પદ્મ પુરાણ · અધ્યાય 2.45

પંચચત્વારિંશત્તમોઽધ્યાયઃ
સુકલોવાચ-
અથ તે લુબ્ધકાઃ સર્વે શૂકરીં પ્રતિ જગ્મિરે ।
શૂરાશ્ચ દારુણાઃ પ્રાપ્તાઃ પાશહસ્તાશ્ચ ભીષણાઃ

ચતુરશ્ચ તતો ડિંભાન્કૃત્વા સ્થિત્વા ચ શૂકરી ।
કુટુંબેન સમં કાંતં હતં દૃષ્ટ્વા મહાહવે

ભર્તુર્મે ચિંતિતં પ્રાપ્તમૃષિદેવૈશ્ચ પૂજિતઃ ।
ગતઃ સ્વર્ગં મહાત્માસૌ વીર્યેણાનેન કર્મણા

અનેનાપિ પથા યાસ્યે સ્વર્ગં ભર્ત્તા સ તિષ્ઠતિ ।
તયા સુનિશ્ચિતં કૃત્વા પુત્રાન્પ્રતિવિચિંતિતમ્

યદા જીવંતિ મે બાલાશ્ચત્વારો વંશધારકાઃ ।
ભવત્યસ્ય સુવીરસ્ય કોલસ્યાપિ મહાત્મનઃ

કેનોપાયેન પુત્રાન્વૈ રક્ષાયુક્તાન્કરોમ્યહમ્ ।
ઇતિ ચિંતાપરા ભૂત્વા દૃષ્ટ્વા પર્વતસંકટમ્

તત્ર માર્ગં સુવિસ્તીર્ણં નિષ્કાસાય પ્રયાસ્યતે ।
તયા સુનિશ્ચિતં કૃત્વા પુત્રાન્પ્રતિ વિચિંતિતમ્

તાનુવાચ મહારાજ પુત્રાન્પ્રતિ સુમોહિતાન્ ।
યાવત્તિષ્ઠામ્યહં પુત્રાસ્તાવદ્ગચ્છત શીઘ્રગાઃ

તેષાં મધ્યે સુતો જ્યેષ્ઠઃ કથં યાસ્યામિ માતરમ્ ।
સંત્યજ્ય જીવલોભાચ્ચ ધિઙ્મે માતઃ સુજીવિતમ્

પિતૃવૈરં કરિષ્યામિ સાધયિષ્યે રણે રિપૂન્ ।
ગૃહીત્વા ત્વં કનીયસોભ્રાતૄન્સ્ત્રીન્દુર્ગકંદરમ્

પિતરં માતરં ત્યક્ત્વા યો યાતિ હિ સ પાપધીઃ ।
નરકં ચ પ્રયાત્યેવ કૃમિકોટિસમાકુલમ્

તમુવાચ સુદુઃખાર્તા ત્વાં ત્યક્ત્વાહં કથં સુત ।
સંયાસ્યામિ મહાપાપા ત્રયો ગચ્છંતુ મે સુતાઃ

કનીયસસ્ત્રયસ્ત્વેવ ગતા ગિરિવનાંતરમ્ ।
તૌ જગ્મતૂ રણભુવં તેષામેવ સુપશ્યતામ્

તેજસા સુબલેનાપિ ગર્જંતૌ ચ પુનઃપુનઃ ।
અથ તે લુબ્ધકાઃ શૂરાઃ સંપ્રાપ્તા વાતરંહસઃ

પથા તેનાપિ દુર્ગેણ ત્રયસ્તે પ્રેષિતા નૃપ ।
તિષ્ઠતઃ સ્મ પથં રુદ્ધ્વા દ્વાવેતૌ જનનીસુતૌ

લુબ્ધકાશ્ચ તતઃ પ્રાપ્તાઃ ખડ્ગબાણધનુર્ધરાઃ ।
પ્રજઘ્નુસ્તોમરૈસ્તીક્ષ્ણૈશ્ચક્રૈશ્ચ મુશલૈસ્તતઃ

માતરં પૃષ્ઠતઃ કૃત્વા તનયો યુધ્યતે સ તૈઃ ।
દંષ્ટ્રયા નિહતાઃ કેચિત્કેચિત્તુંડેન ઘાતિતાઃ

સંજઘાન ખુરાગ્રૈશ્ચ શૂરાશ્ચ પતિતા રણે ।
યુયુધે શૂકરઃ સંખ્યે દૃષ્ટો રાજ્ઞા મહાત્મના

પિતુઃ સકાશાચ્છૂરોયમિતિ જ્ઞાત્વા સસમ્મુખઃ ।
બાણપાણિર્મહાતેજા મનુસૂનુઃ પ્રતાપવાન્

નિશિતેનાપિ બાણેન અર્દ્ધચંદ્રાનુકારિણા ।
રાજ્ઞા હતઃ પપાતોર્વ્યાં વિદ્ધોરસ્કો મહાત્મના

મમાર સહસા ભૂમૌ પપાત સ હિ શૂકરઃ ।
પુત્રમોહં પરં પ્રાપ્તા તસ્યોપરિ ગતા સ્વયમ્

તયા ચ નિહતાઃ શૂરાસ્તુંડઘાતૈર્મહીતલે ।
નિપેતુર્લુબ્ધકાઃ શૂરાઃ કતિનષ્ટા મૃતા નૃપ

દ્રાવયંતી મહત્સૈન્યં દંષ્ટ્રયા સૂકરી તતઃ ।
યથા કૃત્યા સમુદ્ભૂતા મહાભયવિધાયિકા

તમુવાચ તતો રાજ્ઞી દેવરાજસુતોપમમ્ ।
અનયા નિહતં રાજન્મહત્સૈન્યં તવૈવ હિ

કસ્માદુપેક્ષસે કાંત તન્મે ત્વં કારણં વદ ।
તામુવાચ મહારાજો નાહં હન્મિ ઇમાં સ્ત્રિયમ્

મહાદોષં પ્રિયે દૃષ્ટં સ્ત્રીવધે દૈવતૈઃ કિલ ।
તસ્માન્ન ઘાતયેન્નારીં પ્રેષયેહં ન કંચન

અસ્યા વધનિમિત્તાર્થે પાપાદ્બિભેમિ સુંદરિ ।
એવમુક્ત્વા તદા રાજા વિરરામ મહીપતિઃ

લુબ્ધકો ઝાર્ઝરો નામ દદૃશે સ તુ સૂકરીમ્ ।
કુર્વંતીં કદનં તેષાં દુઃસહાં સુભટૈરપિ

આવિવ્યાધ સુવેગેન બાણેન નિશિતેન હિ ।
સંલગ્નેન તુ બાણેન શોણિતેન પરિપ્લુતા

શોભમાના ત્વરાં પ્રાપ્તા વીરશ્રિયા સમાકુલા ।
તુંડેનાપિ હતઃ સંખ્યે ઝાર્ઝરઃ સ તયા પુનઃ

પતમાનેન તેનાપિ ઝાર્ઝરેણ તદા હતા ।
ખડ્ગેન નિશિતેનાપિ પપાત વિદલીકૃતા

શ્વસમાના રણેનાપિ મૂર્ચ્છનાભિ પરિપ્લુતા ।
દુઃખેન મહતાવિષ્ટા જીવમાના મહીતલે

ઇતિ શ્રીપદ્મપુરાણે ભૂમિખંડે વેનોપાખ્યાને સુકલાચરિત્રે પંચચત્વારિંશોઽધ્યાયઃ