Padma Purana · Chapter 2.75

sukarmovāca-
viṣṇuṃ kṛṣṇaṃ hariṃ rāmaṃ mukuṃdaṃ madhusūdanam /
nārāyaṇaṃ viṣṇurūpaṃ nārasiṃhaṃ tamacyutam

keśavaṃ padmanābhaṃ ca vāsudevaṃ ca vāmanam /
vārāhaṃ kamaṭhaṃ matsyaṃ hṛṣīkeśaṃ surādhipam

viśveśaṃ viśvarūpaṃ ca anaṃtamanaghaṃ śucim /
puruṣaṃ puṣkarākṣaṃ ca śrīdharaṃ śrīpatiṃ harim

śrīnivāsaṃ pītavāsaṃ mādhavaṃ mokṣadaṃ prabhum /
ityevaṃ hi samuccāraṃ nāmabhirmānavāḥ sadā

prakurvaṃti narāḥ sarve bālavṛddhāḥ kumārikāḥ /
striyo hariṃ sugāyaṃti gṛhakarmaratāḥ sadā

āsane śayane yāne dhyāne vacasi mādhavam /
krīḍamānāstathā bālā goviṃdaṃ praṇamaṃti te

divārātrau sumadhuraṃ bruvaṃti harināma ca /
viṣṇūccāro hi sarvatra śrūyate dvijasattama

vaiṣṇavena prabhāveṇa martyā vartaṃti bhūtale /
prāsādakalaśāgreṣu devatāyataneṣu ca

yathā sūryasya biṃbāni tathā cakrāṇi bhāṃti ca /
vaikuṃṭhe dṛśyate bhāvastadbhāvaṃ jagatītale

tena rājñā kṛtaṃ vipra puṇyaṃ cāpi mahātmanā /
viṣṇulokasya samatāṃ tathānītaṃ mahītalam

nahuṣasyāpi putreṇa vaiṣṇavena yayātinā /
ubhayorlokayorbhāvamekībhūtaṃ mahītalam

bhūtalasyāpi viṣṇośca aṃtaraṃ naiva dṛśyate /
viṣṇūccāraṃ tu vaikuṃṭhe yathā kurvaṃti vaiṣṇavāḥ

bhūtale tādṛśoccāraṃ prakurvaṃti ca mānavāḥ /
ubhayorlokayorvipra ekabhāvaḥ pradṛśyate

jarārogabhayaṃ nāsti mṛtyuhīnā narā babhuḥ /
dānabhogaprabhāvaśca adhiko dṛśyate bhuvi

putrāṇāṃ tu sukhaṃ puṇyamadhikaṃ pautrajaṃ narāḥ /
prabhuṃjaṃti sukhenāpi mānavā bhuvi sattama

viṣṇoḥ prasādadānena upadeśena tasya ca /
sarvavyādhivinirmuktā mānavā vaiṣṇavāḥ sadā

svargalokaprabhāvo hi kṛto rājñā mahītale /
paṃcaviṃśapramāṇena varṣāṇi nṛpasattama

gadairhīnā narāḥ sarve jñānadhyānaparāyaṇāḥ /
yajñadānaparāḥ sarve dayābhāvāśca mānavāḥ

upakāraratāḥ puṇyā dhanyāste kīrtibhājanāḥ /
sarve dharmaparā vipra viṣṇudhyānaparāyaṇāḥ

rājñā tenopadiṣṭāste saṃjātā vaiṣṇavā bhuvi /
viṣṇuruvāca-
śrūyatāṃ nṛpaśārdūla caritraṃ tasya bhūpateḥ

sarvadharmaparo nityaṃ viṣṇubhaktaśca nāhuṣiḥ /
abdānāṃ tatra lakṣaṃ hi tasyāpyevaṃ gataṃ bhuvi

nūtano dṛśyate kāyaḥ paṃcaviṃśābdiko yathā /
paṃcaviṃśābdiko bhāti rūpeṇa vayasā tadā

prabalaḥ prauḍhisaṃpannaḥ prasādāttasya cakriṇaḥ /
mānuṣā bhuvamāsthāya yamaṃ naiva prayāṃti te

rāgadveṣavinirmuktāḥ kleśapāśavivarjitāḥ /
sukhino dānapuṇyaiśca sarvadharmaparāyaṇāḥ

vistāraṃ tejanāḥ sarve saṃtatyāpi gatā nṛpa /
yathā dūrvāvaṭāścaiva vistāraṃ yāṃti bhūtale

yathā te mānavāḥ sarve putrapautraiḥ pravistṛtāḥ /
mṛtyudoṣavihīnāste ciraṃ jīvaṃti vai janāḥ

sthirakāyāśca sukhino jarārogavivarjitāḥ /
paṃcaviṃśābdikāḥ sarve narā dṛśyaṃti bhūtale

satyācāraparāḥ sarve viṣṇudhyānaparāyaṇāḥ /
evaṃ sarve ca martyāste prasādāttasya cakriṇaḥ

saṃjātā mānavāḥ sarve dānabhogaparāyaṇāḥ /
mṛto na śrūyate loke martyaḥ kopi narottama

śokaṃ naiva prapaśyaṃti doṣaṃ naiva prayāṃti te /
yadrūpaṃ svargalokasya tadrūpaṃ bhūtalasya ca

saṃjātaṃ mānavaśreṣṭha prasādāttasya cakriṇaḥ /
vibhraṣṭā yamadūtāste viṣṇudūtaiśca tāḍitāḥ

rudamānā gatāḥ sarve dharmarājaṃ parasparam /
tatsarvaṃ kathitaṃ dūtaiśceṣṭitaṃ bhūpatestu taiḥ

amṛtyubhūtalaṃ jātaṃ dānabhogena bhāskare /
nahuṣasyātmajenāpi kṛtaṃ devayayātinā

viṣṇubhaktena puṇyena svargarūpaṃ pradarśitam /
evamākarṇitaṃ sarvaṃ dharmarājena vai tadā

dharmarājastadā tatra dūtebhyaḥ śrutavistaraḥ /
ciṃtayāmāsa sarvārthaṃ śrutvaivaṃnṛpaceṣṭitam

iti śrīpadmapurāṇe bhūmikhaṃḍe venopākhyāne mātāpitṛtīrthavarṇane yayāticaritre paṃcasaptatitamo'dhyāyaḥ