પદ્મ પુરાણ · અધ્યાય 2.87

કુંજલ ઉવાચ-
વ્રતભેદાન્પ્રવક્ષ્યામિ યૈર્યૈશ્ચારાધિતો હરિઃ ।
જયા ચ વિજયા ચૈવ જયંતી પાપનાશિની

ત્રિસ્પૃશા વંજુલી ચાન્યા તિલદગ્ધા તથાપરા ।
અખંડાચારકન્યા ચ મનોરથા સુપુત્રક

એકાદશ્યાસ્તુ ભેદાશ્ચ સંતિ પુત્ર અનેકધા ।
અશૂન્યશયનં ચાન્યજ્જન્માષ્ટમી મહાવ્રતમ્

એતૈર્વ્રતૈર્મહાપુણ્યૈઃ પાપં દૂરં પ્રયાતિ ચ ।
પ્રાણિનાં નાત્ર સંદેહઃ સત્યં સત્યં વદામ્યહમ્

કુંજલ ઉવાચ-
સ્તોત્રં તસ્ય પ્રવક્ષ્યામિ પાપરાશિવિનાશનમ્ ।
સુપુત્રશતનામાખ્યં નરાણાં ગતિદાયકમ્

તસ્ય દેવસ્ય કૃષ્ણસ્ય શતનામાખ્યમુત્તમમ્ ।
સંપ્રત્યેવ પ્રવક્ષ્યામિ તચ્છૃણુષ્વ સુતોત્તમ

વિષ્ણોર્નામશતસ્યાપિ ઋષિં છંદો વદામ્યહમ્ ।
દેવં ચૈવ મહાભાગ સર્વપાપવિશોધનમ્

વિષ્ણોર્નામશતસ્યાપિ ઋષિર્બ્રહ્મા પ્રકીર્તિતઃ ।
ૐકારો દેવતા પ્રોક્તશ્છંદોનુષ્ટુપ્તથૈવ ચ

સર્વકામિકસંસિદ્ધ્યૈ મોક્ષે ચ વિનિયોગકઃ ।
અસ્ય વિષ્ણોઃ શતનામસ્તોત્રસ્ય ।
બ્રહ્મા ઋષિઃ વિષ્ણુર્દેવતા અનુષ્ટુપ્છંદઃ ।
સર્વકામસમૃદ્ધ્યર્થં સર્વપાપક્ષયાર્થે વિનિયોગઃ

નમામ્યહં હૃષીકેશં કેશવં મધુસૂદનમ્ ।
સૂદનં સર્વદૈત્યાનાં નારાયણમનામયમ્

જયંતં વિજયં કૃષ્ણમનંતં વામનં તતઃ ।
વિષ્ણું વિશ્વેશ્વરં પુણ્યં વિશ્વાધારં સુરાર્ચિતમ્

અનઘં ત્વઘહંતારં નરસિંહં શ્રિયઃ પ્રિયમ્ ।
શ્રીપતિં શ્રીધરં શ્રીદં શ્રીનિવાસં મહોદયમ્

શ્રીરામં માધવં મોક્ષં ક્ષમારૂપં જનાર્દનમ્ ।
સર્વજ્ઞં સર્વવેત્તારં સર્વદં સર્વનાયકમ્

હરિં મુરારિં ગોવિંદં પદ્મનાભં પ્રજાપતિમ્ ।
આનંદં જ્ઞાનસંપન્નં જ્ઞાનદં જ્ઞાનનાયકમ્

અચ્યુતં સબલં ચંદ્રં ચક્રપાણિં પરાવરમ્ ।
યુગાધારં જગદ્યોનિં બ્રહ્મરૂપં મહેશ્વરમ્

મુકુંદં તં સુવૈકુંઠમેકરૂપં જગત્પતિમ્ ।
વાસુદેવં મહાત્માનં બ્રહ્મણ્યં બ્રાહ્મણપ્રિયમ્

ગોપ્રિયં ગોહિતં યજ્ઞંયજ્ઞાંગં યજ્ઞવર્દ્ધનમ્ ।
યજ્ઞસ્યાપિ સુભોક્તારં વેદવેદાંગપારગમ્

વેદજ્ઞં વેદરૂપં તં વિદ્યાવાસં સુરેશ્વરમ્ ।
અવ્યક્તં તં મહાહંસં શંખપાણિં પુરાતનમ્

પુરુષં પુષ્કરાક્ષં તુ વારાહં ધરણીધરમ્ ।
પ્રદ્યુમ્નં કામપાલં ચ વ્યાસં વ્યાલં મહેશ્વરમ્

સર્વસૌખ્યં મહાસૌખ્યં મોક્ષં ચ પરમેશ્વરમ્ ।
યોગરૂપં મહાજ્ઞાનં યોગિનાં ગતિદં પ્રિયમ્

મુરારિં લોકપાલં તં પદ્મહસ્તં ગદાધરમ્ ।
ગુહાવાસં સર્વવાસં પુણ્યવાસં મહાભુજમ્

વૃંદાનાથં બૃહત્કાયં પાવનં પાપનાશનમ્ ।
ગોપીનાથં ગોપસખં ગોપાલં ગોગણાશ્રયમ્

પરાત્માનં પરાધીશં કપિલં કાર્યમાનુષમ્ ।
નમામિ નિશ્ચલં નિત્યં મનોવાક્કાયકર્મભિઃ

નામ્નાં શતેનાપિ સુપુણ્યકર્તા યઃ સ્તૌતિ કૃષ્ણં મનસા સ્થિરેણ ।
સ યાતિ લોકં મધુસૂદનસ્ય વિહાય લોકાનિહ પુણ્યપૂતઃ

નામ્નાં શતં મહાપુણ્યં સર્વપાતકશોધનમ્ ।
જપેદનન્યમનસા ધ્યાયેદ્ધ્યાનસમન્વિતમ્

નિત્યમેવ નરઃ પુણ્યૈર્ગંગાસ્નાનફલં લભેત્ ।
તસ્માત્તુ સુસ્થિરો ભૂત્વા સમાહિતમના જપેત્

ત્રિકાલં ચ જપેન્મર્ત્યો નિયતો નિયમે સ્થિતઃ ।
અશ્વમેધફલં તસ્ય જાયતે નાત્ર સંશયઃ

એકાદશ્યામુપોષ્યૈવ પુરતો માધવસ્ય યઃ ।
જાગરે પ્રજપેન્મર્ત્યસ્તસ્ય પુણ્યં વદામ્યહમ્

પુંડરીકસ્ય યજ્ઞસ્ય ફલમાપ્નોતિ માનવઃ ।
તુલસીસંનિધૌ સ્થિત્વા મનસા યો જપેન્નરઃ

રાજસૂયફલં ભુંક્તે વર્ષેણાપિ ચ માનવઃ ।
શાલગ્રામશિલા યત્ર યત્ર દ્વારાવતી શિલા

ઉભયોઃ સંનિધૌ જાપ્યં કર્તવ્યં સુખમિચ્છતા ।
બહુસૌખ્યં પ્રભુક્ત્વૈવ કુલાનાં શતમેવ ચ

એકેન ચાધિકં મર્ત્ય આત્મના સહ તારયેત્ ।
કાર્તિકે સ્નાનકર્તા યઃ પૂજયેન્મધુસૂદનમ્

યઃ પઠેત્પ્રયતઃ સ્તોત્રં પ્રયાતિ પરમાં ગતિમ્ ।
માઘસ્નાયી હરિં પૂજ્ય ભક્ત્યા ચ મધુસૂદનમ્

ધ્યાયેચ્ચૈવ હૃષીકેશં જપેદ્વાથ શૃણોતિ વા ।
સુરાપાનાદિકં પાપં વિહાય પરમં પદમ્

વિના વિઘ્નં નરઃ પુત્ર સંપ્રયાતિ જનાર્દનમ્ ।
શ્રાદ્ધકાલે હિ યો મર્ત્યો વિપ્રાણાં ભુંજતાં પુરઃ

યો જપેચ્ચ શતં નામ્નાં સ્તોત્રં પાતકનાશનમ્ ।
પિતરસ્તુષ્ટિમાયાંતિ તૃપ્તા યાંતિ પરાં ગતિં

બ્રાહ્મણો વેદવિદ્વાન્સ્યાત્ક્ષત્રિયો વિંદતે મહીમ્ ।
ધનઋદ્ધિં પ્રભુંજીત વૈશ્યો જપતિ યઃ સદા

શૂદ્રઃ સુઃખં પ્રભુંક્તે ચ બ્રાહ્મણત્વં ચ ગચ્છતિ ।
પ્રાપ્ય જન્માંતરં વત્સ વેદવિદ્યાં પ્રવિંદતિ

સુખદં મોક્ષદં સ્તોત્રં જપ્તવ્યં ચ ન સંશયઃ ।
કેશવસ્ય પ્રસાદેન સર્વસિદ્ધો ભવેન્નરઃ

ઇતિ શ્રીપદ્મપુરાણે ભૂમિખંડે વેનોપાખ્યાને ગુરુતીર્થવર્ણને ચ્યવનચરિત્રે સપ્તાશીતિતમોઽધ્યાયઃ