પદ્મ પુરાણ · અધ્યાય 2.33

ઋષય ઊચુઃ-
શપ્તા ગંધર્વપુત્રેણ સુશંખેન મહાત્મના ।
તસ્ય શાપાત્કથં જાતા કિં કિં કર્મ કૃતં તયા

સા લેભે કીદૃશં પુત્રં તસ્ય શાપાદ્દ્વિજોત્તમ ।
સુનીથાયાશ્ચ ચરિતં ત્વં નો વિસ્તરતો વદ

સૂત ઉવાચ-
સુશંખેનાપિ તેનૈવ સા શપ્તા તનુમધ્યમા ।
પિતુઃ સ્થાનં ગતા સા તુ સુનીથા દુઃખપીડિતા

પિતરં ચાત્મનશ્ચૈવ ચરિતં ચ પ્રકાશિતમ્ ।
શ્રુતવાન્સોપિ ધર્માત્મા મૃત્યુઃ સત્યવતાં વર

તામુવાચ સુનીથાં તુ સુતાં શપ્તાં મહાત્મના ।
ભવત્યા દુષ્કૃતં પાપં ધર્મ તેજઃ પ્રણાશનમ્

કસ્માત્કૃતં મહાભાગે સુશાંતસ્ય હિ તાડનમ્ ।
વિરુદ્ધં સર્વલોકસ્ય ભવત્યા પરિકલ્પિતમ્

કામક્રોધવિહીનં તં સુશાંતં ધર્મવત્સલમ્ ।
તપોમાર્ગે વિલીનં ચ પરબ્રહ્મણિ સંસ્થિતમ્

તમેવઘાતયેદ્યો વૈ તસ્ય પાપં શૃણુષ્વ હિ ।
પાપાત્મા જાયતે પુત્રઃ કિલ્બિષં લભતે બહુ

તાડંતં તાડયેદ્યો વૈ ક્રોશંતં ક્રોશયેત્પુનઃ ।
તસ્ય પાપં સ વૈ ભુંક્તે તાડિતસ્ય ન સંશયઃ

સ વૈ શાંતઃ સ જિતાત્મા તાડયંતં ન તાડયેત્ ।
નિર્દોષં પ્રતિ યેનાપિ તાડનં ચ કૃતં સુતે

પશ્ચાન્મોહેન પાપેન નિર્દોષેઽપિ ચ તાડયેત્ ।
નિર્દોષં પ્રતિ યેનાપિ હૃદ્રોગઃ ક્રિયતે વૃથા

નિર્દોષં તાડયેત્પશ્ચાન્મોહાત્પાપેન કેનચિત્ ।
સ પાપી પાપમાપ્નોતિ નિર્દોષસ્ય શરીરજમ્

નિર્દોષો ઘાતયેત્તં વૈ તાડંતં પાપચેતસમ્ ।
પુનરુત્થાય વેગેન સાહસાત્પાપચેતનમ્

પાપકર્તુશ્ચ યત્પાપં નિર્દોષં પ્રતિ ગચ્છતિ ।
તાડનં નૈવ તસ્માદ્વૈ કાર્યં દોષવતોઽપિ ચ

દુષ્કૃતં ચ મહત્પુત્રિ ત્વયૈવ પરિપાલિતમ્ ।
શપ્તા તેનાપિ યાદ્યૈવ તસ્માત્પુણ્યં સમાચર

સતાં સંગં સમાસાદ્ય સદૈવ પરિવર્તય ।
યોગધ્યાનેન જ્ઞાનેન પરિવર્તય નંદિનિ

સતાં સંગો મહાપુણ્યો બહુશ્રેયો વિધાયકઃ ।
બાલે પશ્ય સુદૃષ્ટાંતં સતાં સંગસ્ય યદ્ગુણમ્

અપાં સંસ્પર્શનાત્પાનાત્સ્નાનાત્તત્ર મહાધિયઃ ।
મુનયઃ સિદ્ધિમાયાંતિ બાહ્યાભ્યંતરક્ષાલિતાઃ

શુચિષ્મંતો ભવંત્યેતે લોકાઃ સર્વે ચરાચરાઃ ।
આપઃ શાંતાઃ સુશીતાશ્ચ મૃદુગાત્રાઃ પ્રિયંકરાઃ

નિર્મલા રસવત્યશ્ચ પુણ્યવીર્યા મલાપહાઃ ।
તથા સંતસ્ત્વયા જ્ઞેયા નિષેવ્યાશ્ચ પ્રયત્નતઃ

યથા વહ્નિપ્રસંગાચ્ચ મલં ત્યજતિ કાંચનમ્ ।
તથા સતાં હિ સંસર્ગાત્પાપં ત્યજતિ માનવઃ

સત્યવહ્નિઃ પ્રદીપ્તશ્ચ પ્રજ્વલેત્પુણ્યતેજસા ।
સત્યેન દીપ્તતેજાસ્તુ જ્ઞાનેનાપિ સુનિર્મલઃ

અત્યુષ્ણો ધ્યાનભાવેન અસ્પૃશ્યઃ પાપજૈર્નરૈઃ ।
સત્યવહ્નેઃ પ્રસંગાચ્ચ પાપં સર્વં વિનશ્યતિ

તસ્માત્સત્યસ્ય સંસર્ગઃ કર્તવ્યઃ સર્વથા ત્વયા ।
પાપભારં પરિત્યજ્ય પુણ્યમેવં સમાશ્રય

સૂત ઉવાચ-
એવં પિત્રા સુનીથા સા દુઃખિતા પ્રતિબોધિતા ।
નમસ્કૃત્ય પિતુઃ પાદૌ ગતા સા નિર્જનં વનમ્

કામં ક્રોધં પરિત્યજ્ય બાલ્યભાવં તપસ્વિની ।
મોહદ્રોહૌ ચ માયાં ચ ત્યક્ત્વા એકાંતમાસ્થિતા

તસ્યાઃ સખ્યઃ સમાજગ્મુઃ ક્રીડાર્થં લીલયાન્વિતાઃ ।
તાં દદૃશુર્વિશાલાક્ષ્યઃ સુનીથાં દુઃખભાગિનીમ્

ધ્યાયંતીં ચિંતયાનાં તામૂચુશ્ચિંતાપરાયણાઃ ।
કસ્માચ્ચિંતસિ ભદ્રે ત્વમનયા ચિંતયાન્વિતા

તન્નો વૈ કારણં બ્રૂહિ ચિંતાદુઃખપ્રદાયિની ।
એકૈવ સાર્થકી ચિંતા ધર્મસ્યાર્થે વિચિંત્યતે

દ્વિતીયા સાર્થકા ચિંતા યોગિનાં ધર્મનંદિની ।
અન્યા નિરર્થિકા ચિંતા તાં નૈવ પરિકલ્પયેત્

કાયનાશકરી ચિંતા બલ તેજઃ પ્રણાશિની ।
નાશયેત્સર્વસૌખ્યં તુ રૂપહાનિં નિદર્શયેત્

તૃષ્ણાં મોહં તથા લોભમેતાંશ્ચિંતા હિ પ્રાપયેત્ ।
પાપમુત્પાદયેચ્ચિંતા ચિંતિતા ચ દિને દિને

ચિંતાવ્યાધિપ્રકાશાય નરકાય પ્રકલ્પયેત્ ।
તસ્માચ્ચિંતાં પરિત્યજ્ય ચાનુવર્તસ્વ શોભને

અર્જિતં કર્મણા પૂર્વં સ્વયમેવ નરેણ તુ ।
તદેવ ભુંક્તેઽસૌ જંતુર્જ્ઞાનવાન્ન વિચિંતયેત્

તસ્માચ્ચિંતાં પરિત્યજ્ય સુખદુઃખાદિકં વદ ।
તાસાં તદ્વચનં શ્રુત્વા સુનીથા વાક્યમબ્રવીત્

ઇતિ શ્રીપદ્મપુરાણે પંચપંચાશત્સહસ્રસંહિતાયાં ભૂમિખંડે વેનોપાખ્યાને
સુનીથાચરિતં નામ ત્રયસ્ત્રિંશોઽધ્યાયઃ