર્કંડઃ પરિપૃચ્છતિ

દેવદેવ મહાદેવ ઇન્દ્ર કામાદિ સંસ્તુત ।
સંસારભવભીતોહં સુખોપાયં બ્રવીહિ મે

ભગવન્ભૂતભવ્યેશ સર્વપાપપ્રણાશનમ્ ।
તીર્થાનાં પરમં તીર્થં તદ્વદસ્વ મહેશ્વર

ઈશ્વર ઉવાચ-
શૃણુવિપ્ર મહાભાગ સર્વશાસ્ત્રવિશારદ ।
સ્નાનાદિ કુરુ ગચ્છ ત્વં ઋષિસંઘૈસ્સમાવૃતઃ

મન્વત્રિ યાજ્ઞવલ્ક્યાશ્ચ કાશ્યપશ્ચૈવ અંગિરાઃ ।
યમાપસ્તંબ સંવર્તાઃ કાત્યાયનબૃહસ્પતી

નારદો ગૌતમશ્ચૈવ પૃચ્છંતિ ધર્મકાંક્ષિણઃ ।
ગંગાકનખલે પુણ્યા પ્રયાગં પુષ્કરં ગયા

કુરુક્ષેત્રં તુ પુણ્યં ચ રાહુગ્રસ્તે દિવાકરે ।
દિવા વા યદિ વા રાત્રૌ શુક્લતીર્થં મહાફલમ્

દર્શનાત્સ્પર્શનાચ્ચૈવ સ્નાનાદ્ધ્યાનાત્તપોર્જનાત્ ।
હોમાચ્ચૈવોપવાસાચ્ચ શુક્લતીર્થફલં મહત્

શુક્લતીર્થં મહાપુણ્યં નદ્યાં તુ સંવ્યવસ્થિતમ્ ।
ચાણિક્યોનામ રાજર્ષિઃ સિદ્ધિં તત્ર સમાગતઃ

એતત્ક્ષેત્રં સમુત્પન્નં યોજનાવૃત્તિસંસ્થિતમ્ ।
શુક્લતીર્થં મહાપુણ્યં સર્વપાપપ્રણાશનમ્

પાદપાગ્રેણ દૃષ્ટેન બ્રહ્મહત્યાં વ્યપોહતિ ।
અહમત્ર ઋષિશ્રેષ્ઠ તિષ્ઠામિ હ્યુમયા સહ

વૈશાખે વિમલે માસિ કૃષ્ણપક્ષે ચતુર્દશી ।
કૈલાસાચ્ચાપિ નિર્ગત્ય તત્ર સંનિહિતો હ્યહમ્

દેવકિન્નરગંધર્વાઃ સિદ્ધવિદ્યાધરાસ્તથા ।
ગણાશ્ચાપ્સરસો નાગાઃ સર્વે દેવાઃ સમાગતાઃ

ગગનસ્થાસ્તુ તિષ્ઠંતિ વિમાનૈઃ સર્વકામકૈઃ ।
શુક્લતીર્થે તુ રાજેંદ્ર આગતા ધર્મકાંક્ષિણઃ

રજકેન યથા વસ્ત્રં શુક્લં ભવતિ વારિણા ।
આજન્મસંચિતં પાપં શુક્લતીર્થે વ્યપોહતિ

સ્નાનં દાનં મહાપુણ્યં માર્કંડ ઋષિસત્તમ ।
શુક્લતીર્થાત્પરં તીર્થં ન ભૂતં ન ભવિષ્યતિ

પૂર્વે વયસિ કર્માણિ કૃત્વા પાપાનિ માનવઃ ।
અહોરાત્રોપવાસેન શુક્લતીર્થે વ્યપોહતિ

તપસા બ્રહ્મચર્યેણ યજ્ઞૈર્દાનેન વા પુનઃ ।
દેવદાનેન યા પુષ્ટિર્ન સા ક્રતુશતૈરપિ

કાર્તિકસ્ય ચ માસસ્ય કૃષ્ણપક્ષે ચતુર્દશી ।
ઘૃતેન સ્નાપયેદ્દેવમુપોષ્ય પરમેશ્વરમ્

એકવિંશત્કુલોપેતો ન ચ્યવેચ્ચૈશ્વરાત્પદાત્ ।
શુક્લતીર્થં પરં તીર્થમૃષિસિદ્ધનિષેવિતમ્

તત્ર સ્નાત્વા તતો રાજન્પુનર્જન્મ ન વિદ્યતે ।
સ્નાત્વા વૈ શુક્લતીર્થેપિ અર્ચયેદ્વૃષભધ્વજમ્

જાગરં કારયેત્તત્ર નૃત્યગીતાદિમંગલૈઃ ।
પ્રભાતે શુક્લતીર્થે તુ સ્નાનં વૈ દેવતાર્ચનમ્

આચાર્યં ભોજયેત્પશ્ચાચ્છિવવ્રતપરઃ શુચિઃ ।
ભોજનં ચ યથાશક્ત્યા વિત્તશાઠ્યં ન કારયેત્

પ્રદક્ષિણં તતઃ કૃત્વા શનૈર્દેવાંતિકં વ્રજેત્ ।
એવં વૈ કુરુતે યસ્તુ તસ્ય પુણ્યફલં શૃણુ

દિવ્યયાનસમારૂઢસ્તૂયમાનોઽપ્સરોગણૈઃ ।
શિવતુલ્યબલોપેતસ્તિષ્ઠત્યાભૂતસંપ્લવમ્

શુક્લતીર્થે તુ યા નારી દદાતિ કનકં શુભમ્ ।
ઘૃતેન સ્નાપયેદ્દેવં કુમારં ચાભિપૂજયેત્

એવં યા કુરુતે ભક્ત્યા તસ્યાઃ પુણ્યફલં શૃણુ ।
મોદતે દેવલોકસ્થા યાવદિંદ્રાશ્ચતુર્દશ

અયને વા ચતુર્દશ્યાં સંક્રાંતૌ વિષુવે તથા ।
સ્નાત્વા તુ સોપવાસઃ સ નિર્જિતાત્મા સમાહિતઃ

દાનં દદ્યાદ્યથાશક્ત્યા પ્રીયેતાં હરિશંકરૌ ।
શુક્લતીર્થપ્રભાવેણ સર્વં ભવતિ ચાક્ષયમ્

અનાથં દુર્ગતં વિપ્રં નાથવંતમથાપિ વા ।
ઉદ્વાહયતિ યસ્તીર્થે તસ્ય પુણ્યફલં શૃણુ

યાવત્તદ્રોમસંખ્યા તુ તત્પ્રસૂતિકુલેષુ ચ ।
તાવદ્વર્ષસહસ્રાણિ શિવલોકે મહીયતે

ઇતિ શ્રીપાદ્મે મહાપુરાણે સ્વર્ગખંડે ઊનવિંશોધ્યાયઃ