પદ્મ પુરાણ · અધ્યાય 2.82

સુકર્મોવાચ-
એવં ચિંતયતે યાવદ્રાજા પરમધાર્મિકઃ ।
તાવત્પ્રોવાચ સા દેવી રતિપુત્રી વરાનના

કિમુ ચિંતયસે રાજંસ્ત્વમિહૈવ મહામતે ।
પ્રાયેણાપિ સ્ત્રિયઃ સર્વાશ્ચપલાઃ સ્યુર્ન સંશયઃ

નાહં ચાપલ્યભાવેન ત્વામેવં પ્રવિચાલયે ।
નાહં હિ કારયામ્યદ્ય ભવત્પાર્શ્વં નૃપોત્તમ

અન્યસ્ત્રિયો યથા લોકે ચપલત્વાદ્વદંતિ ચ ।
અકાર્યં રાજરાજેંદ્ર લોભાન્મોહાચ્ચ લંપટાઃ

લોકાનાં દર્શનાયૈવ જાતા શ્રદ્ધા મમોરસિ ।
દેવાનાં દર્શનં પુણ્યં દુર્લભં હિ સુમાનુષૈઃ

તેષાં ચ દર્શનં રાજન્કારયામિ વદસ્વ મે ।
દોષં પાપકરં યત્તુ મત્સંગાદિહ ચેદ્ભવેત્

એવં ચિંતયસે દુઃખં યથાન્યઃ પ્રાકૃતો જનઃ ।
મહાભયાદ્યથાભીતો મોહગર્તે ગતો યથા

ત્યજ ચિંતાં મહારાજ ન ગંતવ્યં ત્વયા દિવિ ।
યેન તે જાયતે દુઃખં તન્ન કાર્યં મયા કદા

એવમુક્તસ્તથા રાજા તામુવાચ વરાનનામ્ ।
ચિંતિતં યન્મયા દેવિ તચ્છૃણુષ્વ હિ સાંપ્રતમ્

માનભંગો મયા દૃષ્ટો નૈવ સ્વસ્ય મનઃપ્રિયે ।
મયિ સ્વર્ગં ગતે કાંતે પ્રજા દીના ભવિષ્યતિ

ત્રાસયિષ્યતિ દુષ્ટાત્મા યમસ્તુ વ્યાધિભિઃ પ્રજાઃ ।
ત્વયા સાર્ધં પ્રયાસ્યામિ સ્વર્ગલોકં વરાનને

એવમાભાષ્ય તાં રાજા સમાહૂય સુતોત્તમમ્ ।
પૂરું તં સર્વધર્મજ્ઞં જરાયુક્તં મહામતિમ્

એહ્યેહિ સર્વધર્મજ્ઞ ધર્મં જાનાસિ નિશ્ચિતમ્ ।
મમાજ્ઞયા હિ ધર્માત્મન્ધર્મઃ સંપાલિતસ્ત્વયા

જરા મે દીયતાં તાત તારુણ્યં ગૃહ્યતાં પુનઃ ।
રાજ્યં કુરુ મમેદં ત્વં સકોશબલવાહનમ્

આસમુદ્રાં પ્રભુંક્ષ્વ ત્વં રત્નપૂર્ણાં વસુંધરામ્ ।
મયા દત્તાં મહાભાગ સગ્રામવનપત્તનામ્

પ્રજાનાં પાલનં પુણ્યં કર્તવ્યં ચ સદાનઘ ।
દુષ્ટાનાં શાસનં નિત્યં સાધૂનાં પરિપાલનમ્

કર્તવ્યં ચ ત્વયા વત્સ ધર્મશાસ્ત્રપ્રમાણતઃ ।
બ્રાહ્મણાનાં મહાભાગ વિધિનાપિ સ્વકર્મણા

ભક્ત્યા ચ પાલનં કાર્યં યસ્માત્પૂજ્યા જગત્ત્રયે ।
પંચમે સપ્તમે ઘસ્રે કોશં પશ્ય વિપશ્ચિતઃ

બલં ચ નિત્યં સંપૂજ્યં પ્રસાદધનભોજનૈઃ ।
ચારચક્ષુર્ભવસ્વ ત્વં નિત્યં દાનપરો ભવ

ભવ સ્વનિયતો મંત્રે સદા ગોપ્યઃ સુપંડિતૈઃ ।
નિયતાત્મા ભવ સ્વત્વં મા ગચ્છ મૃગયાં સુત

વિશ્વાસઃ કસ્ય નો કાર્યઃ સ્ત્રીષુ કોશે મહાબલે ।
પાત્રાણાં ત્વં તુ સર્વેષાં કલાનાં કુરુ સંગ્રહમ્

યજ યજ્ઞૈર્હૃષીકેશં પુણ્યાત્મા ભવ સર્વદા ।
પ્રજાનાં કંટકાન્સર્વાન્મર્દયસ્વ દિને દિને

પ્રજાનાં વાંછિતં સર્વમર્પયસ્વ દિને દિને ।
પ્રજાસૌખ્યં પ્રકર્તવ્યં પ્રજાઃ પોષય પુત્રક

સ્વકો વંશઃ પ્રકર્તવ્યઃ પરદારેષુ મા કૃથાઃ ।
મતિં દુષ્ટાં પરસ્વેષુ પૂર્વાનન્વેહિ સર્વદા

વેદાનાં હિ સદા ચિંતા શાસ્ત્રાણાં હિ ચ સર્વદા ।
કુરુષ્વૈવં સદા વત્સ શસ્ત્રાભ્યાસરતો ભવ

સંતુષ્ટઃ સર્વદા વત્સ સ્વશય્યા નિરતો ભવ ।
ગજસ્ય વાજિનોભ્યાસં સ્યંદનસ્ય ચ સર્વદા

એવમાદિશ્ય તં પુત્રમાશીર્ભિરભિનંદ્ય ચ ।
સ્વહસ્તેન ચ સંસ્થાપ્ય કરે દત્તં સ્વમાયુધમ્

સ્વાં જરાં તુ સમાગૃહ્ય દત્ત્વા તારુણ્યમસ્ય ચ ।
ગંતુકામસ્તતઃ સ્વર્ગં યયાતિઃ પૃથિવીપતિઃ

ઇતિ શ્રીપદ્મપુરાણે ભૂમિખંડે વેનોપાખ્યાને માતાપિતૃતીર્થવર્ણને યયાતિચરિત્રે દ્વ્યશીતિતમોઽધ્યાયઃ