પદ્મ પુરાણ · અધ્યાય 2.75

સુકર્મોવાચ-
વિષ્ણું કૃષ્ણં હરિં રામં મુકુંદં મધુસૂદનમ્ ।
નારાયણં વિષ્ણુરૂપં નારસિંહં તમચ્યુતમ્

કેશવં પદ્મનાભં ચ વાસુદેવં ચ વામનમ્ ।
વારાહં કમઠં મત્સ્યં હૃષીકેશં સુરાધિપમ્

વિશ્વેશં વિશ્વરૂપં ચ અનંતમનઘં શુચિમ્ ।
પુરુષં પુષ્કરાક્ષં ચ શ્રીધરં શ્રીપતિં હરિમ્

શ્રીનિવાસં પીતવાસં માધવં મોક્ષદં પ્રભુમ્ ।
ઇત્યેવં હિ સમુચ્ચારં નામભિર્માનવાઃ સદા

પ્રકુર્વંતિ નરાઃ સર્વે બાલવૃદ્ધાઃ કુમારિકાઃ ।
સ્ત્રિયો હરિં સુગાયંતિ ગૃહકર્મરતાઃ સદા

આસને શયને યાને ધ્યાને વચસિ માધવમ્ ।
ક્રીડમાનાસ્તથા બાલા ગોવિંદં પ્રણમંતિ તે

દિવારાત્રૌ સુમધુરં બ્રુવંતિ હરિનામ ચ ।
વિષ્ણૂચ્ચારો હિ સર્વત્ર શ્રૂયતે દ્વિજસત્તમ

વૈષ્ણવેન પ્રભાવેણ મર્ત્યા વર્તંતિ ભૂતલે ।
પ્રાસાદકલશાગ્રેષુ દેવતાયતનેષુ ચ

યથા સૂર્યસ્ય બિંબાનિ તથા ચક્રાણિ ભાંતિ ચ ।
વૈકુંઠે દૃશ્યતે ભાવસ્તદ્ભાવં જગતીતલે

તેન રાજ્ઞા કૃતં વિપ્ર પુણ્યં ચાપિ મહાત્મના ।
વિષ્ણુલોકસ્ય સમતાં તથાનીતં મહીતલમ્

નહુષસ્યાપિ પુત્રેણ વૈષ્ણવેન યયાતિના ।
ઉભયોર્લોકયોર્ભાવમેકીભૂતં મહીતલમ્

ભૂતલસ્યાપિ વિષ્ણોશ્ચ અંતરં નૈવ દૃશ્યતે ।
વિષ્ણૂચ્ચારં તુ વૈકુંઠે યથા કુર્વંતિ વૈષ્ણવાઃ

ભૂતલે તાદૃશોચ્ચારં પ્રકુર્વંતિ ચ માનવાઃ ।
ઉભયોર્લોકયોર્વિપ્ર એકભાવઃ પ્રદૃશ્યતે

જરારોગભયં નાસ્તિ મૃત્યુહીના નરા બભુઃ ।
દાનભોગપ્રભાવશ્ચ અધિકો દૃશ્યતે ભુવિ

પુત્રાણાં તુ સુખં પુણ્યમધિકં પૌત્રજં નરાઃ ।
પ્રભુંજંતિ સુખેનાપિ માનવા ભુવિ સત્તમ

વિષ્ણોઃ પ્રસાદદાનેન ઉપદેશેન તસ્ય ચ ।
સર્વવ્યાધિવિનિર્મુક્તા માનવા વૈષ્ણવાઃ સદા

સ્વર્ગલોકપ્રભાવો હિ કૃતો રાજ્ઞા મહીતલે ।
પંચવિંશપ્રમાણેન વર્ષાણિ નૃપસત્તમ

ગદૈર્હીના નરાઃ સર્વે જ્ઞાનધ્યાનપરાયણાઃ ।
યજ્ઞદાનપરાઃ સર્વે દયાભાવાશ્ચ માનવાઃ

ઉપકારરતાઃ પુણ્યા ધન્યાસ્તે કીર્તિભાજનાઃ ।
સર્વે ધર્મપરા વિપ્ર વિષ્ણુધ્યાનપરાયણાઃ

રાજ્ઞા તેનોપદિષ્ટાસ્તે સંજાતા વૈષ્ણવા ભુવિ ।
વિષ્ણુરુવાચ-
શ્રૂયતાં નૃપશાર્દૂલ ચરિત્રં તસ્ય ભૂપતેઃ

સર્વધર્મપરો નિત્યં વિષ્ણુભક્તશ્ચ નાહુષિઃ ।
અબ્દાનાં તત્ર લક્ષં હિ તસ્યાપ્યેવં ગતં ભુવિ

નૂતનો દૃશ્યતે કાયઃ પંચવિંશાબ્દિકો યથા ।
પંચવિંશાબ્દિકો ભાતિ રૂપેણ વયસા તદા

પ્રબલઃ પ્રૌઢિસંપન્નઃ પ્રસાદાત્તસ્ય ચક્રિણઃ ।
માનુષા ભુવમાસ્થાય યમં નૈવ પ્રયાંતિ તે

રાગદ્વેષવિનિર્મુક્તાઃ ક્લેશપાશવિવર્જિતાઃ ।
સુખિનો દાનપુણ્યૈશ્ચ સર્વધર્મપરાયણાઃ

વિસ્તારં તેજનાઃ સર્વે સંતત્યાપિ ગતા નૃપ ।
યથા દૂર્વાવટાશ્ચૈવ વિસ્તારં યાંતિ ભૂતલે

યથા તે માનવાઃ સર્વે પુત્રપૌત્રૈઃ પ્રવિસ્તૃતાઃ ।
મૃત્યુદોષવિહીનાસ્તે ચિરં જીવંતિ વૈ જનાઃ

સ્થિરકાયાશ્ચ સુખિનો જરારોગવિવર્જિતાઃ ।
પંચવિંશાબ્દિકાઃ સર્વે નરા દૃશ્યંતિ ભૂતલે

સત્યાચારપરાઃ સર્વે વિષ્ણુધ્યાનપરાયણાઃ ।
એવં સર્વે ચ મર્ત્યાસ્તે પ્રસાદાત્તસ્ય ચક્રિણઃ

સંજાતા માનવાઃ સર્વે દાનભોગપરાયણાઃ ।
મૃતો ન શ્રૂયતે લોકે મર્ત્યઃ કોપિ નરોત્તમ

શોકં નૈવ પ્રપશ્યંતિ દોષં નૈવ પ્રયાંતિ તે ।
યદ્રૂપં સ્વર્ગલોકસ્ય તદ્રૂપં ભૂતલસ્ય ચ

સંજાતં માનવશ્રેષ્ઠ પ્રસાદાત્તસ્ય ચક્રિણઃ ।
વિભ્રષ્ટા યમદૂતાસ્તે વિષ્ણુદૂતૈશ્ચ તાડિતાઃ

રુદમાના ગતાઃ સર્વે ધર્મરાજં પરસ્પરમ્ ।
તત્સર્વં કથિતં દૂતૈશ્ચેષ્ટિતં ભૂપતેસ્તુ તૈઃ

અમૃત્યુભૂતલં જાતં દાનભોગેન ભાસ્કરે ।
નહુષસ્યાત્મજેનાપિ કૃતં દેવયયાતિના

વિષ્ણુભક્તેન પુણ્યેન સ્વર્ગરૂપં પ્રદર્શિતમ્ ।
એવમાકર્ણિતં સર્વં ધર્મરાજેન વૈ તદા

ધર્મરાજસ્તદા તત્ર દૂતેભ્યઃ શ્રુતવિસ્તરઃ ।
ચિંતયામાસ સર્વાર્થં શ્રુત્વૈવંનૃપચેષ્ટિતમ્

ઇતિ શ્રીપદ્મપુરાણે ભૂમિખંડે વેનોપાખ્યાને માતાપિતૃતીર્થવર્ણને યયાતિચરિત્રે પંચસપ્તતિતમોઽધ્યાયઃ