પદ્મ પુરાણ · અધ્યાય 2.74

સુકર્મોવાચ-
દૂતાસ્તુ ગ્રામેષુ વદંતિ સર્વે દ્વીપેષુ દેશેષ્વથ પત્તનેષુ ।
લોકાઃ શૃણુધ્વં નૃપતેસ્તદાજ્ઞાં સર્વપ્રભાવૈર્હરિમર્ચયંતુ

દાનૈશ્ચ યજ્ઞૈર્બહુભિસ્તપોભિર્ધર્માભિલાષૈર્યજનૈર્મનોભિઃ ।
ધ્યાયંતુ લોકા મધુસૂદનં તુ આદેશમેવં નૃપતેસ્તુ તસ્ય

એવં સુઘુષ્ટં સકલં તુ પુણ્યમાકર્ણ્ય તં ભૂમિતલેષુ લોકૈઃ ।
તદાપ્રભૃત્યેવ યજંતિ વિષ્ણું ધ્યાયંતિ ગાયંતિ જપંતિ મર્ત્યાઃ

વેદપ્રણીતૈશ્ચ સુસૂક્તમંત્રૈઃ સ્તોત્રૈઃ સુપુણ્યૈરમૃતોપમાનૈઃ ।
શ્રીકેશવં તદ્ગતમાનસાસ્તે વ્રતોપવાસૈર્નિયમૈશ્ચ દાનૈઃ

વિહાય દોષાન્નિજકાયચિત્તવાગુદ્ભવાન્પ્રેમરતાઃ સમસ્તાઃ ।
લક્ષ્મીનિવાસં જગતાં નિવાસં શ્રીવાસુદેવં પરિપૂજયંતિ

ઇત્યાજ્ઞાતસ્ય ભૂપસ્ય વર્તતે ક્ષિતિમંડલે ।
વૈષ્ણવેનાપિ ભાવેન જનાઃ સર્વે જયંતિ તે

નામભિઃ કર્મભિર્વિષ્ણું યજંતે જ્ઞાનકોવિદાઃ ।
તદ્ધ્યાનાસ્તદ્વ્યવસિતા વિષ્ણુપૂજાપરાયણાઃ

યાવદ્ભૂમંડલં સર્વં યાવત્તપતિ ભાસ્કરઃ ।
તાવદ્ધિ માનવા લોકાઃ સર્વે ભાગવતા બભુઃ

વિષ્ણોર્ધ્યાનપ્રભાવેણ પૂજાસ્તોત્રેણ નામતઃ ।
આધિવ્યાધિવિહીનાસ્તે સંજાતા માનવાસ્તદા

વીતશોકાશ્ચ પુણ્યાશ્ચ સર્વે ચૈવ તપોધનાઃ ।
સંજાતા વૈષ્ણવા વિપ્ર પ્રસાદાત્તસ્ય ચક્રિણઃ

આમયૈશ્ચ વિહીનાસ્તે દોષૈરોષૈશ્ચ વર્જિતાઃ ।
સર્વૈશ્વર્યસમાપન્નાઃ સર્વરોગવિવર્જિતાઃ

પ્રસાદાત્તસ્ય દેવસ્ય સંજાતા માનવાસ્તદા ।
અમરાઃ નિર્જરાઃ સર્વે ધનધાન્યસમન્વિતાઃ

મર્ત્યા વિષ્ણુપ્રસાદેન પુત્રપૌત્રૈરલંકૃતાઃ ।
તેષામેવ મહાભાગ ગૃહદ્વારેષુ નિત્યદા

કલ્પદ્રુમાઃ સુપુણ્યાસ્તે સર્વકામફલપ્રદાઃ ।
સર્વકામદુઘા ગાવઃ સચિંતામણયસ્તથા

સંતિ તેષાં ગૃહે પુણ્યાઃ સર્વકામપ્રદાયકાઃ ।
અમરા માનવા જાતાઃ પુત્રપૌત્રૈરલંકૃતાઃ

સર્વદોષવિહીનાસ્તે વિષ્ણોશ્ચૈવ પ્રસાદતઃ ।
સર્વસૌભાગ્યસંપન્નાઃ પુણ્યમંગલસંયુતાઃ

સુપુણ્યા દાનસંપન્ના જ્ઞાનધ્યાનપરાયણાઃ ।
ન દુર્ભિક્ષં ન ચ વ્યાધિર્નાકાલમરણં નૃણામ્

તસ્મિઞ્શાસતિ ધર્મજ્ઞે યયાતૌ નૃપતૌ તદા ।
વૈષ્ણવા માનવાઃ સર્વે વિષ્ણુવ્રતપરાયણાઃ

તદ્ધ્યાનાસ્તદ્ગતાઃ સર્વે સંજાતા ભાવતત્પરાઃ ।
તેષાં ગૃહાણિ દિવ્યાનિ પુણ્યાનિ દ્વિજસત્તમ

પતાકાભિઃ સુશુક્લાભિઃ શંખયુક્તાનિ તાનિ વૈ ।
ગદાંકિતધ્વજાભિશ્ચ નિત્યં ચક્રાંકિતાનિ ચ

પદ્માંકિતાનિ ભાસંતે વિમાનપ્રતિમાનિ ચ ।
ગૃહાણિ ભિત્તિભાગેષુ ચિત્રિતાનિ સુચિત્રકૈઃ

સર્વત્ર ગૃહદ્વારેષુ પુણ્યસ્થાનેષુ સત્તમાઃ ।
વનાનિ સંતિ દિવ્યાનિ શાદ્વલાનિ શુભાનિ ચ

તુલસ્યા ચ દ્વિજશ્રેષ્ઠ તેષુ કેશવમંદિરૈઃ ।
ભાસંતે પુણ્યદિવ્યાનિ ગૃહાણિ પ્રાણિનાં સદા

સર્વત્ર વૈષ્ણવો ભાવો મંગલો બહુ દૃશ્યતે ।
શંખશબ્દાશ્ચ ભૂલોકે મિથઃ સ્ફોટરવૈઃ સખે

શ્રૂયંતે તત્ર વિપ્રેંદ્ર દોષપાપવિનાશકાઃ ।
શંખસ્વસ્તિકપદ્માનિ ગૃહદ્વારેષુ ભિત્તિષુ

વિષ્ણુભક્ત્યા ચ નારીભિર્લિખિતાનિ દ્વિજોત્તમ ।
ગીતરાગસુવર્ણૈશ્ચ મૂર્ચ્છના તાનસુસ્વરૈઃ

ગાયંતિ કેશવં લોકા વિષ્ણુધ્યાનપરાયણાઃ

હરિં મુરારિં પ્રવદંતિ કેશવં પ્રીત્યા જિતં માધવમેવ ચાન્યે ।
શ્રીનારસિંહં કમલેક્ષણં તં ગોવિંદમેકં કમલાપતિં ચ

કૃષ્ણં શરણ્યં શરણં જપંતિ રામં ચ જપ્યૈઃ પરિપૂજયંતિ ।
દંડપ્રણામૈઃ પ્રણમંતિ વિષ્ણું તદ્ધ્યાનયુક્તાઃ પરવૈષ્ણવાસ્તે

ઇતિ શ્રીપદ્મપુરાણે ભૂમિખંડે વેનોપાખ્યાને માતાપિતૃતીર્થવર્ણને યયાતિચરિત્રે ચતુઃસપ્તતિતમોઽધ્યાયઃ