પદ્મ પુરાણ · અધ્યાય 3.14

નારદ ઉવાચ-
નર્મદા તુ નદીશ્રેષ્ઠા પુણ્યા પુણ્યતમા ત્રિષુ ।
મુનિભિસ્તુ મહાભાગૈર્વિભક્તા ધર્મકાંક્ષિભિઃ

યજ્ઞોપવીતમાત્રાણિ પ્રવિભક્તાનિ પાંડવ ।
તેષુ સ્નાત્વા તુ રાજેંદ્ર સર્વપાપૈઃ પ્રમુચ્યતે

જલેશ્વરં ચ યત્તીર્થં ત્રિષુ લોકેષુ વિશ્રુતમ્ ।
તસ્યોત્પત્તિં કથયતઃ શૃણુ પાંડવનંદન

પુરા મુનિગણાઃ સર્વે સેન્દ્રાશ્ચૈવ મરુદ્ગણાઃ ।
સ્તુવંતિ તે મહાત્માનં દેવદેવં મહેશ્વરમ્

સ્તુવમાનાસ્તુ સંપ્રાપ્તા યત્ર દેવો મહેશ્વરઃ ।
વિજ્ઞાપયંતિ દેવેશં સેંદ્રાશ્ચૈવ મરુદ્ગણાઃ ।
ભયોદ્વિગ્નાન્વિરૂપાક્ષ પરિત્રાયસ્વ નઃ પ્રભો

ઈશ્વર ઉવાચ-।
સ્વાગતં તુ મુનિશ્રેષ્ઠાઃ કિમર્થમિહ ચાગતાઃ ।
કિં દુઃખં કોઽનુસંતાપઃ કુતો વા ભયમાગતમ્

કથયધ્વં મહાભાગા એતદિચ્છામિ વેદિતુમ્ ।
એવમુક્તાસ્તુ રુદ્રેણાકથયન્નમિતવ્રતાઃ

ઋષય ઊચુઃ-।
અપિ ઘોરો મહાવીર્યો દાનવો બલદર્પિતઃ ।
બાણો નામેતિ વિખ્યાતો યસ્ય વૈ ત્રિપુરં પુરમ્

ગગને તુ વસદ્દિવ્યં ભ્રમતે તસ્ય તેજસા ।
તસ્માદ્ભીતા વિરૂપાક્ષ ત્વામેવ શરણં ગતાઃ

ત્રાયસ્વ મહતો દુઃખાદ્દેવત્વં હિ પરા ગતિઃ ।
એવં પ્રસાદં દેવેશ સર્વેષાં કર્તુમર્હસિ

યેન દેવાઃ સુપ્રસન્નાઃ સુખમેધંતિ શંકર ।
પરાં નિર્વૃતિમાયાંતિ તત્પ્રભો કર્તુમર્હસિ

દેવ ઉવાચ-।
એતત્સર્વં કરિષ્યામિ મા વિષાદં કરિષ્યથ ।
અચિરેણૈવ કાલેન કુર્યાં યુષ્મત્સુખાવહમ્

આશ્વાસયિત્વા તાન્સર્વાન્નર્મદાતટમાસ્થિતઃ ।
ચિંતયામાસ સર્વેશસ્તદ્વધં પ્રતિ પાંડવ

કથં કેન પ્રકારેણ હંતવ્યસ્ત્રિપુરો મયા ।
એવં સંચિંત્ય ભગવાન્નારદં સ્મરતે તદા ।
સ્મરણાદેવ સંપ્રાપ્તો નારદઃ સમુપસ્થિતઃ

નારદ ઉવાચ-।
આજ્ઞાપય મહાદેવ કિમર્થં સંસ્મૃતો હ્યહમ્ ।
કિં કાર્યં તુ મયા દેવ કર્તવ્યં કથયસ્વ મે

ઈશ્વર ઉવાચ-।
ગચ્છ નારદ તત્રૈવ યત્ર તત્ત્રિપુરં પુરમ્ ।
બાણસ્ય દાનવેન્દ્રસ્ય શીઘ્રં ગચ્છાથ તત્કુરુ

ભર્તારો દેવતાભાશ્ચ સ્ત્રિયશ્ચાપ્સરસોપમાઃ ।
તાસાં વૈ તેજસા વિપ્ર ભ્રમતે ત્રિપુરં દિવિ

તત્ર ગત્વા તુ વિપ્રેંદ્ર મંત્રમન્યં પ્રચોદય ।
દેવસ્ય વચનં શ્રુત્વા મુનિસ્ત્વરિતવિક્રમઃ

સ્ત્રીણાં હૃદયનાશાય પ્રવિષ્ટસ્તં પુરં પ્રતિ ।
શોભતે તત્પુરં દિવ્યં નાનારત્નોપશોભિતમ્

શતયોજનવિસ્તીર્ણં તતો દ્વિગુણમાયતમ્ ।
તતઃ પશ્યતિ તત્રૈવ બાણં તુ બલદર્પિતમ્

માલાકુંડલકેયૂરૈર્મુકુટેન વિરાજિતમ્ ।
હારરત્નૈશ્ચ સંછન્નં ચંદ્રકાંતિવિભૂષિતમ્

લલનાસ્તસ્ય રત્નાઢ્યાઃ નરાઃ કનકમંડિતાઃ ।
ઉત્થિતો નારદં દૃષ્ટ્વા દાનવેંદ્રો મહાબલઃ

બાણ ઉવાચ-।
સ દેવર્ષિઃ સ્વયં પ્રાપ્તો મદ્ગૃહં પ્રતિ સંપ્રતિ ।
અર્ઘં પાદ્યં યથાન્યાયં ક્રિયતાં દ્વિજસત્તમ

ચિરાત્સમાગતો વિપ્ર સ્થીયતામિદમાસનમ્ ।
એવં સંભાવયિત્વા તુ નારદં સમુપસ્થિતમ્

તસ્ય ભાર્યા મહાદેવી અનૌપમ્યા તુ નામતઃ

અનૌપમ્યોવાચ-।
ભગવન્માનુષે લોકે દેવાસ્તુષ્યંતિ કેન વૈ ।
વ્રતેન નિયમેનાપિ દાનેન તપસાથવા

નારદ ઉવાચ-।
તિલધેનું ચ યો દદ્યાદ્બ્રાહ્મણે વેદપારગે ।
સસાગરા નવદ્વીપા દત્તા ભવતિ મેદિની

સૂર્યકોટિપ્રતીકાશૈર્વિમાનૈઃ સર્વકામિકૈઃ ।
મોદતે ચાક્ષયં કાલં સુચિરં કૃતશાસનઃ

આમ્રાતકકપિત્થાનિ કદલીવનમેવ ચ ।
કદંબ ચંપકાશોકા અનેક વિવિધદ્રુમાઃ

અષ્ટમી ચ ચતુર્થી ચ દ્વાદશી ચ તથા ઉભે ।
સંક્રાંતિર્વિષુવં ચૈવ દિનચ્છિદ્રમુખં તથા

પુણ્યાન્યેતાનિ સર્વાણિ ઉપવાસંતિ યાઃ સ્ત્રિયઃ ।
તાસાં તુ ધર્મ્મયુક્તાનાં સ્વર્ગે વાસો ન સંશયઃ

કલિકાલાત્તુ નિર્મુક્તાઃ સર્વપાપવિવર્જિતાઃ ।
ઉપવાસરતા નાર્યો નોપસર્પંતિ તાપસાઃ

એવં શ્રુત્વા તુ સુશ્રોણિ યથેષ્ટં કર્તુમર્હસિ ।
નારદસ્ય વચઃ શ્રુત્વા રાજ્ઞી વચનમબ્રવીત્

પ્રસાદં કુરુ વિપ્રેંદ્ર દાનં ગૃહ્ણ યથેપ્સિતમ્ ।
સુવર્ણમણિરત્નાનિ વસ્ત્રાણ્યાભરણાનિ ચ

તત્તે દાસ્યામ્યહં વિપ્ર યચ્ચાન્યદપિ દુર્લ્લભમ્ ।
પ્રતિગૃહ્ણ દ્વિજશ્રેષ્ઠ પ્રીયેતાં હરિશંકરૌ

નારદ ઉવાચ-।
અન્યસ્મૈ દીયતાં ભદ્રે ક્ષીણવૃતિશ્ચ યો દ્વિજઃ ।
વયં તુ શીલસંપન્ના ભક્તિસ્તુ ક્રિયતે મયા

એવં તાસાં મનો હૃત્વા સર્વાસામુપદિશ્ય વા ।
જગામ ભરતશ્રેષ્ઠ સ્વકીયં સ્થાનકં પુનઃ

અત્રાકૃષ્ટમનાસ્તાસ્તુ અન્યત્રગતમાનસાઃ ।
પુરિ છિદ્રં સમુત્પન્નં બાણસ્ય તુ મહાત્મનઃ

ઇતિ શ્રીપાદ્મે મહાપુરાણે સ્વર્ગખંડે ચતુર્દશોઽધ્યાયઃ