પદ્મ પુરાણ · અધ્યાય 2.73

પિપ્પલ ઉવાચ-
ગતે તસ્મિન્મહાભાગે દૂત ઇંદ્રસ્ય વૈ પુનઃ ।
કિં ચકાર સ ધર્માત્મા યયાતિર્નહુષાત્મજઃ

સુકર્મોવાચ-
તસ્મિન્ગતે દેવવરસ્ય દૂતે સ ચિંતયામાસ નરેંદ્રસૂનુઃ ।
આહૂય દૂતાન્પ્રવરાન્સ સત્વરં ધર્માર્થયુક્તં વચ આદિદેશ

ગચ્છંતુ દૂતાઃ પ્રવરાઃ પુરોત્તમે દેશેષુ દ્વીપેષ્વખિલેષુ લોકે ।
કુર્વંતુ વાક્યં મમ ધર્મયુક્તં વ્રજંતુ લોકાઃ સુપથા હરેશ્ચ

ભાવૈઃ સુપુણ્યૈરમૃતોપમાનૈર્ધ્યાનૈશ્ચ જ્ઞાનૈર્યજનૈસ્તપોભિઃ ।
યજ્ઞૈશ્ચ દાનૈર્મધુસૂદનૈકમર્ચંતુ લોકા વિષયાન્વિહાય

સર્વત્ર પશ્યંત્વસુરારિમેકં શુષ્કેષુ ચાર્દ્રેષ્વપિ સ્થાવરેષુ ।
અભ્રેષુ ભૂમૌ સચરાચરેષુ સ્વીયેષુ કાયેષ્વપિ જીવરૂપમ્

દેવં તમુદ્દિશ્ય દદંતુ દાનમાતિથ્યભાવૈઃ પરિપૈત્રિકૈશ્ચ ।
નારાયણં દેવવરં યજધ્વં દોષૈર્વિમુક્તા અચિરાદ્ભવિષ્યથ

યો મામકં વાક્યમિહૈવ માનવો લોભાદ્વિમોહાદપિ નૈવ કારયેત્ ।
સ શાસ્યતાં યાસ્યતિ નિર્ઘૃણો ધ્રુવં મમાપિ ચૌરો હિ યથા નિકૃષ્ટઃ

આકર્ણ્ય વાક્યં નૃપતેશ્ચ દૂતાઃસંહૃષ્ટભાવાઃ સકલાં ચ પૃથ્વીમ્ ।
આચખ્યુરેવં નૃપતેઃ પ્રણીતમાદેશભાવં સકલં પ્રજાસુ

વિપ્રાદિમર્ત્યા અમૃતં સુપુણ્યમાનીતમેવં ભુવિ તેન રાજ્ઞા ।
પિબંતુ પુણ્યં પરિવૈષ્ણવાખ્યં દોષૈર્વિહીનં પરિણામમિષ્ટમ્

શ્રીકેશવં ક્લેશહરં વરેણ્યમાનંદરૂપં પરમાર્થમેવમ્ ।
નામામૃતં દોષહરં સુરાજ્ઞા આનીતમસ્ત્યેવ પિબંતુ લોકાઃ

સખડ્ગપાણિં મધુસૂદનાખ્યં તં શ્રીનિવાસં સગુણં સુરેશમ્ ।
નામામૃતં દોષહરં સુરાજ્ઞા આનીતમસ્ત્યેવ પિબંતુ લોકાઃ

શ્રીપદ્મનાથં કમલેક્ષણં ચ આધારરૂપં જગતાં મહેશમ્ ।
નામામૃતં દોષહરં સુરાજ્ઞા આનીતમસ્ત્યેવ પિબંતુ લોકાઃ

પાપાપહં વ્યાધિવિનાશરૂપમાનંદદં દાનવદૈત્યનાશનમ્ ।
નામામૃતં દોષહરં સુરાજ્ઞા આનીતમસ્ત્યેવ પિબંતુ લોકાઃ

યજ્ઞાંગરૂપં ચરથાંગપાણિં પુણ્યાકરં સૌખ્યમનંતરૂપમ્ ।
નામામૃતં દોષહરં સુરાજ્ઞા આનીતમસ્ત્યેવ પિબંતુ લોકાઃ

વિશ્વાધિવાસં વિમલં વિરામં રામાભિધાનં રમણં મુરારિમ્ ।
નામામૃતં દોષહરં સુરાજ્ઞા આનીતમસ્ત્યેવ પિબંતુ લોકાઃ

આદિત્યરૂપં તમસાં વિનાશં બંધસ્યનાશં મતિપંકજાનામ્ ।
નામામૃતં દોષહરં સુરાજ્ઞા આનીતમસ્ત્યેવ પિબંતુ લોકાઃ

નામામૃતં સત્યમિદં સુપુણ્યમધીત્ય યો માનવ વિષ્ણુભક્તઃ ।
પ્રભાતકાલે નિયતો મહાત્મા સ યાતિ મુક્તિં ન હિ કારણં ચ

ઇતિ શ્રીપદ્મપુરાણે ભૂમિખંડે વેનોપાખ્યાને પિતૃતીર્થવર્ણને યયાતિચરિતે ત્રિસપ્તતિતમોઽધ્યાયઃ