પદ્મ પુરાણ · અધ્યાય 2.65

યયાતિરુવાચ-
ધર્મસ્ય રક્ષકઃ કાયો માતલે ચાત્મના સહ ।
નાકમેષ ન પ્રયાતિ તન્મે ત્વં કારણં વદ

માતલિરુવાચ-
પંચાનામપિ ભૂતાનાં સંગતિર્નાસ્તિ ભૂપતે ।
આત્મના સહ વર્તંતે સંગત્યા નૈવ પંચ તે

સર્વેષાં તત્ર સંઘાતઃ કાયગ્રામે પ્રવર્તતે ।
જરયા પીડિતાઃ સર્વેઃ સ્વંસ્વં સ્થાનં પ્રયાંતિ તે

યથા રસાધિકા પૃથ્વી મહારાજ પ્રકલ્પિતા ।
રસૈઃ ક્લિન્ના તતઃ પૃથ્વી મૃદુત્વં યાતિ ભૂપતે

ભિદ્યતે પિપીલિકાભિર્મૂષિકાભિસ્તથૈવ ચ ।
છિદ્રાણ્યેવ પ્રજાયંતે વલ્મીકાશ્ચ મહોદરાઃ

તદ્વત્કાયે પ્રજાયંતે ગંડમાલા વિચાર્ચિકાઃ ।
કૃમિભિર્ભિદ્યમાનશ્ચ કાય એષ નરોત્તમ

ગુલ્માસ્તત્ર પ્રજાયંતે સદ્યઃ પીડાકરાસ્તદા ।
એભિર્દોષૈઃ સમાયુક્તઃ કાયોયં નહુષાત્મજ ।
કથં પ્રાણસમાયોગાદ્દિવં યાતિ નરેશ્વર

કાયે પાર્થિવભાગોઽયં સમાનાર્થં પ્રતિષ્ઠિતઃ ।
ન કાયઃ સ્વર્ગમાયાતિ યથા પૃથ્વી તથાસ્થિતઃ

એતત્તે સર્વમાખ્યાતં દોષૌઘૈઃ પાર્થિવસ્ય યઃ

ઇતિ શ્રીપદ્મપુરાણે ભૂમિખંડે વેનોપાખ્યાને માતાપિતૃતીર્થ-।
માહાત્મ્યે પંચષષ્ટિતમોઽધ્યાયઃ