પદ્મ પુરાણ · અધ્યાય 2.95

સુબાહુરુવાચ-
સ્વર્ગસ્ય મે ગુણાન્બ્રૂહિ સાંપ્રતં દ્વિજસત્તમ ।
એતત્સર્વં દ્વિજશ્રેષ્ઠ કરિષ્યામિ સ્વભાવિકમ્

જૈમિનિરુવાચ-
નંદનાદીનિ રમ્યાણિ દિવ્યાનિ વિવિધાનિ ચ ।
તત્રોદ્યાનાનિ પુણ્યાનિ સર્વકામયુતાનિ ચ

સર્વકામફલૈર્વૃક્ષૈઃ શોભનાનિ સમંતતઃ ।
વિમાનાનિ સુદિવ્યાનિ સેવિતાન્યપ્સરોગણૈઃ

સર્વત્રૈવ વિચિત્રાણિ કામગાનિ વશાનિ ચ ।
તરુણાદિત્યવર્ણાનિ મુક્તાજાલાંતરાણિ ચ

ચંદ્રમંડલશુભ્રાણિ હેમશય્યાસનાનિ ચ ।
સર્વકામસમૃદ્ધાશ્ચ સર્વદુઃખવિવર્જિતાઃ

નરાઃ સુકૃતિનસ્તેષુ વિચરંતિ યથા ભુવિ ।
ન તત્ર નાસ્તિકા યાંતિ ન સ્તેના નાજિતેંદ્રિયાઃ

ન નૃશંસા ન પિશુના ન કૃતઘ્ના ન માનિનઃ ।
સત્યાસ્તપઃસ્થિતાઃ શૂરા દયાવંતઃ ક્ષમાપરાઃ

યજ્વાનો દાનશીલાશ્ચ તત્ર ગચ્છંતિ તે નરાઃ ।
ન રોગો ન જરામૃત્યુર્ન શોકો ન હિમાતપૌ

ન તત્ર ક્ષુત્પિપાસા ચ કસ્ય ગ્લાનિર્ન વિદ્યતે ।
એતે ચાન્યે ચ બહવો ગુણાઃ સ્વર્ગસ્ય ભૂપતે

દોષાસ્તત્રૈવ યે સંતિ તાઞ્છૃણુષ્વ ચ સાંપ્રતમ્ ।
શુભસ્ય કર્મણઃ કૃત્સ્નં ફલં તત્રૈવ ભુજ્યતે

ન ચાત્ર ક્રિયતે ભૂયઃ સોઽત્ર દોષો મહાન્સ્મૃતઃ ।
અસંતોષશ્ચ ભવતિ દૃષ્ટ્વા દીપ્તાં પરાં શ્રિયમ્

સુખવ્યાપ્તમનસ્કાનાં સહસા પતનં તથા ।
ઇહ યત્ક્રિયતે કર્મ ફલં તત્રૈવ ભુજ્યતે

કર્મભૂમિરિયં રાજન્ફલભૂમિરસૌ સ્મૃતા ।
સુબાહુરુવાચ-
મહાંતસ્તુ ઇમે દોષાસ્ત્વયા સ્વર્ગસ્ય કીર્તિતાઃ

નિર્દોષાઃ શાશ્વતા યેન્યે તાંસ્ત્વં લોકાન્વદ દ્વિજ ।
જૈમિનિરુવાચ-
આબ્રહ્મસદનાદેવ દોષાઃ સંતિ ચ વૈ નૃપ

અતએવ હિ નેચ્છંતિ સ્વર્ગપ્રાપ્તિં મનીષિણઃ ।
આબ્રહ્મસદનાદૂર્ધ્વં તદ્વિષ્ણોઃ પરમં પદમ્

શુભં સનાતનં જ્યોતિઃ પરંબ્રહ્મેતિ તદ્વિદુઃ ।
ન તત્ર મૂઢા ગચ્છંતિ પુરુષા વિષયાત્મકાઃ

દંભમોહભયદ્રોહ ક્રોધલોભૈરભિદ્રુતાઃ ।
નિર્મમા નિરહંકારા નિર્દ્વંદ્વાસ્સંયતેંદ્રિયાઃ

ધ્યાનયોગરતાશ્ચૈવ તત્ર ગચ્છંતિ સાધવઃ ।
એતત્તે સર્વમાખ્યાતં યન્માં ત્વં પરિપૃચ્છસિ

એવં સ્વર્ગગુણં શ્રુત્વા સુબાહુઃ પૃથિવીપતિઃ ।
તમુવાચ મહાત્માનં જૈમિનિં વદતાંવરમ્

સુબાહુરુવાચ-
નાહં સ્વર્ગં ગમિષ્યામિ ન ચૈવેચ્છામ્યહં મુને ।
યસ્માચ્ચ પતનં પ્રોક્તં તત્કર્મ ન કરોમ્યહમ્

દાનમેકં મહાભાગ નાહં દાસ્યેકદાધ્રુવમ્ ।
દાનાચ્ચ ફલલોભાચ્ચ તસ્માત્પતતિ વૈ નરઃ

ઇત્યેવમુક્ત્વા ધર્માત્મા સુબાહુઃ પૃથિવીપતિઃ ।
ધ્યાનયોગેન દેવેશં યજિષ્યે કમલાપ્રિયમ્

દાહપ્રલયસંવર્જં વિષ્ણુલોકં વ્રજામ્યહમ્ ।
જૈમિનિરુવાચ-
સત્યમુક્તં ત્વયા ભૂપ સર્વશ્રેયઃ સમાકુલમ્

રાજાનો ધર્મશીલાશ્ચ મહાયજ્ઞૈર્યજંતિ તે ।
સર્વદાનાનિ દીયંતે યજ્ઞેષુ નૃપનંદન

આદાવન્નં તુ યજ્ઞેષુ વસ્ત્રં તાંબૂલમેવ ચ ।
કાંચનં ભૂમિદાનં ચ ગોદાનં પ્રદદંતિ ચ

સુયજ્ઞૈર્વૈષ્ણવં લોકં તે પ્રયાંતિ નરોત્તમાઃ ।
દાનેન તૃપ્તિમાયાંતિ સંતુષ્ટાઃ સંતિ ભૂમિપાઃ

તપસ્વિનો મહાત્માનો નિત્યમેવં યજંતિ તે ।
સુભિક્ષાં યાચયિત્વા તુ સ્વસ્થાનં તુ સમાગતાઃ

ભિક્ષાર્થં તસ્ય ભાગાનિ પ્રકુર્વંતિ ચ ભૂપતે ।
બ્રાહ્મણાય વિભાગૈકં ગોગ્રાસં તુ મહામતે

સુપાર્શ્વવર્તિનાં ચૈકં પ્રયચ્છંતિ તપોધનાઃ ।
તસ્યાન્નસ્ય પ્રદાનેન ફલં ભુંજંતિ માનવાઃ

ક્ષુધાતૃષાવિહીનાસ્તે વિષ્ણુલોકં વ્રજંતિ વૈ ।
તસ્માત્ત્વમપિ રાજેંદ્ર દેહિ ન્યાયાર્જિતં ધનમ્

દાનાજ્જ્ઞાનં તતઃ પ્રાપ્ય જ્ઞાનાત્સિદ્ધિં પ્રયાસ્યતિ ।
ય ઇદં શૃણુયાન્મર્ત્યઃ પુણ્યાખ્યાનમનુત્તમમ્

તસ્ય સર્વાર્થસિદ્ધિઃ સ્યાત્પાપં સર્વં વિલીયતે ।
વિમુક્તઃ સર્વપાપેભ્યો વિષ્ણુલોકં સગચ્છતિ

ઇતિ શ્રીપદ્મપુરાણે ભૂમિખંડે વેનોપાખ્યાને ગુરુતીર્થે ચ્યવનચરિત્રે પંચનવતિતમોઽધ્યાયઃ